如何解決厭奶問題

-->立即下載小冊子慢慢睇<--

好多時同媽咪爹哋傾睡眠問題時，會發現佢哋BB喺食奶方面都唔係好理想... 我曾經上網搵資料，同喺唔同嘅外國群組發問，但都未能夠得到肯定嘅答案...

直至遇到一本書，一本專門講厭奶問題嘅書，頓時茅塞頓開！呢本書深入解釋可能引致厭奶情況嘅各種原因，背後嘅因素，同埋解決辦法。

我抽出書中重點內容，編成呢本小冊子。所分享嘅資料，其他連全書內容十分一都冇，所以有決心去解決厭奶問題嘅話，我真係好建議去搵呢本書嚟睇，書入面有好詳盡嘅解釋，仲有FAQ，會講解埋點解似乎唔work嘅原因。

資料來源："Your Baby's Bottle-feeding Aversion: Reasons and Solutions" by Rowena Bennett

P.S. 其實書中所講嘅資料，都能夠套用喺加固問題上。所以如果你囝囝囡囡唔係好肯食嘢，呢本小冊子或者都能夠幫到你。

-->立即下載小冊子慢慢睇<--

點解BB會唔肯食奶？

原因有兩類：

1) 行為／心理因素 -> 食奶時有不愉快及感到受壓嘅經驗（沒有身體不適）

2) 生理因素 -> 生理問題或身體狀況而引致不舒服或痛楚

大部份厭奶情況，都係行為因素所致。

因為ＢＢ多次喺唔願意嘅情況下被迫食奶，久而久之，當預料到即將又係食奶時間（例如戴口水肩，或被抱到餵奶位置等），就會感到緊張及唔開心。

呢個其實係「愛你變成害你」嘅典型例子，因為照顧者怕ＢＢ唔食足夠嘅奶會有問題，所以就不自覺地強迫ＢＢ，結果造成反效果，ＢＢ越係被迫，就越唔肯食奶 😕

咁點解瞓著咗至肯食呢？

好多有厭奶情況嘅ＢＢ，只會喺昏昏欲睡，甚至已經瞓著咗時至肯食奶。其中一個原因係因為照顧者驚會整醒ＢＢ令佢唔再食奶，所以自然唔會夾硬嚟，一見到ＢＢ有少少反抗就會即刻停手。

除此之外，當ＢＢ瞓著咗，警覺性大幅下降，就唔會預料到平時食奶時所感受到嘅壓力，從而唔會勾起負面關聯而未開始食就已經反感。而且，瞓著時吸啜機能亦會自動開啟，所以就可以食得好好多（注意如果瞓著咗就得好，咁已經可以排除係生理因素令ＢＢ厭奶）。

瞓著餵奶，雖然能夠成功令ＢＢ有奶落肚，但唔單止無法解決ＢＢ清醒時唔肯食奶嘅問題，更加會令厭奶情況惡化…

令ＢＢ反感的餵奶行為

咁究竟邊種餵奶行為，會對ＢＢ造成壓力呢？注意就算係善意嘅鼓勵性行為，其實都一樣會令ＢＢ反感㗎！

束縛	限制ＢＢ頭部或雙手活動，令佢唔能夠擰開個頭，或用手推開奶樽。
強行塞個奶咀入口	ＢＢ可能會緊旦閉咀唇表示唔要食奶，或者灑手擰頭拗腰反抗，但仍然夾硬塞枝奶入去佢個咀度。
對ＢＢ嘅表示作出不恰當嘅回應	唔准ＢＢ吐出奶咀，或喺ＢＢ擰開頭或拗腰時，仍然擰住枝奶追住佢，嘗試隊入咀。（注意呢個情況同ＢＢ因為分心兩頭望唔同）。
嘗試令ＢＢ吸啜	例如輕壓臉頰或下巴部位。
不斷Chok或轉個奶樽	原意係希望ＢＢ繼續啜，因為咁能激起初生ＢＢ嘅吸啜反射反應。
將奶擠入ＢＢ口中	用軟身奶樽，針筒或匙羹。
詭計	先畀奶咀，ＢＢ吸啜時擰走換成奶樽。
分散注意力或娛樂	當ＢＢ扭計或開始喊，唔肯再食奶，照顧者會嘗試企起身餵，搖住餵，唱歌，行嚟行去，拎玩具逗佢，開電視或手機等… 雖然呢啲行為並非直接施壓，但其實仍然會令ＢＢ感受到壓力。
連續不斷試餵多次	當ＢＢ已經以行為表示唔要食奶，但照顧者仍然不斷隊枝奶過嚟，其實係一種滋擾行為，會令ＢＢ反感。

點解冇人同我講過餵奶壓力呢樣嘢？因為好多相關嘅專業人士，包括兒科醫生，健康院護士，言語治療師，物理治療師，營養師，仲有陪月等，其實都冇接受過嬰兒行為問題嘅相關訓練。

加上趕住睇完個症，於是當家長提出ＢＢ嘅問題，佢哋好多時會直接跳到去醫療因素，淨係識得開藥，或者建議轉低敏奶粉（按：提早加固亦係另一個常見做法，但1歲前應該以奶為主要營養來源，加上美國兒科醫學會嘅指引係滿６個月至開始加固，太早開始加有可能會引致超重甚至痴肥嘅問題）。

BB係一部自動卡路里計算器

ＢＢ之所以會感到有壓力，其實好多時都係因為照顧者覺得ＢＢ食得太少，於是就會有意無意，軟硬兼施，結果造成反效果。

咁點解照顧者會覺得ＢＢ食唔夠奶呢？主要係因為以下４個錯誤嘅認知所引致：

1) 照顧者被告知必須要求ＢＢ食到幾多奶

2) 過份高估ＢＢ所需奶量

3) 誤將生長放緩期當成ＢＢ體重增長不足

4) 誤以為體重增長不足（無論係咪真係咁嘅情況），係因為ＢＢ食得唔夠所致

雖然ＢＢ唔能夠自己拎嘢食，唔能夠決定食啲乜嘢，但佢哋其實知道自己幾時肚餓同幾時食飽，甚至係一部 #自動嘅卡路里計算器 -- 如果你加多匙奶粉落枝奶度整杰啲，佢係會自動食少啲架！

咁你會問，既然係咁，點解會厭奶呢？

因為，當ＢＢ對食奶反感，佢哋失去咗食嘢嘅欲望，於是就會忽略身體所發出嘅飢餓感訊息，只係食少少未夠飽都已經唔願意再食

出現呢個情況，係因為食奶呢件事對佢嚟講感覺太差，或者有太大壓力，並非因為佢唔知道自己身體究竟要食幾多奶。

要扭轉呢個情況，首先必須改變我哋作為照顧者嘅心態，認清自己喺餵奶呢件事當中嘅角色 。

加拿大營養師 Ellyn Satter 提出 Division of Responsibility 呢套理論：

- 照顧者負責決定ＢＢ食啲乜嘢

- ＢＢ有權決定食唔食，同埋食幾多

照顧者亦有以下嘅義務：

• 喺ＢＢ表示肚餓時餵食，如果ＢＢ冇明顯嘅肚餓跡象，就可以每隔一段時間餵
• 選擇合適嘅餵食工具，令ＢＢ能夠舒舒服服，以佢自己嘅速度去食；餵奶姿勢要有助ＢＢ有效吸啜食奶
• 喺一個能令ＢＢ保持專注嘅地方餵奶
• 觀察ＢＢ食奶時嘅行為，如果ＢＢ扭計唔願食，就要搵出原因，並作出恰當嘅回應

當ＢＢ表示已經食夠，就應該停止餵奶

記住，baby knows best，只有ＢＢ自己至知道佢身體需要啲乜嘢。

遺傳決定咗每個ＢＢ嘅身型及高度（有啲ＢＢ因為喺媽咪肚入面營養太好，所以出世時好重磅，但佢可能本身唔係大隻嘅ＢＢ），佢哋只會攝取身體所需要嘅能量，所以單單以體重去計算ＢＢ應該食幾多未必準確，而且唔同國家對奶量嘅標準亦都有好大分別。

相信ＢＢ呢種天生嘅能力，留意ＢＢ嘅飢餓及飽腹感徵兆，容許佢按照自己嘅生理需要去控制食慾以及卡路里攝取量，就能夠避免ＢＢ對食奶有負面嘅感受。

有一點要注意嘅係，如果你ＢＢ已經有厭奶嘅情況，咁就唔好期望佢會立即能夠自我調節食量嘞！

你可以做嘅，係畀佢有機會向你展示佢嘅能力，等佢克服咗食慾不振嘅問題先。當ＢＢ對食奶已經唔再反感，都仍然會需要一段時間，至會慢慢食多哟。只要佢開心活潑，咁就唔需要太擔心。

案例分享

喺分享解決厭奶方法之前，我希望先翻譯以下書中一個案例。

Cassie係早產BB，不過冇乜醫療問題，出院時亦都已經能夠順利用奶樽食奶。姑娘教Amanda媽媽點樣輕按Cassie嘅下巴，去觸發佢嘅吸啜反射，頭４個星期一直餵奶情況理想，可以食到醫院所指示要食嘅奶量。只不過，有時Cassie會噴射式嘔大量奶，但由於體重增長理想，所以醫生檢查後認為唔需要擔心。Cassie BB除咗食奶時會扭計之外，其餘時間都係一個開心嘅ＢＢ。

喺出世後大約６個星期（接近預產期），Cassie開始唔願意食奶，佢會啜啜吓頂返個奶咀出嚟。Cassie越唔肯食，Amanda媽媽就唯有花更多時間去迫佢食，至能夠食到姑娘所要求嘅奶量。Cassie嘅嘔奶情況越嚟越嚴重，醫生懷疑佢有胃酸倒流嘅問題，於是開藥，但情況並未得到改善。

之後幾個星期，餵奶情況越嚟越差。當Cassie去到３個月大時（更正齡），嘔奶情況更嚴重，醫生懷疑佢胃部有問題，於是再開另一種藥，加快奶從胃部排空嘅時間。嘔奶情況終於有所改善，但係由於Cassie所食嘅奶量下降，餵奶掙扎越嚟越激烈。去到Cassie４個月大，醫生再懷疑佢對蛋白質敏感，於是建議轉低敏奶粉。Cassie仍然唔願意食奶，而呢個時候嘅情況，已經變得非常惡劣。　　

當時，每當被橫抱到餵奶嘅姿勢，Cassie就會尖叫。結果Cassie連續２日完全唔肯食奶，要入院留醫。做咗好多檢查，都冇辦法搵出佢唔肯食奶嘅原因。於是，姑娘就教Amanda媽媽點樣迫Cassie食奶。由於Cassie完全冇表現出肚餓嘅跡象，醫生建議每３小時餵一次奶。

喺出院後２星期，Amanda媽媽搵作者求救，解決厭奶問題。Amanda媽媽嘅情緒受到極大困擾，唔願意再用醫院教嘅方式迫Cassie食奶。作者於是請Amanda媽媽示範醫院教佢嘅餵奶方式 -- 當夠鐘餵奶時，Amanda會將Cassie放喺一塊床單上，然後緊緊包住佢嘅手腳。Cassie知道即將會被包到實，於是開始尖叫，猛咁踢腳揮手掙扎。Amanda抱起被包實嘅Cassie，將佢個頭用手臂夾實，令佢唔能夠擰開塊面。Cassie繼續尖叫，於是Amanda能夠放到枝奶入佢個口度，但Cassie唔會合埋口，Amanda唯有改變姿勢，空出隻手去夾埋Cassie臉頰同下巴，再令佢上下顎郁動，令啲奶能夠流到入口。Cassie一直尖叫，Amanda呢個時候已經淚留滿面。為咗能夠完全瞭解個情況，作者請Amanda繼續示範…

Cassie掙扎咗10分鐘，然後突然靜咗，幾秒鐘內瞓著。入睡後，佢開始有節奏性地吸啜，５分鐘內食晒枝奶。Amanda拎走個樽，Cassie好快就醒咗，向住媽媽微笑。

作者睇住成個情況都覺得好唔舒服，Amanda同Cassie每日不斷重覆呢一件事，所面對嘅壓力實在無法想像。雖然能夠成功迫到Cassie食晒枝奶，但呢個做法無論對媽媽或ＢＢ，甚至爸爸嘅情緒都造成好大困擾。

最令人感到憂傷嘅係，呢個情況其實係唔應該發生嘅！作者問Amanda媽媽醫院叫佢餵幾多奶，計算後發現，要求奶量比Cassie實際上所需要嘅多咗好多！

原來 Amanda一直都唔知道，佢由 Cassie出世開始，就餵佢食太多奶。隨住Cassie長大，差距亦越嚟越大，於是Amanda迫Cassie食奶，令Cassie出現厭奶嘅情況，就算肚餓都唔肯食。Cassie一到餵奶時間就尖叫同掙扎，係由於長時間不斷被迫食奶所造成嘅壓力反應，並非因為佢有胃酸倒流嘅問題。

而Cassie一直大量嘔奶，正係因為被餵食太多奶，而非胃部出問題。佢嘅家族冇人有食物敏感嘅情況，喺轉低敏奶粉之前，Cassie亦冇出現敏感嘅症狀。佢出現腸胃不適嘅問題，唔係因為有蛋白質不耐受症，似係由於被餵食過量而引致營養過剩所致區多。

喺作者嘅協助下，只係２個星期，Cassie開始見到枝奶會感到興奮，而且亦都食得好開心，能夠食到佢身體真正需要嘅份量。佢可以食返普通奶粉，而且亦都唔再需要任何藥物嘞！

強迫餵奶並非解決辦法，反而會令情況更加惡劣。

解決厭奶５步曲

1) 做身體檢查
確保 ＢＢ身體健康，冇任何影響胃口或吸啜能力嘅生理問題。

2) 定下全盤計劃
兩星期內冇任何會影響大人同ＢＢ情緒嘅事發生（例如唔好同時進行睡眠訓練），每餐都喺屋企餵，盡量由同一位照顧者負責餵每一餐奶，尋求情緒及家務支援。

3) 增加ＢＢ食奶嘅意欲
停止瞓覺時餵奶，停止加固及親餵，停止用奶樽以外嘅其他工具餵奶（注意：停止親餵可能會令ＢＢ之後偏好樽餵，冇咁願意埋身）。

4) 畀ＢＢ做主導
停止迫ＢＢ食奶，亦唔去做任何鼓勵或安撫行為。

5) 注意ＢＢ嘅睡眠需要
攰得滯會影響胃口唔想食奶。 需要幾耐至能夠解決厭奶嘅問題？

要改變ＢＢ對食奶嘅負面感受，需要多次嘅正面經驗，至能夠令佢明白到唔會再有人畀壓力佢，令佢能夠安心，能夠放鬆落嚟，去享受食奶。

跟足書入面嘅建議去做嘅話，平均２個星期就能夠見到成效（由１-４個星期不等）。文章最後會有媽咪親身分享點樣14日解決BB嘅厭奶問題。

餵奶守則

1. 唔用任何方式強迫餵奶，或用呃呃氹氹嘅方式令ＢＢ食奶
2. 停止瞓著時餵奶
3. 只用樽餵，停止加固
4. 畀ＢＢ做主導，畀佢決定幾時食同食幾多，唔好跟鐘計，限死幾耐至餵一次

☆☆☆

有媽咪問，如果BB一喊就唔再餵，佢真係可以全日唔食奶喎

其實，到佢喊至停，可能已經遲咗。因為BB唔要（再）食奶嘅跡象係：

- 停止吸啜
- 用舌頭將奶咀頂出嚟
- 擰開個頭，或向後拗腰
- 用手推開奶樽
- 緊閉咀唇

所以，請恕我長氣再講一次...

要解決厭奶問題，必須要有破斧沉舟嘅決心。如果未有足夠決心嘅話，咁不如唔好開始住，否則試一日就放棄咁壓力同失落感會更大。

其實同做正式嘅睡眠訓練*去戒奶睡抱睡一樣，如果你見BB喊咗「好耐」就放棄，抱返或者餵奶，咁你即係train緊佢喊。咁樣做對BB嚟講其實更殘忍，因為佢係白白喊咗一段時間，冇得到任何進步或改善，甚至會覺得好混亂...

* 建議滿6個月大至開始做正式嘅睡眠訓練，畀BB練習自行入睡；0-5個月就可以畀佢嘗試自己瞓，唔得可以再抱，因為初生BB對入睡方式未太依賴，詳情喺「健康睡眠工作坊」有深入講解。

咁BB真係唔食，或食得好少，點處理好呢？

作者嘅建議係：

如果全日加埋未夠３００ｍｌ，咁就可以半夜清醒或瞓住餵１—２次，務求達到最低嘅奶量要求。

日頭食唔夠４１５ ｍｌ， 都可以瞓住餵一次，然後等佢自己醒再餵。

食到４１５ｍｌ或以上，未滿６個月或體重過輕嘅ＢＢ，可以瞓住餵１次，然後同樣等佢醒至再餵；６個月或以上就唔再需要瞓住餵，等佢自己醒就得。

守則其中一條係只能樽餵，但喺以上所提到嘅情況之下，半夜仍然可以親餵。

一般嚟講，只要能夠做到完全零壓力餵奶，頭３日係會食得少啲，但之後就會有改善。

BB主導餵奶法

好多人會將ＢＢ主導等同於demand feed，但其實唔係咁簡單：

• 有厭奶情況嘅ＢＢ，仍然會因為肚餓而喊，但餵又唔肯食，如果你見佢似乎係餓就餵奶，咁你就會全日不斷咁試餵，對ＢＢ嚟講會成為滋擾，更加反感。
• ＢＢ成日都會扭喊或啜手，未必所有情況都係因為肚餓所致。未瞭解行為嘅真正原因，次次都去餵奶，咁ＢＢ自然唔肯食，甚至會覺得有壓力。
• 有啲ＢＢ性格比較隨和，唔會明顯表達自己嘅需要。等佢表示餓至餵，會令ＢＢ隔太耐至有奶食。

咁定實隔幾多個鐘餵一次得唔得呢？

有厭奶情況嘅ＢＢ，會拒絕食奶或食得好少。如果要等夠鐘至餵，攪到佢餓得滯，心情更加唔靚，唔願意合作。

你需要喺demand feed同time-based feed之間取得平衡，視乎ＢＢ當時厭奶嘅程度去作出調節。

重點係先嘗試等佢表示肚餓至餵，例如唔駛朝早一起身就餵，可以等一陣，畀機會ＢＢ表示肚餓先。

如果過咗３０分鐘都未有任何表示，至嘗試畀奶佢。之後幾時再餵，應該視乎ＢＢ嘅情緒去決定，而唔駛睇佢上一餐食咗幾多。

如果ＢＢ心情一直ＯＫ冇扭冇喊，可以等到大概３小時後至餵。但如果ＢＢ瞓緊覺，就可以等佢瞓醒先餵都得（睡眠顧問建議：日頭每覺最好唔好多過２小時，否則日頭瞓得太多可能會導致日夜顛倒嘅情況）。

如果ＢＢ扭計或大喊，而你冇幾耐之前至餵完，就算佢上一餐食得好少，都要先等等，嘗試用其他方式去安撫佢（同埋諗諗會唔會係其他原因喊，例如攰想瞓覺，或者受刺激過度）。

因為如果你咁快又餵，佢拒絕嘅機會就會高好多。當然，如果試過其他方法，ＢＢ都仍然大喊，咁就即管餵佢啦。唔需要在乎幾時餵，最重要嘅係尊重ＢＢ拒絕嘅意願，唔好不斷試餵令ＢＢ反感。

至於夜晚幾時餵，就要視乎ＢＢ日頭食咗幾多。詳情請睇返上一章《餵奶守則》。

尊重BB

咁點樣為之尊重ＢＢ呢？

好簡單，問下佢囉！

你可以將枝奶放喺ＢＢ面前１５—２０厘米嘅距離，先等一等，觀察佢嘅反應，甚至問吓佢要唔要食奶。雖然ＢＢ唔識得講嘢，但佢會用身體語言話你知：

接受

- 望住枝奶
- 見到枝奶會興奮
- 擘大口
- 用手拎枝奶

拒絕

- 緊閉咀唇
- 擰開個頭
- 用手推開個樽，甚至打個奶樽
- 向後拗腰

初生ＢＢ或者未能夠將奶樽同食奶關聯起嚟，會一直大喊，直至你將奶咀放入佢哋個口。如果佢吸啜即係接受，擰開個頭或拗後即係拒絕。如果ＢＢ唔開口，你可以用個樽喺佢咀唇上輕輕點幾下，睇下佢會唔會開口。

記住當ＢＢ拒絕食奶，就要即刻停止，唔好諗住再試多幾次呀！你可以同佢講：「我見你未想食奶，冇問題，一陣至食啦！」

呢句說話，其實係講畀你自己聽嘅，係一個令你話畀自己知，要接受ＢＢ唔想食奶而做嘅動作，只要你繼續細心觀察ＢＢ，嘗試瞭解佢嘅諗法同感受，久而久之，就會自然好多。

最後，每次餵奶，都要做好心理準備會被拒絕。唔好諗住ＢＢ好耐冇食奶，或者上一餐食得好少，今次就一定會肯食。喺開始解決厭奶問題嘅頭幾日，ＢＢ可能需要真係好餓至會肯食架！

另外，之前講過，唔好不斷隊枝奶畀ＢＢ，避免令佢反感。咁每餐就只可以試一次？枝奶開咗唔飲好嘥喎…

有時ＢＢ可能並非真正拒絕，只係因為之前被迫食奶嘅不安感湧出嚟，所以食食吓會大喊。所以，為咗避免過早完咗餐奶，你可以每餐試２次，中間要相隔大概５分鐘，或者等ＢＢ情緒安穩返之後再試（但唔好超過２０分鐘）*。

如果ＢＢ有矛盾嘅表現，畀唔肯食，拎走又喊，咁都應該跟返同一個原則，應該立即停止，同埋最多試兩次就好。

你可能會諗，佢想要都唔畀佢，咁又點係ＢＢ主導呢？但如果佢每次喊你就畀返佢，咁你又會變成不斷去試餵，只會令呢個情況繼續纏繞落去。一般嚟講，跟住書入面嘅建議去做，到第5日呢個情況就會停止。

最後，補充返一點，回答好多媽咪嘅疑問先：

每餐奶應該要餵幾耐？（唔代表要試餵幾耐，唔食好停嘞！）

• ０-３個月：２０-４０分鐘
• ３-６個月：１０-２０分鐘
• ６個月以上：５-１５分鐘

如果你BB食奶時間遠超於以上標準，咁就要留意吓其實BB係咪唔想食，但你可能忽略咗BB畀你嘅訊息嘞！

* 食過嘅奶唔可以擺多過1小時，未食過嘅話，室溫最多2小時，放雪櫃可以擺24小時。所以唔好諗住呢餐食唔晒留返下餐呀！枝奶變咗味BB一樣唔會食，而且仲可能會引致腸胃不適。同BB相關嘅嘢，尤其食得落肚嘅，唔慳得呀！

恕我長氣再講多次 - 有決心去解決厭奶問題嘅話，我建議搵呢本書嚟睇，書入面有好詳盡嘅解釋㗎！

媽媽親身分享 — 14日內成功解決厭奶

Mandy媽媽：

我跟住本書做，好神奇，頭4日bb一路都好掙扎，又餓又厭奶，成日都喊下，發下脾氣，但一餵佢又唔肯飲即刻喊曬好激動。

神奇既係到左第5日好似本書所講，已經有明顯既改善，至少見到奶瓶已經冇再喊，每次都會乖乖張開口飲，雖然冇飲曬，但係已經飲返之前3份2左右。

之後5-10日，都基本上冇再為奶瓶喊過，但奶量就有d飄忽，到第11-14日基本上都已經完全恢復奶量，而且每次都10-15分鐘內飲晒！

有幾次我慢慢幫佢掃風仲我發脾氣，要我快d餵返佢

所以我真係覺得好work，不過要注意既係真係要好有決心，同埋放輕鬆去面對餵奶依件事，因為bb係感受到，飲奶應該係享受而唔係戰爭！

大家戒厭奶成功同埋要好好正視厭奶問題，因為bb 1歲前都仲係要靠奶為主，所以戒左厭奶後媽媽同bb都會輕鬆好多！

後話

有媽咪問：

「如果ＢＢ點都唔肯食可以點？其實有好多時係d周邊既人不停比壓力bb或者照顧者... 真係好難由bb主導飲奶，因為最後佢可能真係全日飲得好少，特別係當你每次去健康院... 」

的確，厭奶呢個情況，主因其實都係因為照顧者本身承受住壓力，所以無意地將壓力轉移到BB身上。

所以，要解決厭奶問題，心態最重要。

書中所建議嘅方法，係需要有破斧沉舟嘅決心至得。有時真係要去到無路可退，先至會願意走出呢一步，並且堅持落去。

我知好多情況因為BB瞓著就肯食，又或者可以開始加固，所以好多家庭對於BB厭奶嘅情況唔會太執著，未必會去諗應該點樣解決。

只不過，食奶與睡眠嘅關係相輔相承，BB要昏昏欲睡或瞓著至肯食奶，睡眠質素一般都唔會太好，甚至食完就醒晒瞓唔返。長期睡眠不足，BB情緒會變差，冇胃口食奶，或者好易食食吓發炆憎，咁亦會令餵奶更加艱難。

同樣地，肚餓嘅話BB好難會瞓得好。所以我明白點解會覺得唔能夠唔迫BB食奶，係因為怕會令已經唔係咁好啲睡眠情況變得更差...

喺呢個位，我只能夠講一句，無論要解決乜嘢問題，頭痛醫頭，腳痛醫腳嘅方式並非真正嘅解決方法。所以厭奶及睡眠問題必須同時去處理（但唔代表要即刻做睡眠訓練）。

希望BB瞓得好，最重要嘅係瞭解佢嘅睡眠需要，喺適當嘅時候就畀BB休息。

初生BB每次清醒只能支撐45-60分鐘，喺滿6個月之前，亦只能夠支撐到1.5-2小時。

如果超過咗呢個時間，BB仲未有得瞓嘅話，就會出現疲勞過度嘅情況。

初頭幾個月可能唔係好覺有乜嘢問題，BB一樣日夜都瞓得好。

但當進入4個月倒退期，BB嘅大腦發展成熟令睡眠模式改變，之前欠落睡眠債的話，睡覺問題就會開始一一浮現 — 入睡困難、小睡過短、夜醒頻繁等…

唔想咁樣，就要盡早做好準備…

以培養良好睡眠習慣為目標，無須睡眠訓練都能睡得好！ <- CLICK

Categories: : 自信父母