好多人以為，只要日頭瞓少啲，夜晚夠攰就可以一覺瞓到天光。呢個係好常見嘅 #睡眠誤解

其實日頭唔瞓，夜晚勁醒大喊嘅情況，一般嚟講會更加嚴重！

咁有媽咪話嘞，氹極都唔瞓喎，或者瞓得一陣就醒，咁可以點？想囝囝囡囡容易啲瞓著，同埋可以瞓耐啲，其實有好多影響因素。今日先同大家講下 #時間因素

上次有幾位媽咪留言話：「經常過咗最大清醒時間」「清醒時間時長時短，攪到好易錯過最佳入睡時間」

呢個「清醒時間」究竟係乜嘢嚟呢？

清醒時間係指，由瞓醒開眼，去到合埋眼瞓著之間呢段時間。有啲媽咪話餵完奶後過一個鐘畀BB瞓，咁樣去計嘅話其實已經遲咗㗎嘞

隨住BB年紀越嚟越大，佢哋能夠支撐到嘅清醒時間會越嚟越長：

初生嬰兒： 45-60分鐘
3 - 5 個月大： 1.25 - 2 小時
6 - 8 個月大： 2 - 3 小時
9 - 11 個月大： 2.5 – 3.5小時
12 - 14個月大： 3 - 4 小時
15 - 17 個月大：3 - 4 小時 / 4.5 - 6 小時 (午睡1次)
18 - 24 個月大： 5 – 6小時
2 - 3 歲： 5.5 - 7 小時
3 - 5 歲 (午睡1次)： 6 - 8 小時（午睡前）/ 5 - 6小時（午睡後）
3 - 5 歲 (沒有午睡)： 12-13 小時

你會見到，每個年紀都有個range嘅，咁係因為一般嚟講，朝早嘅清醒時間會短啲，就寢前一段會最長。

之不過，當你囝囝囡囡已轉為只瞓一次晏覺，咁就會相反，朝早嘅清醒時間較長，就寢前一段較短。

一般而言，我哋會喺 #清醒時間完結前15分鐘開始哄睡或放床，畀時間佢哋慢慢平靜落嚟，迎接睡眠嘅來臨。

所以，如果你見夠鐘至開始氹你囝囝囡囡瞓，又會遲咗㗎嘞！

小睡系列

文章

小睡系列

Catherine Ma