點樣至能夠令BB得到安全感？

孖仔媽媽 Catherine Author

Dolce Sleepers 有提供安全圈小組課程，2月課程現已接受報名！

睇得Dolce Sleepers呢個專頁嘅媽咪爹哋，我相信亦都有睇其他育兒相關嘅資訊，學習點樣同BB／小朋友相處。之不過，睇睇埋埋好多唔同嘅育兒建議，會發現當中可以有好唔同嘅講法...

最常見如BB喊抱唔抱，有人話要畀BB安全感，亦有人認為喊就抱會寵壞BB，從此成日都會要抱...

而且，好多時從各個育兒專家學返嚟嘅招數，可能只能喺某特定情況下至用得著，其餘時間都仍然係束手無策... 於是，大家喺學習點樣為人父母嘅過程中，都會好似幅圖咁樣，會覺得好亂，兜嚟兜去...

安全圈養育課程

安全圈養育課程嘅目的，就係為父母及照顧者提供一個roadmap，令大家能夠有一個全面啲概念，知道點樣去作出最恰當嘅處理／回應方式。就好似一盒砌圖咁，當你望住盒面幅圖，你就能夠知道點樣去逐步砌好幅砌圖。

所以，你需要嘅其實未必係更多招式，而係明白到，其實你已經識得好多招式，你需要嘅只係整理好你腦入面嘅資料，咁就能夠自然出招啦！

安全圈養育課程所講嘅，其實係瞭解到你自己同其他人之間嘅關係（包括你嘅囝囝囡囡）

作為大人，我哋嘅角色，係成為BB／小朋友嘅安全基地及安樂窩。希望你嘅BB／小朋友能夠得到充足嘅安全感，你：經常需要：更大、更強、更有智慧，及更仁慈喺可以嘅時候：依從BB／小朋友嘅需要喺有需要時：取回主導權。

注解：我哋要同時成為小朋友嘅安全基地（secure base）及安樂窩（safe haven），仲要成為holding hands。我哋要support小朋友想探索嘅慾望，並喺佢有需要得到安撫時歡迎佢返嚟，加上bigger, stronger, wise and kind嘅態度。

生仔要考嘅牌，唔係讀書就可以合格，必須要落手去做至得。有咗roadmap同清晰嘅概念，你就能夠從一次又一次互動中，逐步掌握最理想嘅做法。

育兒方式與成長經歷的關係

每個人嘅育兒觀，對唔同情況嘅睇法及處理方式，都可能會有所不同。之不過，有一個共通點係 -- 每個人都受自己成長期間，被養育嘅方式所影響。可能父母嘅某個特質，令你成為父母時希望自己都會擁有。但亦有可能，自己父母嘅一啲做法，令你決心要作出相反嘅選擇。只不過，好多時都唔係咁容易...

因為，我哋喺潛移默化之下，即時反應往往都係自小被教導嗰一套方式。要擺脫呢個束縛，我哋需要特別用力...#安全圈養育課程嘅目的，就係教我哋點樣有系統咁去改變我哋對自己同囝囝囡囡嘅固有觀念。

即係點樣呢？就係從細心觀察著手，亦即係 #RIE育兒法好強調嘅observation。

✅ 先觀察，再作定論。

❌ 而唔係先作出定論，再透過有偏見嘅眼鏡，去判斷行為嘅目的。

舉個簡單例子：

當我哋認定一個小朋友好曳唔聽話，就會覺得佢成日攪攪震搏取注意（attention seeking）。但當我哋觀察到，小朋友喺作出不當行為之前所發生嘅事，或者得到嘅定論會變成 -- 小朋友覺得不安，佢嘅行為係希望有人會關注到佢嘅需要（connection seeking）

當父母本身有一定程度嘅敏銳度，喺回應BB時會更易得心應手，更容易明白到BB嘅需要，同埋點樣可以安撫到BB。但係有啲人，可能正正受成長方式所影響，又或者性格原因，令佢哋比較難去感受到BB想表達嘅意思，於是喺同BB連結嘅時候，就會遇到更多障礙。

喺安全圈養育課程，你會有機會從一次又一次嘅睇片做Seeing and Guessing練習中，就能夠有效逐步提升我哋對BB嘅觀察力同洞解能力，從而知道點樣嘅回應方式，至係真係幫到BB，令佢得到充足嘅安全感。

Dolce Sleepers 有提供安全圈小組課程，2月課程現已接受報名！<-- click

有時唔能夠即時回應BB，會影響安全感嗎？

BB係咪能夠有足夠安全感，係好多媽咪都好關注嘅一點。於是，見到BB喊，就會覺得需要諗方法去停止哭泣，令BB開心返，咁樣BB至能夠感受到被愛，有安全感。

的確，當BB喊嘅時候，需要我哋嘅回應同關注。但用盡方法去停止哭泣，係咪真係幫到BB呢？

安全圈養育課程提出BB有10種需要，其中一種叫「整理我的情緒」（Organize my feelings）

要真正幫到BB，我哋需要陪伴住BB，並且調整自己去配合BB嘅情緒（attunement），同佢一齊渡過情緒風暴（同在 — Being With）

之不過，我哋冇可能做到24小時，無時無刻都可以即時回應到BB，或者有時間去陪住佢。另一方面，亦有人話唔可以見BB一喊就抱，會寵壞BB... 咁點好呢？抱驚寵壞，唔抱又怕唔夠安全感，自己亦有其他事要做，點至搵到個平衡呢？

點樣至能夠確保，BB能夠同我哋建立到安全型依附關係呢（secure attachment）？

研究指出，其實只要我哋嘅回應率達到30%，就已經足夠（good enough）。

只係30%！

註：作為睡眠顧問，經常有媽咪問，做睡眠訓練時BB會喊，好驚BB會失去安全感。上完今日呢堂，我可以更肯定咁講，BB嘅安全感其實係唔會因為你未有提供即時安撫而受影響，因為日頭仲有好多其他時候，你會可以陪伴BB，回應到佢。相反如果大人瞓得唔好情緒差，其實反而會對BB造成負面影響... 再講，做睡眠訓練唔代表你一定要離開睡房，你絕對可以喺房陪伴BB。而且，睡眠訓練亦非戒抱睡奶睡嘅唯一方法。

伸延閱讀：睡眠訓練，真的幫到我和孩子嗎？（點擊下載免費小冊子）

鯊魚音樂與錯誤線索

應該所有父母，都希望能夠令BB得到足夠安全感，能感受到被愛 💕

之不過，安全感唔係話抱多啲陪多啲就得。因為，我哋首先必須認清BB／小朋友嘅「真正需要」，至能夠「真正滿足」到佢哋，幫佢哋建立安全感。

之不過，我哋好多時都會受自己嘅成長經歷所束縛住，令我哋無法認清BB嘅真正需要，從而作出恰當嘅回應。

安全圈養育課程稱呢啲喺無意識下出現嘅不安感覺為「鯊魚音樂」🦈 一種會阻礙我哋認清BB嘅真正需要，以及同BB connect嘅障礙。

而呢啲鯊魚音樂，BB都會聽到！

於是，因為感覺到我哋嘅不安，於是BB會刻意避免trigger到我哋，結果對我哋發出錯誤嘅線索，令我哋更難明白BB嘅需要。

舉兩個例子：

好多媽咪都話小朋友好痴身，去到公園都唔肯自己去玩。只不過，其實好可能係大人嘅身體語言，傳達畀小朋友嘅訊息係 -- 我唔安心放手畀你離開我，自己去探索。於是，為咗避免令我哋不安，小朋友就算想去玩，都就會不斷返嚟我哋身邊...

另一個情況係，有啲媽咪會話，BB喊要抱，然後抱上手後又喺度掙扎撐嚟撐去，都唔知放低好定繼續抱好。呢個情況好可能又係我哋嘅身體語言，令BB知道我哋對佢嘅情緒感到不安，唔知點安撫至好，於是為咗避免trigger到我哋，BB就唔想再被抱住。但因為BB嘅需要係受到安撫（comfort me），於是放低冇耐又會再喊過，不斷循環...