BB加固食得少點算好？點令小朋友肯坐定定食嘢？

之前曾經同大家分享過《厭奶系列》，收到唔少媽咪詢問有關加固嘅問題。

先講講我對孖仔嘅加固過程啦！

我對孖仔係33周早產嬰，佢哋更正齡滿4個月時，醫生叫我同佢哋加固，好囉試吓囉... 但好明顯佢哋未ready，所以我試咗幾日就停咗（之後畀個醫生黑我面）之後等多2個月，更正齡滿6個月再試過，佢哋就ready好多嘞！

意大利都興畀米糊，不過除咗用奶開之外，亦會煲蔬菜湯嚟撈。我自己試過味，其實勁難食...

Anyway，其中一個囝食得好ok，會追住嚟食。但另一個試一啖後，見佢面容扭曲覺得好難食，死都唔肯食第二啖。試咗幾日唔同嘅組合都係食一啖就唔理我，最終壓爛咗隻香蕉，佢就食到津津有味！

原來佢條脷好有要求，要真嘅食物至肯食（之後連整定嘅雪藏貨都唔肯食，要食新鮮整嘅，呢個係後話），於是我就冇再買米糊嘞...最初我都係一碗過，行冰磚派，加啲蔬菜冰或肉碎冰落去啲米度煲粥嘅。但因為我睇資料話其實白米營養價值唔高，淨係熱量高糖份高，所以要諗吓其他食物。

意大利人當然唔會餵粥，佢哋會餵pastina，一種細細粒嘅意粉，香港都見過有得賣，升級版就有星星粉。由於我自己食嘢係好嫌悶嘅，得粥同意粉唔夠variety，於是就學美國人煮cous cous（北非小米）。但cous cous調味唔係咁容易，我又係地獄廚神，煮完一大兜兩個仔都唔食，於是唯有學意大利人落芝士喺碗嘢度...

意大利其中一種baby first food係parmigiano，乜嘢嬰兒食譜都會落嚟調吓味嘅（即係平時食意粉會落嗰啲），但必須要熟成36個月至容易消化。除此之外，我亦經常會落robiola呢種軟身嘅芝士。任何食物落咗robiola，兩個都一定會食到見碗底。

過咗個零月，就開始畀啲手指食物佢哋。我好記得第一種畀嘅係蒸熟咗嘅甘荀，兩個都食得好開心！

最初只係當下午茶，畀啲蔬菜條、肉餅、薯仔餅等等佢哋食。見佢哋食得ok，就變成晚餐由得佢哋自己拎嚟食唔再餵。去到11個月大，就一日三餐都係佢哋自己食，我終於能逃出苦海唔駛再餵嘞！

好感動，原本一打二每日餵兩餐我餵到發癲，終於可以解放我開心到跳舞！

想囝囝囡囡食得好，其實同睡眠一樣，令佢哋鍾意食嘢，就自然可以輕鬆好多！

咁點至可以令BB對加固有興趣呢？首先係相信BB：

你知唔知道其實衛生署有好多相關嘅文章呢？（可惜有關嬰幼兒睡眠嘅資料嚴重不足，亦都唔係好update...）先quote當中一啲非常有用嘅部份，同大家分享：

寶寶會按自己需要調節食量

寶寶的生長必須要有足夠的營養，但吃得多不一定會高些。因為胎兒期間的發育狀況，特別是遺傳因素對生長有着重要的影響；餵得過量，容易導致肥胖和相關的健康問題。

- 寶寶的身體有內在調節的機能，會按生長的需要來調節食量，得到恰到好處的養分；

- 出生後首三個月，寶寶處於快速生長期，食量會增加得快；

- 快速生長期過後，寶寶的身體不需要那麼多養分，食量便會減少，有時甚至不願吃，但卻表現活潑。這些都是正常的情況。（按：所以如果誤以為BB食得少咗就夾硬餵迫佢食，就會攪到厭奶/厭食嘞...）

要讓寶寶健康成長，家長的任務是：

- 提供營養合適又安全的食物；

- 跟隨寶寶飽和餓的反應來餵；

- 寶寶的身體需要各有不同，不要與別人比較食量；

- 寶寶每餐、每天的食量都不同；

- 有時活動後要吃多些，有時玩得太倦，反而不願吃；

- 處於快速生長期的寶寶的食量會較平常多。

理想的餵食方式，是依照寶寶的飽餓反應來餵食，不必堅持寶寶每餐吃光同一份量的食物。

識別寶寶的飽餓信號

寶天生懂得分辨自己的飽與餓，因此吃多少應由寶寶主導；

- 大部分寶寶在15-30 分鐘內便吃飽；

- 寶寶會以下列各種行為來告訴你「我肚餓了」或「我吃飽了」！

肚子餓的信號

- 對食物表示興趣；

- 將頭湊近食物和匙羹；

- 身體俯向食物；

- 太餓時會吵鬧、啼哭。

吃飽了的信號

- 不再專心進食；

- 吃得愈來愈慢；

- 避開匙羹；

- 緊閉着嘴唇；

- 吐出食物；

- 推開或拋擲匙羹和食物；

- 拗起背。

提提你﹕寶寶吃飽了，而你仍要他繼續進食，會導致：

- 寶寶覺得進食不是輕鬆的事；

- 寶寶對「食」產生反感；

- 產生其他進食的問題，例如寶寶在吃奶和吃飯時與你對抗，因而吃得少，或因進食過量而引致肥胖。

資料來源：衛生署家庭健康服務《6至24個月嬰幼兒健康飲食 (1) 起步篇》

法國人點同BB加固呢？

好多時我哋煮嘢食，覺得係要落鹽落糖落豉油至有味，但畀BB嘅食物又唔敢落調味料... 其實BB嘅味覺好敏銳，只係落少少香料，或者改變煮法，對佢哋嚟講已經吸引好多。

記住，加固嘅目的係向BB介紹唔同嘅味道同質感，所以不在乎份量，而在乎變化。越早畀BB嘗試唔同嘅食物、調味同煮法，BB嘅接受能力就越高，而且亦能夠更加引起佢哋對於食物嘅興趣。雖然咁講，初初加固時，又唔駛即刻諗咁多調味方面嘅嘢嘅！

記得以前睇書讀到法國人幫BB加固嘅哲學，個中心思想我好贊同。

還原基本步，法式加固法嘅哲學就係畀BB品嚐食物嘅原始味道。所以喺啱啱開始加固時，佢哋唔會幾樣嘢撈埋，而係每次只畀一種食物，務求原汁原味咁畀BB食，等佢哋明白每種食物嘅特點。而且，法國父母嘅心態，係畀BB嘗試新嘅味道，所以食幾啖就已經足夠，唔會一嚟就一大碗放喺BB面前，覺得食晒至算叻（無怪乎法國人身型普遍都好苗條）唔將啲食物一碗過撈埋晒，其實仲有一個好處，就係能夠平分風險。

除咗粥仔，仲可以煮乜嘢畀BB食呢？

上面提到，一開始我都係煮粥仔，後來就畀埋意粉粒（pastina）同北非小米（cous cous）。喺配料方面，起初係上網學整冰磚嘅。不過因為我煮嘢食太地獄冇乜sense，唔知點樣配搭好，又冇理由餐餐掉舊robiola落去... 於是又上網搵吓食譜，甚至dl咗幾個app。

有一個我好常用嘅app，除咗會跟BB月齡建議菜色，幫你編埋meal planning之外，亦可以按照年齡、早/午/晚/小食、主要材料、甚至準備時間等等去搜索食譜，非常方便。呢個app仲有shopping list，睇中邊幾個食譜save低，之後一click就知要買乜。當然唔少得加固相關資料，每日睇一兩篇，學咗好多嘢！

［Janet媽媽分享：多謝你推介呀, 我啱啱download咗, 似乎佢哋嘅食譜多用唔同嘅seasoning, 又唔怕畀濃味嘢bb食, 煮法唔係淨係白烚或者蒸煮, 例如9個月會有咖哩食譜, 又會落薑落蒜, 你有炒嘅方法... 都俾我諗諗, 係咪可以畀我小朋友再擴闊佢嘅味蕾］

除咗app之外，如果你有上網睇食譜嘅話，應該有聽過Annabel Karmel，佢嘅網站可以搵到好多食譜，仲包括一家大細都啱食嘅菜色，同埋唔同節日嘅食品，好靚囉，啱晒有心機煮嘢食嘅媽咪爹哋（即係唔啱我）。雖然有啲要畀錢至睇到，但其實見到個名之後再search，都會搵到類似嘅食譜。

只不過，好多媽咪好有心機整五顏六色嘅食物畀BB，但BB都係唔賞面，可以點做呢？

當你將所有食物撈埋，如果BB唔願意食，咁就冇第二樣嘢可以畀佢，令餵嗰個沮喪，被迫食嗰個反感...

之前《厭奶系列》分享過加拿大營養師 Ellyn Satter 提出 Division of Responsibility 呢套理論：

- 照顧者負責決定ＢＢ食啲乜嘢

- ＢＢ有權決定食唔食，同埋食幾多

我明，講就容易，但BB唔食，冇嘢落肚之餘，又嘥咗啲食物，心態上好難跨得出呢步，好難放得開唔迫BB食...

所以，當你分開幾味上，咁一樣唔食，都仲有其他，營養均衡嘅一餐應該有蛋白質 (肉/魚/豆類)、澱粉質、蔬菜同生果，至少有四樣嘢，點都有一味啱食啩！例如，喺開始加固大約1-2個月後（甚至更早），除咗平時加固會畀嘅粥仔一類要餵嘅食物外，仲可以準備一啲BB可以自己拎住嚟食嘅蔬菜或生果，或者麵包都得（外國人點會餐餐食飯呢？），手指食物係加固必須要有嘅原素，唔係淨係行blw至會畀BB自己用手食㗎！

係呀，生果其實可以同其他食物一齊上，唔一定要食完至有，或者喺其他時間食。或者你會諗，畀咗生果佢先，食完飽咗仲點會肯食其他嘢呢？咁當然你可以控制份量嘅，你成隻牛油果隊畀佢，咁就梗係冇胃口食其他嘢啦！（不過其實食晒成隻，都叫有嘢落肚，而且牛油果營養價值好高，比食粥更好）當BB開始有意欲自己拎啲嘢嚟食，慢慢就可以變成一碟4道菜嘅餐盤，就好似以下幾幅外國1歲小朋友嘅餐盤咁：

懶人煮食法

要提高BB有嘢落肚嘅機會，可以將一餐嘅食材分開上，而唔好煮埋一碗。呢個做法，除咗能夠「分散風險」，而且明顯有唔同顏色，擺盤會靚啲，喺感覺上亦都冇咁overwhelming... 見到咁大碗粥，未食已經飽咗囉...

你可以買個分成幾格嘅餐盤，甚至我見有人用muffin盤，或者唔同顏色嘅cupcake兜（留言有相），都已經能夠令個擺盤升呢，大大提升小朋友嘅食慾~~~

畀多個貼士大家啦，如果希望小朋友營養能夠均衡啲，可以一餐分開幾個round，第一round每樣只係2-3啖，一來唔會咁overwhelming，小朋友會願意食啲，而且容易啲食晒，心理上都滿足啲。食完第一round，就可以隨佢意願添食，鍾意食就食多啲，唔鍾意食嘅亦唔會因為上咗碟而嘥咗，可以加料之後畀大人食都得！

或者你又會話，平時煮一碗嘢都諗到頭痕，分開煮咪即係煩多幾倍？

我除咗冇煮嘢食嘅天份外，亦都冇乜美術天份，所以從來唔會將啲食物變成動物呀圖畫呀咁。咁點樣可以輕鬆地餐餐煮幾道菜都唔會諗到頭爆呢？

係時間分享我嘅懶人煮食法嘞！（講明先，如果你熱愛煮食嘅話，呢個方法未必適合你，而且我諗你其實都未必需要）

我條方程式係：

➡️ 食材 x 香料 x 煮法以下係屋企常有嘅食材，另加其他季節性食品

🥩肉類：雞胸、豬扒、牛扒...

🥦蔬菜：翠玉瓜、甘荀、西蘭花、菠菜、蕃茄、青豆、粟米...（香港嘅選擇比我呢邊多好多）

🥖澱粉質：米、意粉（不同形狀）、麵包、多士、米餅、薯仔、蕃薯、酥皮、Grissini...

🌿香料：羅勒、迷迭香、奧勒岡、紅椒粉、咖哩粉、洋蔥、蒜頭...

👩🏻‍🍳煮法：烚、蒸、焗、煎...

每日開餐前1小時，我打開雪櫃，拎一種肉類、一種蔬菜、再決定一種澱粉質。

1歲前未能夠成舊肉食，煩少少要掉落攪拌機攪成肉碎、然後加一種香料、雞蛋、parmigiano、麵粉/麵包糠/熟薯仔（有時可以加啲蔬菜添），攪埋一pat後再整成圓形、長條形、三角形，最後拎去蒸/焗/煎... 咁樣配搭，仲有唔同嘅比例，其實已經可以有幾十款主菜嘞！

至於蔬菜，通常我都係原汁原味咁上碟，連煮法其實都冇乜點變化，細個蒸多啲，大個就焗，焗完迫咗蔬菜嘅甜味出嚟，已經好好食，乜都唔駛落。

澱粉質基本上變化冇咁多，不過薯仔其實都可以玩唔同嘅切法拎去焗，酥皮都得。我雖然唔係行blw，但都好鼓勵畀機會BB練習自己拎嘢食。半餵半自己食嘅做法，其實由8-9個月左右已經可以開始，最後過渡到1歲完全自己食。畀手指食物BB自己拎嚟食，能有助鍛鍊手指靈活度，而且亦能令BB更能享受進食嘅樂趣，並增加BB嘅自主度同信心。

最後再推介一下美國人用嚟提高BB食慾嘅方法，就係畀唔同嘅沾醬佢嘞！簡單嘅可以開盒希臘乳酪，或者打爛半隻牛油果，有心機嘅可以整hummus或各種五顏六色嘅沾醬。小朋友唔肯食蔬菜嘅，加啲沾醬就好味得多，肉餅亦可以冇咁乾身。

用上面條方程式，加上唔同嘅沾醬，諗餐單仲駛乜煩呢？

從小培養良好飲食習慣

好多媽咪爹哋會話：我已經整好多唔同嘅嘢畀佢食，但其實我覺得佢係好唔專心囉，只係貪玩，搵啲嘢引佢咁佢又會肯食，咁即係未飽啦！

請先想像，繼續而家嘅做法嘅話，一年後囝囝囡囡食飯嘅情況係點呢？電視送飯？繼續扮飛機逐啖餵？拎住隻碗追住佢嚟餵？食零食/飲奶飽？

除咗諗點樣令小朋友願意開心食嘢之外，我哋亦需要幫囝囝囡囡自小培養良好用餐習慣。

RIE育兒法嘅建議做法：

1) 預先講定你嘅期望食飯時必須坐好，食完至可以離開；家長決定食乜嘢，小朋友決定食唔食同食幾多。

2) 100%專注坐喺囝囝囡囡身邊，睇住佢食，令用餐時間成為親密，有互相交流嘅時間（RIE建議等BB大個啲至同大人同枱食飯）。

3) 離開坐位代表食完見到小朋友有想離開嘅動作，提醒佢走開就等如話你知佢食完，會即刻收枱（BB掉食物落地，亦代表佢食完，唔好等佢掉到成地都係，然後你激氣到爆炸呀！）

4) 保持冷靜，貫徹始終唔肯食嘢唔需要勞氣，亦唔需要同佢講數，話明走開會收枱就要做，咁至能夠畀到清晰嘅訊息佢。

5) 肯定囝囝囡囡嘅感受「你頭先離開座位係話畀我聽你食完，而家你改變主意想坐返低繼續食，但已經冇得再食，所以你覺得唔高興。下一餐會再有其他嘢食㗎嘞！」

6) 相信孩子相信你囝囝囡囡係有能力集中精神食飯，而且有能力自己食唔駛一定要人餵（唔一定要blw，就算係餵食都需要畀手指食物佢練習）。請相信佢啦！

資料來源："Eating Isn’t Ours to Control – How One Parent Replaced Fear with Trust"