睡眠陷阱，你中咗幾多個？（有關睡眠倒退期）

Catherine Author

經常同啲媽咪傾開計，都會講到湊ＢＢ係一個持久戰 >_<’ 的確，唔同年紀，會出現唔同嘅問題需要處理。睡眠都一樣，有好幾個關卡要過㗎！

今日就同大家講吓，有邊幾個大佬要打！

初生時期

當BB啱啱出世，情況通常都好兩極，一係就勁瞓唔駛點理，一係就日日爆喊（尤其6-8周之後）。呢個月齡，要做嘅係盡量留意BB嘅疲勞跡象，唔好等到佢捽眼打喊露至帶佢去瞓覺（其實所有月齡都一樣），環境同活動保持平靜就OＫ，避免BB受到過度刺激。

去到大個少少，BB開始識得翻身，可能會趴咗喺度大喊。好多媽咪都會好驚BB會透唔到氣，於是成晚不斷同BB翻返轉，結果大人同BB都冇覺好瞓... 你知道嗎？最危險嘅唔係趴睡，而係床上又枕頭又被又公仔又攬枕，仲有床圍，其實呢啲至係令BB窒息嘅原兇！只要床上冇任何軟身物品，其實係可以由得BB趴睡，好多BB趴睡到2歲幾３歲添㗎！（孖仔都係）

４個月睡眠倒退期

差唔多同一段時間，BB亦可能會進入４個月睡眠倒退期。如果你BB一向係天使寶寶，突然開始一晚醒幾次爆喊，你就差唔多可以肯定，係BB進入新一個里程碑嘞！

以下步入4個月睡眠倒退期嘅跡象：

- 半夜醒得好密
- 日頭唔肯瞓，或瞓得唔長
- 經常大喊或扭計，點樣安撫都平伏唔到
- 胃口突然變好或變差

雖然稱之為4個月睡眠倒退期，但有啲BB可能喺8個星期大時，就已經出現以上情況，有些BB就可能要5個月大時至會受到影響。一般而言，最常發生嘅時間係3個半月至4個月大時。

點解會出現睡眠倒退呢？

BB喺啱啱出生後幾個星期，好多時候都係喺深層睡眠之中，有時甚至點叫都叫唔醒，就連肚餓都仍然繼續怒瞓（所以會咁早戒咗夜奶）。當BB去到3-4個月大時，大腦發育漸漸成熟，開始同成年人一樣，會喺深淺睡眠週期之間循環，銜接期間會郁嚟郁去或者大喊。

好多時，BB喺半夜驚醒哭鬧，係因為佢哋習慣咗奶睡、搖睡，及抱睡等等入睡方式。所以，BB一旦喺睡眠週期完結時醒咗，就冇辦法自己瞓返，需要你出手協助至能夠再次入睡嘞!

4個月睡眠倒退期係一個重要嘅里程碑，對個別BB嘅影響程度各有不同。喺呢個時期，建議盡力協助BB入睡，畀佢瞓得足啲先，等2-3個星期，睇吓情況有冇改善。如果BB仍然醒得好密，咁就係時候改變入睡方式，畀佢習慣喺床上入睡嘞！（點樣做？參加健康睡眠工作坊啦！）

要戒奶睡抱睡嘅方法有好多種，要視乎BB現時嘅入睡方式、BB嘅脾性、家長嘅育兒觀，以及家庭環境（例如BB瞓嬰兒床定同大人同床）等等因素，去選擇最合適嘅方法。當BB能夠喺床上入睡，甚至自行入睡之後，就算喺半夜醒咗，亦都無須你嘅協助，就能夠自動再次入睡，繼而一覺瞓天光。

８個月睡眠倒退期

其中一個好多媽咪都會中嘅陷阱，就係BB啱啱開始識企，唔肯再趴低瞓覺。原本能夠床上入睡，甚至自行入睡嘅BB，呢個時間因為唔肯瞓，於是大人就唯有抱起佢氹瞓覺... 千祈唔好呀！
伸延閱讀：《個案分享 - Bryan》

呢次倒退期主要係同BB嘅大腦發展有關，成因包括：

1）BB啱啱識坐、識爬或識扶住嘢企，於是佢一有機會就會好想練習，就算半夜醒咗都會好勤力去開夜車 而且，啱啱識企嘅BB，會自然地鎖住個膝頭，於是企咗喺度落唔返嚟。

2）BB嘅語言吸收能力急升，令大腦太忙碌而瞓得唔好。

3）分離焦慮去到9個月會尤其明顯，因為BB開始理解發生緊啲乜嘢事，於是見到你走咗，唔知幾時至會再見到你

4）一向瞓開3覺嘅BB，去到8個月大好多時都會抗議瞓第三次，如果冇提早返就寢時間，佢攰得滯夜晚就會難入睡同瞓得唔好嘞！

5）出牙（一般只會影響幾日）

呢個情況一般會維持3-6個星期，最重要嘅係，避免養成新嘅依賴。繼續而家嘅入睡方式，雖然可能會需要長啲嘅時間至瞓到，但總好過製造新嘅睡眠問題。

例如，如果BB本身係已經能夠自行入睡嘅話，佢係唔會突然唔識㗎！千其唔好呢個時候開始抱睡，或抱上大人床同睡。我哋要做嘅係畀啲空間佢，對佢有信心。你亦可以提早畀BB落床，等佢有多啲時間去入睡。

至於夜醒，如果BB冇喊嘅話，其實你唔需要做任何嘢，由得佢自己瞓返就得。因為當BB未ready瞓嘅話，你嘗試做任何嘢，想去令佢瞓返，都只會吃力不討好 -- 冇人可以控制另一個人瞓著覺㗎！

12個月睡眠倒退期

另一個好易中嘅陷阱，就係太早同BB轉覺，尤其是太早轉１覺。好可能頭幾日會冇乜嘢，瞓得好好。但過幾日就開始夜醒早醒，午睡亦可能會變短。通常發生呢個情況，都係喺12個月大時左右發生，因為BB唔肯瞓2覺（又係倒退期）。但其實大多數BB都要到15-18個月至會ready，如果你BB明顯未能夠支撐到4.5-5.5小時嘅清醒時間，咁寧願轉返2覺先好嘞！
伸延閱讀：《唔好過早轉一覺呀！》

大多數小朋友要到大概15個月大，至能夠支撐到4.5-6個小時嘅清醒時間，有啲甚至要到18個月才ready（尤其夜晚未能提早瞓嘅話，遲啲至轉比較好）。當小朋友生理上未準備好呢個轉變，到咗瞓晏覺嘅時間就已經體力透支，結果瞓得唔穩好快就會醒。除此之外，由於覺得攰，小朋友嘅情緒亦會變得唔穩定，易因小事而發脾氣，或者痴住媽咪唔肯放，身手亦會變得笨拙容易跌倒。

咁應該點樣令囝囝囡囡維持兩次小睡呢？

1) 縮短第一次小睡嘅時間，畀佢喺下晝嘅小睡時間攰啲，願意休息一下。
2) 拉長兩次小睡之間嘅清醒時間，即係將第二次小睡嘅時間改遲半小時甚至一小時。

之不過，如果你囝囝囡囡已經接近15個月大，超過連續兩個星期都要好耐至瞓得著，又或者瞓著咗以後好快又醒返，咁或者係時候改為喺食完晏之後瞓個晏覺嘞！

18個月睡眠倒退期

當小朋友去到一歲半，理解能力已經好高，能夠聽得明基本指令畀反應，而且自主意識開始增強，例如要自己食嘢，或自己砌積木等。同時間，呢個年紀亦係分離焦慮嘅另一次高峰期，媽咪離開佢視線範圍幾秒，平時冇事嘅都可能會突然爆喊。呢啲轉變，亦會喺睡眠上反映出嚟 -- 日頭掛住玩唔願瞓，夜晚就捉住媽咪唔放... 

呢次倒退期嘅長短，會視乎父母嘅處理方式而定。因為，呢次倒退期嘅解決方法在於你心態，所以會涉及設限與管教嘅範圍。如果處理不當，就會令問題惡化，例如原本能夠自行入睡嘅BB，因為媽咪出房而大喊，結果變返陪睡。
伸延閱讀：《18個月出現分離焦慮，反而拉近咗爸爸同囝囝嘅親子關係》

記得我講過，好多時床上入睡已經能夠解決夜醒嘅問題嗎？（床上入睡VS自行入睡）但係，去到一歲半，陪睡好多時已經唔足夠，尤其是小朋友有自己一間房嘅話，半夜醒咗唔見媽咪，又會大喊自己瞓唔返。所以，去到呢個年紀，需要畀囝囝囡囡知道，佢哋係可以自己瞓唔駛人陪住，咁至能夠再次改善夜醒嘅問題。

囝囝囡囡喊，作為父母當然好難受，好想停止佢嘅淚水。但好多時，你做得越多，代表你對佢越冇信心，咁囝囝囡囡feel到你嘅擔心，亦會更加不安，問題就會一直無法得到解決。所以，喺呢個時候，我嘅建議係必須退後一步看清全局，諗清楚點樣至係對全家人最好嘅安排。

畀多幾個貼士大家：

1) 定立或調整睡前儀式，減少睡前掙扎
2) 一歲半應該已轉1次小睡，注意午睡不要太遲或過長
3) 千祈唔好呢個時候轉小童床，有睡眠問題，轉床唔單止解決唔到，而且冇咗個physically boundary，小朋友其實反而會冇咁安心，而且亦控制唔到自己，夜醒會不斷離開張床
4) 頂住唔好抱到大人床呀，除非你同你家人都「好願意」同囝囝囡囡同床瞓（唔係「唔介意」喎，有分別㗎），而且大家都能夠瞓得好

２歲睡眠倒退期

好多小朋友滿2歲後，會突然不願意瞓晏覺。呢個係好常見嘅現象，因為小朋友開始察覺到自己係一個個體，好自然開始想去反抗各種規則，測試父母嘅底線。呢個係佢哋認識世界運作嘅方式，明白有啲咩做得有咩唔做得，係發展嘅必經階段嚟㗎！

拒絕瞓晏覺係其中一個測試方式，佢哋希望知道自己能夠有幾大嘅控制能力。

呢個就係2歲睡眠倒退期嘞！

小朋友唔想錯過任何玩嘅機會，所以就算已經喺床上，亦唔願意瞓覺。呢個情況一般只會持續一段短時間，如果你以為囝囝囡囡已經唔再需要瞓晏覺，結果可能會令佢未能得到充足嘅休息。

所謂trouble 2其實好多時候，正正係因為小朋友覺得攰，但又唔識得表達出嚟，於是喺行為及情緒上表現出嚟。

一般而言，小朋友要到3歲至開始唔駛瞓晏覺，建議最最最早都要等到2.5歲，有啲小朋友甚至5歲都仲要瞓一陣㗎！要知道係咪應該停止午睡，必須觀察至少兩個星期。

如果你囝囝囡符合以下情況，就仍然需要每日瞓晏覺：

• 未滿三歲
• 如果冇午睡的話，情緒會變壞，好易扭計發脾氣，或因小事而失控大哭
• 冇瞓晏覺的話，夜晚會瞓得唔好，比平時易醒
• 每日睡眠總時數長期少於11小時

如果你囝囝囡囡符合以下大部分情況，就無須再每日午睡：

• 瞓咗晏覺，夜晚無法輕易入睡，入睡時間比平時遲好多
• 冇瞓晏覺後，連續好多晚都比之前瞓得更穩，冇夜醒
• 喺應該午睡嘅時間坐車或嬰兒車都唔會瞓著
• 就算冇瞓晏覺，情緒亦都同平時冇乜分別
• 每日睡眠總時數長期多於12小時
• 已年滿三歲

之不過，我知好多小朋友好早已經開始返學。如果要返下午班，撞正午睡時間，咁喺冇辦法之下，或者停止午睡係最好嘅做法，但必須注意，夜晚一定一定要提早返畀佢瞓，最好預返12小時啦！
伸延閱讀：要返下午班，撞咗午睡時間，點算好？

最後想講多一句，睡眠倒退期，並非真係倒退，反而係一個躍進，係因為BB喺生理或心理上達到一個新嘅里程碑，所以令睡眠受到影響。

所以，嘗試用正面啲嘅心態，去處理呢個時期啦！會過去的！

今日講到呢度先，如果你有任何經歷或感想同我分享，或者你正面對乜嘢睡眠問題，歡迎隨時搵我傾傾㗎！

Email：catherine@dolcesleepers.com
FB：facebook.com/dolcesleepers

Categories: 甜睡寶寶