幾時可以戒夜奶？點樣可以戒夜奶？

孖仔媽媽 Catherine Author

坊間一直流傳好多令BB瞓得 「好」嘅方法...

之所以括住個「好」字，因為好多人只會覺得，快啲令BB戒到夜奶，大人可以唔駛半夜起身湊B就已經叫做瞓得好... 於是，好多人都諗住，想BB可以瞓過夜，唔會半夜起身食奶，畀佢遲啲瞓就得。

「半夜12點瞓到第二朝6點，掂啦！ 」我相信好多媽咪都曾經聽過陪月姨姨咁樣教...

係，對大人嚟講，連續瞓到6個鐘的確算係咁。對初生BB嚟講，連續6個鐘唔駛食奶，似乎亦好理想...

過早戒夜奶，反而瞓得唔健康

其實，初生BB本來就冇日夜之分，每隔2.5-3小時就要食奶，食完好快又要瞓過，所以都冇一定話夜晚幾點就要瞓長覺（都要分㗎其實，但唔係以睡眠時數為準，係以周邊環境狀況區別，呢度又涉及另一個睡眠誤解）。

對大人嚟講，瞓到6-7個鐘係好理想... 但BB需要比大人瞓多好多，夜晚瞓唔夠10個鐘，唔單止叉唔夠電，對BB嘅大腦及身體發育都會有負面影響！尤其是當踏出初生嬰兒期（a.k.a. 4個月睡眠倒退期），如果繼續用返處理初生BB嘅方式，由得BB夜瞓，積落嘅睡眠債，遲早都要還。

於是，好多喺頭3個月已經「戒夜奶」嘅BB，會喺4個月大後突然開始半夜不斷醒咗爆喊瞓唔返，甚至開始要食返夜奶，就係呢個原因。

其實，好多BB去到6-9個月大，生理上已經可以連續瞓到11-12個鐘唔駛食奶。但由於習慣夜瞓嘅關係，令BB根本冇機會可以瞓到咁耐，久而久之大家就覺得，BB朝早5/6點起身（早醒），食餐奶跟住再瞓到10點11點係正常嘅事...

其實咁做，BB嘅睡眠質素並唔好，絕對唔係健康嘅睡眠習慣，對BB嘅身體及大腦發育都會有負面影響。而媽咪每朝都要5/6點起身餵奶，講緊唔止係幾個月，可能係1年2年嘅事。就算可以瞓得返 ，都好辛苦呀！而且仲要日日湊到半夜，冇得抖冇晒me time，開頭或者覺得係要犧牲。但久而久之，壓力越嚟越大，又預料唔到情況幾時會有好轉（更慘嘅係一時好一時差，不斷喺希望同失望之間反覆糾纏…），對情緒以至親子關係都會造成負面影響…

所以，因為想早啲同BB戒夜奶，結果無意間令BB養成唔健康嘅睡眠習慣，導致長遠嘅睡眠問題，實在得不償失...

而且，就算BB唔駛食夜奶，亦不等如就唔會再夜醒太喊，可以一覺瞓天光！

幾時可以戒夜奶？

首先，要瞭解「夜奶」嘅定義：

夜奶嘅定義，係BB喺夜間睡眠時段內所食嘅奶，包括dream feed、以及晨早5/6點食完奶就即刻瞓返，其實都算係夜奶（P.S. 5/6點食呢餐奶亦稱為早奶，長期餵早奶係其中一個最難解決嘅早醒成因）。

BB出世時個胃好細，每次食量唔多，所以頭幾個月需要食奶食得密啲係正常嘅事。喺BB滿6-8個月之前，喺夜間睡眠嗰10-12小時內，大部份仍然需要1-3次夜奶，而第一次夜奶，可以用dream feed嘅方式去餵。

Dream feed嘅意思，係喺BB仍然瞓住嘅狀態下餵奶。你可以畀BB早啲瞓咗先，然後喺自己瞓前再餵BB食一餐奶，咁就可以同時滿足到BB嘅睡眠需要，大人又唔駛咁辛苦半夜起身啦！而且，擁有充足睡眠嘅BB，睡眠問題會少好多，瞓得好心情同胃口都會好啲添呀！

大部分BB喺6-9個月大之間，就會開始唔需要再食夜奶，最遲去到1歲，生理上就唔再需要夜奶。意思即係話，過咗1歲，半夜餓醒嘅機會已經好微，夜醒一般係由其他因素所引致 (link)。

如何判斷BB可以戒夜奶？

有位媽咪同我講，有睡眠顧問話佢14個月大嘅囡囡係因為肚餓而醒，叫佢加返dream feed同夜奶（係，個小朋友已經停咗好耐唔駛食...）好彩嗰位媽媽自己都有啲sense，覺得唔對路冇聽佢講咁樣做，否則就...

畀枝奶囝囝囡囡幫佢瞓返，其實不單止冇真正解決到個問題，甚至會造成更難攪嘅睡眠問題 -- 習慣性夜醒。

點知係咪習慣性夜醒呢？如果你囝囝囡囡半夜醒咗要奶，但係...

1. 啜幾啖就瞓返，然後好快又再醒過
2. 食完都仍然瞓唔到（無論係大喊或喺度玩）

係咁肚餓應該就唔係夜醒嘅原因嘞，你再繼續畀奶佢，就只會令問題惡化。

咁喺1歲之前呢？點知佢係咪真係餓醒？如果你囝囝囡囡...

1. 夜醒後喊好耐，點都瞓唔返 +
2. 畀奶佢會認真地食好多 +
3. 食飽後好快瞓返，唔駛你點幫佢 +
4. 之後能夠連續瞓到至少3-4小時

有一點要注意嘅係，如果你囝囝囡囡一向日頭唔係好肯食奶，要到夜晚瞓到矇矇矓矓至肯食，而且食好多嘅話（次數及奶量），呢個情況稱為Reverse Cycling。呢個係睡眠大忌嚟，必須要立即處理至得呀！至於應該點處理，就需要視乎情況而定，有需要歡迎隨時搵我傾傾！

我都唔想繼續畀夜奶，但唔畀佢就唔肯瞓呀...

有媽咪問：「囡囡已經1歲嘞，仲未戒夜奶... 究竟係BB問題，定係家長嘅問題呢？可以點做？」

冇人有問題呀！只不過係媽咪同爹哋需要轉變一下個心態同習慣嗟！

你諗吓嘞，如果每晚你醒咗，都會有朱古力雪糕食（或任何你好鍾意食嘅嘢），你仲有冇意欲瞓返呢？

1歲喺生理上已經唔再需要夜奶，所以醒咗就應該用另一套方式去回應小朋友，而唔再當佢係BB咁餵奶瞓返。堅持去用另一種方式安撫佢，佢得到清晰嘅訊息，知道醒咗唔會再有奶飲，咁就可以安心繼續瞓唔會再扭計要奶㗎嘞！

分享埋我畀另一位媽媽嘅建議，呢位媽媽問：「我囝囝差唔多2歲，一路都食得少訓得差。佢同工人訓，每日10點前入房訓，凌晨必定要飲奶。媽咪同咗工人講唔好餵，但小朋友一定要飲咗先肯訓返，然後過多兩個鐘又會再大喊！日日如是...」

小朋友由細到大都習慣咗要飲夜奶，唔畀佢的確係會好難至能夠令佢瞓得返（係好難，但並非不可能），尤其是呢個年紀嘅戰鬥力已經好頑強 。

而且，呢個唔單止係小朋友嘅習慣，亦係姐姐（媽媽/爸爸）嘅習慣。半夜三更，一定係會想用最快捷嘅方式，令大家都有得瞓返 （餵母乳比樽餵方便，所以長期夜奶嘅比率會較高，呢個亦係點解話親餵BB要遲啲至能夠瞓過夜嘅原因之一）

所以，一係就嘗試改變姐姐嘅觀念，希望佢能夠諗得長遠啲。一係就由媽媽你自己（或爸爸）負責返處理夜醒嘅問題，轉咗人嘅話，小朋友有時會比較願意接受唔同嘅做法。

另外，半夜每兩個鐘醒一次，係典型疲勞過度嘅跡象。

10點至瞓太夜嘞（我知香港嚟講算早 ），但其實理想嚟講，3歲前起碼9點就應該已經要瞓（午睡要有2小時），2歲以下更加係最遲8點就要瞓。注意我講嘅係「最遲」，最常見嘅起身時間係7am，有啲BB生理時鐘好強大（某媽咪嘅形容 ），無論幾點瞓都係6點醒（已排除日出光線令間房光咗嘅因素）。咁嘅情況之下，8點瞓其實都已經算遲㗎嘞！

解決方法？提早就寢時間令佢冇咁攰，咁或者能夠初步改善每兩個鐘醒一次嘅情況。不過如果你囝囝囡囡對於夜奶嘅依賴已經好深，咁佢可能仍然會冇辦法可以自己銜接到睡眠周期，繼續不斷夜醒。

係咁嘅話，就需要從根本做起：

1. 訂定一個適合你囝囝囡囡嘅作息時間表
2. 堅持停止餵夜奶嘅習慣
3. 畀BB慢慢習慣喺床上［自然入睡］

咁樣至能夠徹底解決夜醒嘅問題，令一家人都能夠有覺好瞓！

戒夜奶會令孩子缺乏安全感嗎?

對於親餵嘅媽媽嚟講，夜奶唔單止係生理需要，亦係一種心理需要。有媽咪問：「睡眠係生理需要但夜奶係安全感，心理需要? 依家越來越多研究指出安全感係可以影響一生，極為重要。點衡量生需要重要過心理需要? 睡眠重要過安全感? 」

呢個問題問得好好，相信好多母乳媽媽都會考慮到呢個問題。

我相信，要從餵母乳中建立健康嘅親子關係，需要雙方你情我願至得。只要媽咪覺得餵夜奶係ok嘅，咁唔需要理其他人講乜嘢，而繼續餵到自然離乳。

之但係，如果媽咪係喺冇辦法下容許仔仔囡囡隨時開餐，其實有可能會覺得好煩好炆（半夜瞓瞓吓被整醒，心情多數都唔好）。

小朋友對媽咪嘅情緒好敏感，佢哋會sense得到，從而感到不安而需要更頻密地食奶。咁就會形成咗一個惡性循環，令媽咪覺得更加炆憎，甚至開始對餵母乳產生負面感覺。

而且，好多媽咪仍然選擇會同仔仔囡囡同床，仍然留喺仔仔囡囡身邊，可以隨時安撫到佢哋，戒夜奶只係換過一個形式去提供安全感。小朋友感受得到你有幾愛佢，並唔會因為冇得食奶而冇咗安全感。

再者，安全感並非單單話畀仔仔囡囡痴住自己就能夠形成，雙方嘅溝通方式，係咪全心全意咁相處更加重要（quality not quantity）。好多人（甚至餵奶樽嘅爹地）會喺餵奶嘅同時篤手機，冇將注意力放喺仔仔囡囡身上，仔仔囡囡得到嘅只係一對乳房，咁樣又究竟係咪真係提供到安全感呢？

就算仔仔囡囡自己瞓一間房，係咪就代表佢哋冇咁有安全感呢？定係正正係因為佢哋喺日間嘅相處中能夠得到足夠嘅安全感，所以能夠自己喺房一覺瞓到天光唔駛人陪，起身開開心心say hello呢？

所以，我建議媽咪可以首先問吓自己，究竟點解想戒夜奶，有啲乜嘢驅使你產生呢個念頭？會唔會係只喺某啲情況下唔想餵？一或係因為感受到其他人嘅壓力？夜晚媽咪同仔仔囡囡都瞓得唔好成日醒，對雙方以及成家人又會造成乜嘢影響呢？呢幾個問題都需要先處理好。

10個餵夜奶小貼士

最後，分享幾個餵夜奶嘅貼士，希望幫到你令BB可以快啲食完奶瞓返：

1. 最好唔開燈，最盡開盞小夜燈就好
2. 唔需要同BB講太多嘢，一句起兩句止就足夠，但亦唔需要特登避免眼神接觸
3. 如無必要唔駛換片，避免刺激到BB
4. BB食奶時係清醒嘅話，就要掃風，但dream feed同埋BB一向冇乜嘔奶問題嘅話，餵完就可以放返落床
5. 預先準備定所有需要用嘅嘢，set好個場先，避免要半夜摸黑走嚟走去
6. 餵奶時必定要避免自己瞓著，最好坐起身餵
7. 喺滿6個月前，要半夜食夜奶係正常嘅事，唔需要急於戒夜奶
8. 但亦唔需要每次夜醒即刻餵奶，尤其滿6個月之後
9. 注意BB真係食緊，定純粹啜吓啜吓（可觀察喉頭有冇吞嚥動作）
10. 食得落唔代表需要食，大部分BB去到9個月大已經唔需要夜奶，可以連睡11-12小時

戒夜奶有乜嘢方法呢？

睇完以上嘅資料，如果你認為你BB其實應該已經唔需要再食夜奶，但又唔知點樣可以同佢戒夜奶的話，可以睇睇呢個90分鐘講座錄影［如何戒奶睡］

要戒夜奶，就要先戒奶睡。喺呢個1小時Webinar，我將會同大家講解以下幾點：

✅奶睡對睡眠嘅真正影響

母乳BB係咪一定醒得多啲呢？瞓覺前畀配方奶就會飽啲醒少啲？

✅點樣做好事前準備

戒奶睡，並非即刻停止唔畀就得，必須要諗清諗楚，並制定詳細計劃。

✅4種戒奶睡嘅方法

視乎BB月齡，父母育兒觀，以及睡眠環境嘅安排（嬰兒床或同床），而選擇唔同嘅做法。

✅提高成功率必須要知道嘅重點

點樣至唔會戒咗幾日後，又故態復萌？夜奶又應該點樣處理？

✅戒奶睡之後嘅下一個目標

戒奶睡只係培育甜睡寶寶嘅其中一步，之後仲有乜嘢要做，至能夠令BB識得自己瞓覺呢？

［如何戒奶睡］詳情及報名

Categories: : 甜睡寶寶