奶咀，到底係育兒好物，定係睡眠問題嘅幫兇？

Catherine Author

應唔應該畀BB用奶嘴，係一直令眾多家長爭持不休嘅問題（之一）。要作出最合適BB嘅選擇，就要先瞭解使用奶嘴嘅利與弊。

奶嘴的利與弊

好處：
• 有助減低發生嬰兒猝死症（SIDS）嘅風險
• 滿足BB需要吸啜嘅慾望
• 有助BB平靜落嚟，幫助入睡

壞處：
• 可能令初生嬰兒將乳頭及奶嘴混淆，無法正確吸吮母乳
• 提高感染中耳炎嘅機會
• 令BB對奶嘴產生依賴，冇奶咀就無法安睡
• 每日長期使用，會影響上下頜骨嘅發育，並導致上下牙齒咬合不正

咁到底應該用定唔用好呢？呢個實在係家長嘅個人選擇，但有一點要注意嘅係，千祈唔好濫用奶嘴，每當BB喊嘅時候就將奶嘴塞入BB口度。

哭泣與奶咀

聽到BB喊，我哋往往希望能夠立即安撫BB，用盡任何方式止住BB嘅淚水（例如扮鬼臉、唱歌跳舞、畀玩具等）。

在照顧初生BB時，奶嘴往往係最輕鬆同有效嘅方法，令BB立即安靜落嚟。但係，初生BB年紀仲細，無法清楚表達自己，只好通過哭泣同我哋溝通，表達自己嘅需求及情緒。BB一喊，我哋就塞奶嘴，會阻止咗同BB作進一步溝通嘅機會，亦無法搵出BB喊嘅真正原因。

如果唔打算用奶嘴，咁點樣能令BB學識自我安撫呢？

BB嘅手指，係最方便嘅安撫物。手指永遠唔會遺失，唔會喺BB熟睡時跌咗，而且何時何地都可以「拎」來用。最重要嘅係，手指是屬於BB自己嘅，佢會自己發現呢十隻手指，學識點樣去用，並且能自行決定何時需要用 – BB擁有完全嘅控制權。

食手好難戒？

有家長會擔心，要戒奶嘴掉咗佢就得，戒手指會難好多喎...

首先，口腔期會食手或將所有嘢放入口係好正常嘅事，唔需要阻止呀！而且，BB對手係佢探索同認識呢個世界嘅媒介，戴住手套感覺冇咁敏感，亦冇咁真實。

另外，食手其實一般係易戒啲㗎，因為大個對手要用嚟玩，自然就唔得閒啜。但奶咀可以一邊玩一邊食，而且奶咀好多時會成為睡眠問題，跌奶咀就一晚醒幾次… 但係手唔會跌，又隨時可以搵到，所以食手係好好嘅自我安撫方式嚟㗎！

大人會覺得戒奶咀易啲，因為大人諗住自己可以控制得到畀唔畀，但手就無法控制得到。但喺我遇過嘅case當中，能夠有決心掉晒唔再畀奶咀嘅機會率，其實可能只得10%... 因為BB慣咗有奶咀，所以唔知有其他自我安撫方式，於是大喊停唔到。而大人見到個BB勁喊亦唔識點處理，於是最後都係唯有塞返個奶咀...

喺考慮過利與弊後，如果你決定要畀奶嘴BB，就必須注意各項安全守則。

使用奶咀的安全守則

畀唔畀BB用奶嘴，係家長嘅個人選擇。喺衡量過利與弊之後，如果你打算試一試的話，就要注意以下幾點：

餵母乳的話，最好等BB大概3-4周大，識得正確吸吮母乳後，至唔怕佢哋會將乳頭及奶嘴混淆
唔好每次BB喊，就立即塞奶嘴，而且應該喺BB食飽後至畀，唔應該用嚟拖延餵奶時間
選擇矽膠製奶嘴，而且唔好購買由兩個部分組合而成嘅奶嘴，以免奶嘴斷開令BB嗆到而釀成危險
如果BB對奶嘴冇興趣，唔好強迫佢
如果BB瞓著之後跌奶嘴，唔好立即再塞返入去
保持奶嘴乾淨，喺BB滿6個月大之前，必須經常以高溫消毒殺菌
千祈唔好將跌咗落地嘅奶嘴放入自己口「清潔」，因為你口入面嘅細菌，恐怕比地下更多
唔好喺奶嘴塗上任何甜嘅嘢，企圖吸引BB吸啜，尤其是蜜糖。一歲前嘅BB唔可以進食蜜糖，以免引起肉毒桿菌性食物中毒
使用合乎BB年齡嘅奶嘴，並經常檢查損耗及作出更換
千祈唔好將奶嘴扣喺可能纏住BB頸部嘅長帶上，以免釀成危險

呢幾款奶嘴都可能有潛在風險

「你BB嘅奶咀係乜嘢款式？」

如果係兩隻唔同物料/顏色痴埋嘅話，就要留意嘞... 必須確保，個奶咀唔會一分為二！

美國一個奶咀牌子，曾經回收咗超過333,000個奶咀，因為個矽膠啜咀會甩出嚟，有機會令BB哽親！其實今次都唔係第一次出現呢個情況㗎嘞，所以為安全起見，最理想係買一舊過嘅奶咀，咁無論BB點啜或跌幾多次，都唔怕會成個甩出嚟。

奶咀可以係一件好好用嘅安撫工具，只要我哋唔好濫用嚟令BB「收聲*」，淨係瞓覺時至畀佢用嘅話，其實本身問題不大。但當然，如果BB需要你做奶咀專員，成晚不斷執返畀佢嘅話，咁奶咀就會成為一個睡眠問題。

一般而言，大部份BB去到7-8個月大，已經有自己執返個奶咀嘅能力。只要佢夜醒識得自己執奶咀啜住瞓返，咁大人就可以輕鬆好多。

［睡眠調整全面睇］嘅其中一個bonus -- ［安撫工具］，就有講解點樣一步步，畀BB知道原來佢可以自己執返個奶咀，唔駛次次都大喊求救。大人唔再需要半夜回應，幫佢瞓返，就等如BB能夠一覺瞓到天光啦

一晚跌幾次奶咀點算好？

奶咀有助入睡嘅話可以用，但當BB半夜不斷因為跌奶咀而醒，咁奶咀就變成咗睡眠問題，需要解決嘞！

如果BB未滿6個月，一般嚟講對奶咀嘅依賴度未太重，所以建議索性唔好畀佢用，畀機會BB搵另一種自我安撫嘅方式，例如啜手指或搖頭等。尤其是如果BB不斷吐返出嚟，就無謂勉強塞入去嘞！

Yoyo媽媽一日就已經成功，幫當時4個月嘅BB停止用奶咀：

「我聽取咗你嘅意見，無再俾奶咀，同埋放手俾佢揾自己舒服嘅姿勢瞓… 結果佢用左一日，就改左用手指自我安撫，我唔洗再半夜執奶咀！同埋俾佢係安全環境下翻身，佢依家變咗個愛趴睡的寶寶，好多謝你嘅意見。」

伸延閱讀：《用咗一日，就唔洗再半夜執奶咀》

不過，如果BB已經對奶咀有一定依賴，冇咗瞓唔到嘅話，你有兩個選擇：

戒
鼓勵BB學識自己執奶咀（「睡眠調整全面睇Bonus內容」）

何時應該戒奶咀

長期使用奶嘴，好可能會對BB嘅口腔發展及牙齒造成影響。所以，好多家長都想知道幾時應該停止使用奶嘴。

根據美國兒科醫學會嘅建議，BB滿6個月大時就應該減少或停止使用奶嘴，以減低患上中耳炎嘅風險。在這個時候戒奶嘴亦最容易，因為BB喺9個月大就會開始對奶嘴有所依賴，要戒就得面對較大阻力。

如果只係使用奶嘴幫助入睡的話，最遲亦應該喺3歲時戒奶嘴。這個時候，小朋友在情緒上較為容易放手。

點樣可以戒奶咀？

有啲人教剪爛個奶咀，千祈唔好咁做呀！小朋友已經有牙，咬個爛咗嘅奶咀，有可能會將奶咀咬得更爛，甚至甩咗一舊出嚟，萬一小朋友吞咗有可能會窒息，非常危險！

喺2歲之前，其實冇乜辦法可言你可以戒咗日頭玩嘅時候唔用先，之後至戒瞓覺。你亦應該預先同囝囝囡囡講清楚個情況，畀佢哋有個心理準備。之不過，點都預咗至少有3日會需要多啲時間至瞓得著（記得預早少少畀佢瞓），但捱過咗就會好。而且，最好就係掉晒屋企所有奶咀，要有破釜沈舟嘅決心至得！

小朋友大個啲嘅話，你可以同佢一齊做一套儀式，將所有奶咀放晒喺一個盒入面，開個歡送會，多謝奶咀一直以嚟嘅陪伴及安撫，甚至可以影相留念。然後就視乎小朋友嘅興趣或偏好，決定奶咀嘅「去向」。喺戒奶咀初期，囝囝囡囡會感到失落，係好自然嘅事。請避免否定或忽視佢嘅感受，佢需要你留喺佢身邊，表示同情，給予支持。你亦可以建議畀佢揀一個安撫公仔陪睡。

至於希望令BB識得執奶咀的話，一般大概7個月左右就已經可始畀佢練習。重點係要令佢有自己執嘅意願，同埋增加成功率。詳細做法，喺「睡眠調整全面睇 (link)」網上課程嘅BONUS教學影片有講解。