氹瞓覺時，BB越喊越激動，應該點做呢？

你每日要用幾多時間，去氹BB瞓覺呢？

對好多媽咪爹哋嚟講，最痛苦嘅莫過於每日抱住BB行嚟行去氹佢瞓覺… 好彩嘅話30分鐘瞓得著，唔好彩的話分分鐘攪成個鐘，瞓一陣就醒又要再氹過，於是全日就喺哭泣同哄睡之中渡過…（半夜3點時，痛苦度 x10倍！）

明明已經掌握好就寢時間、又做咗睡前儀式，但BB仲係成日氹極都係大喊，甚至喊得越嚟越激動，點解呢？

避免哄睡方式過度刺激

好多時我哋諗住氹BB瞓，但其實可能會做得太多，反而刺激到BB，令佢更加瞓唔著。

咁有媽咪問嘞：「唔好做咁多，即係點？就咁放佢落床？佢會爆喊㗎喎！」

首先，不如諗諗，每次哄睡時，你會同時間做幾多樣嘢呢？

1. 抱住

2. 左右搖

3. 拍pat pat

4. 行嚟行去

5. 唱歌

6. 左手抱完換右手抱

7. 打橫抱唔得轉打直抱

8. 繼續拍pat pat，越拍越快越大力

9. shhhhhhh佢

10. 叫佢唔好喊

個list其實可以無限伸延落去...

要同時做咁多嘢，你放唔放鬆得到呢？BB同時畀你攪咁多嘢，又放唔放鬆得到呢？

入睡嘅英文係 FALL asleep。要 fall 到，就必須要放手，要 let go，要放鬆。

所以，我哋必須要令BB願意收拾心情，忘記呢個花花世界至得。BB嘅大腦非常活躍，好容易受到刺激，包括我哋大人嘅存在。

好多時我哋做咁太嘢想令BB瞓著，反而會令BB冇辦法平靜落嚟準備入睡。而且，BB喺日常活動中，亦會積聚刺激、壓力、興奮感、以及其他情緒，同樣會令佢無法順利入睡。

所以，我哋能夠做嘅，係用冷靜去感染BB。

所以，要令BB能夠放手，我哋自己就必須先放手。

記住，瞓覺，係冇得迫㗎！

注意自己嘅情緒

有媽咪問：「次次帶BB入房佢都喊，好似怕咗瞓覺咁，攪到我次次氹佢瞓覺都好頭痛...」

BB唔會怕咗「瞓覺」呢件事。只不過，有好多嘢都可能會trigger到佢喊。其中一個最主要，但又成日被忽略嘅原因就係 —— 我哋自己嘅情緒。

你知道乜嘢係「自我實現預言」嗎？

根據wikipedia嘅解釋，呢個心理學現象係指我哋總會喺不經意間，令自己嘅預言成為現實。如果你喺準備氹BB瞓覺之前，已經喺度諗「今次唔知又要喊幾耐至肯瞓...」，咁你呢種先入為主嘅判斷，將會影響到你嘅行為，結果令BB係會勁喊好耐至瞓到...

曾經有一個研究發現，當未滿6個月嘅BB由媽咪抱住行嚟行去，心跳自然會減慢，手腳亦會放鬆。

所以，其實唔駛做咁多嘢㗎！

因為呢個係一種生理上嘅自然結果。其他額外做嘅嘢，其實只係顯示出大人自己本身嘅不安。當你哄睡攪到自己越嚟越炆憎，咁又點能夠成功幫BB瞓得著呢？

所以，好多時聽到有爸爸或媽媽同我講，BB一定要由某個人氹至瞓到，佢氹就唔得，好可能就係因為佢非常擔心BB嘅睡眠情況（否則都唔會搵我啦！），於是越急就越亂，自然冇辦法「用冷靜去感染BB」啦！

免費教學影片：BB成日都喊，就算未夠鐘瞓覺或餵奶，都仍然心情唔係好好咁，點解呢？

喺［免費睡眠工作坊］教學影片，我分享咗Gottman Institute嘅Bringing Baby Home課程內容，教我哋點樣睇BB受過度刺激嘅跡象。亦會根據Circle of Security Parenting嘅建議，講解點樣回應大喊嘅BB，令BB能夠得到真正嘅安全感!

--> 立即登記睇片

聆聽BB想同你表達嘅訊息

我請一位搵我做電話諮詢嘅媽咪，將氹BB入睡嘅情況錄低send畀我睇睇。

BB一被放低喺床仔，就喺度𠵱𠵱呀呀。而大人嘅回應方式，係典型唔想BB喊，想令佢開心，所以會話冇事冇事，會不斷拍同掃BB背脊，總之就係用盡方法，去制止BB發出「喊聲」。

不過，BB仍然繼續間唔時就呀呀呀，大人一聽到就即刻同BB講唔好喊，嘗試用愉快嘅語氣去同BB講hello，甚至捉住BB隻手同佢數手指玩。最後，BB越喊越大喊，越喊越激動...

其實，BB未識講嘢，所以佢只能呀呀呀咁樣去表達佢嘅意思，同我哋溝通。

我睇條片時，見到BB一開始係冇喊，只係呀呀呀咁表達緊佢自己，可能係講緊‘抱我’，亦可能係講緊‘你同我著睡袋’，或者‘我知道要瞓覺嘞’，甚至係‘終於有得瞓嘞，我好攰呀！’

但好多時大人因為驚BB喊，所以就會忽略BB嘅‘說話’，淨係猛咁shuuu或拍，甚至用遊戲企圖令BB收聲。

但當BB佢表達緊一樣嘢，大人冇作出相對嘅回應，BB覺得大人唔明白佢，就會炆憎唔高興，於是就更加大聲，更加激動，最後真係變成喊...

之前我喺專頁曾經分享過幾篇有關情緒嘅文章，重點係：大人對於哭泣嘅心態，同埋處理方式，對BB嘅情緒健康非常重要，亦係BB建立安全感嘅重點。

至於實際嘅執行方法，我會建議先用同BB講一聲，指住張床畀佢睇，然後至慢慢放低。唔需要一放低就不斷去掃背，亦避免用‘愉快’嘅聲調同BB講hello，亦唔好捉佢隻手同佢數手指。

只需要望住BB，佢呀呀呀你可以回應佢‘係呀，係時候休息嘞，我會喺度陪住你，講得越慢越悶越好。有需要亦可以放隻手喺BB心口，重點係要同BB保持連結，保持雙向溝通，而唔係大人一味講一味做好多嘢。

試諗諗，你想BB瞓覺，但仲同佢玩，同佢講hello，只會令BB好混亂，唔知你哋想點呀...

P.S. 注意我唔係話唔好同BB傾計，但應該只係睡前儀式嘅一部份。夠鐘熄燈瞓覺，就應該停止唔好再講咁多嘢。尤其是當BB大喊時，請你嘗試控制住自己唔好不斷講嘢，而去聆聽BB想向你表達嘅意思啦！

媽媽分享：由每次氹一個鐘，變成10分鐘入睡嘅經歷

你知道，我收到乜嘢回應會最開心嗎？

唔係BB終於能夠一覺瞓天光... 而係有媽咪同我分享佢喺心態上嘅改變，從而唔單止令BB瞓得好咗，亦同時令媽媽覺得輕鬆咗，而且對BB瞭解深咗，親子關係更緊密。

呢個至係長遠令BB同大人都有覺好瞓嘅方法。

得到S媽媽准許，同大家分享佢嘅經歷同得著：

「Hi Catherine, 睇咗你今日個sharing，我都想同你分享吓！

尋晚BB放落床後大喊，喊咗好耐都瞓唔到，係3個幾月嚟都未發生過，可能係出牙仔/尋日痾唔到肚仔唔舒服。

一開始入房前都心驚驚㗎，但今次無好似以前咁做咁多嘢，又抱又搖又拍去soothe佢，因為都知佢唔舒服的話，你點做都幫唔到佢，或只會令佢更唔舒服。

我入到房踎咗係佢床邊，任由佢捉住我手，溫柔望住佢，由佢喊，由佢發洩，聽佢喊。

喊到咁上下，見佢俾睡袋纏住隻腳仔，就幫佢放返好舒服嘅姿勢，嗰下因為輕輕抱一抱佢，佢當然又會順勢喊勁啲，但我同樣踎返係床邊，聽佢喊，用我嘅陪伴話佢知媽媽喺身邊。

慢慢聽到佢由爆喊，到開始發晒啲情緒，到平靜少少，跟住好奇妙地佢自己瞓低，都會間歇性喊幾下，但見佢自己搵個舒服嘅姿勢準備瞓，好快就瞓咗。

我諗10分鐘內咋？以前又抱又拍又氹，最少要搞一粒鐘！

我覺得心態真係好緊要，同樣都係俾佢喊，但以前有時handle唔到，會離開佢等佢自己喊嘅心態，自己都會有啲對佢唔住佢，但今次同樣由佢喊，但你真係知自己係聽佢喊，陪佢發洩，亦好清楚知道佢知道你係度陪佢，雖然我一句說話都無講，但我覺得反而好似更親密。

我亦想講，今日佢作息穩定，我同佢都舒服，就算一時瞓得唔好，我同佢都比較易搵方法去解決，真係唔係一朝一夕嘅事。

好記得最初跟你方法去做時，我仲問咁樣做，比起以前盡量唔俾佢瞓，到10點幾先俾佢瞓，唔係更辛苦咩？10點幾先瞓起碼我好多時可以一覺瞓天光...

你話但之後會慢慢越嚟越好，我宜家真係真心體會到。

因為身邊都見朋友個小朋友作息顛倒，就快要返學唔知點調整，或要買好多嘢俾佢玩，週末要諗好多活動去放晒電等佢瞓好啲。

再加上我自己一個湊，無工人無長老，仍然可以陪bb之餘，做到家務，煮飯，慢慢食，仲試過老公返嚟接手後出去同朋友食飯添，好多人都覺得好神奇

呢個做法以BB為先，但我同老公都覺得舒服。

我真係好開心喺阿B仲好細嗰陣已經知道作息平衡嘅重要，謝謝你！」

接納及容許負面情緒，陪伴BB提供精神上嘅支持 -- 我哋要做嘅，其實可能就只係咁多。

It's okay to cry.

畀多個貼士大家：

香港有土地問題，睡房未必有空間畀你抱住BB行嚟行去氹佢瞓覺。但其實，你唔駛真係一路兜圈兜到頭暈㗎！

試吓兩腳一前一後，以轉移重心嘅方式去模仿行路嘅姿態，其實效果都差唔多。

記住一路做一邊聽住自己嘅呼吸，確保動作夠慢，保持一直都係慢-慢-慢...

嘗試面帶笑容，保持心境平靜輕鬆，將所有動作拖慢，用心觀察及聆聽住你囝囝囡囡，唔好淨係諗住想快啲「整暈」佢...

當你能夠進入冥想嘅狀態，忘記時間，忘記身處嘅環境...

感受BB貼住喺你身上嘅溫暖，佢嘅BB味...

你會發現，BB對瞓覺會冇咁抗拒

你會發現，氹瞓覺並非咁攰咁煩嘅事嚟

你會發現，你同囝囝囡囡嘅關係又緊密咗

瞓覺應該係一件開心嘅事嚟㗎！

想知道更多令BB能夠安心入睡，令你唔駛再日日抱到手軟嘅貼士？

立即報讀：

［睡眠調整全面睇］

Dolce Sleepers 嘅獨門心法，已獲數百個家庭親身證實，能有效逐步改善BB嘅睡眠問題，並令BB唙最小掙扎下，達到自行入睡嘅目標。

每個BB都是獨一無二，怎樣能確保課程嘅建議合用呢？

呢個正正係Dolce Sleepers同其他睡眠課程嘅分別！我唔會畀個時間表要求你跟住做，而係教你如何視乎BB嘅情況，去制定及調整作息時間表，以配合你BB嘅睡眠需要。所以，無論當日BB小睡情況如何，又或者出現特殊情況，你都能夠識得點樣處理。

孖仔媽媽Catherine會親自為你分析孩子的睡眠問題

參加每月Zoom新學員歡迎會，可享直接諮詢機會，我會同你一齊制定調整目標及計劃，助你自信踏出第一步，令BB嘅睡眠問題能夠得到即時改善。而且，課程亦設有「學員專屬群組」，你可以隨時出post發問，我會針對你嘅情況提供建議。

P.S. BB未滿6個月，可參加甜睡寶寶計劃，除群組諮詢外，亦能免費獲贈0-5月健康睡眠工作坊

--> 課程詳情及報名 <--

Categories: : 甜睡寶寶