睡眠,係最好嘅藥。
當BB病咗,佢哋最需要嘅係休息。所以,作息時間上就可以唔需要再跟得咁緊,日頭佢攰就畀佢瞓, 亦唔需要刻意叫醒。
但大原則係,日頭瞓多咗唔會導致夜晚遲咗瞓。
夜間睡眠係最重要嘅,就算日頭瞓幾多,恢復力都冇夜間睡眠咁有效。所以就寢時間應該要保持返喺平時上下嘅時間,咁BB至係真正瞓得多啲,可以快啲打勝仗✌️
瞓得多至好得快,除非醫生指示,否則無須半夜檢查體溫或餵藥,避免唔小心整醒咗佢。同埋,盡量喺夜晚就寢之前餵藥,如果只係一般常見輕微疾病,BB半夜高燒,一般都會覺得唔舒服而夜醒大喊搵人。
已經停咗夜奶的話,更加唔好諗住半夜畀返枝奶佢呀!否則病好咗,變成習慣性夜醒就頭痕…
為咗方便照顧,抱咗BB去大人床一齊瞓,而家佢唔肯瞓返BB床,點算好?
BB病咗,作為父母一定好擔心,會用盡所有方法,希望令BB冇咁辛苦。
BB發燒嘅話,亦會好想攬住佢瞓,方便check住體溫,怕燒得太高會出問題(但其實一般高燒係唔會燒壞腦㗎,除非係腦膜炎)
呢個心情,作為孖仔媽媽嘅我非常理解。
幾年前有次返香港,孖仔F病咗,上呼吸道腫晒,抖氣會有聲。我喺兩日內去醫院睇咗3次醫生,頭兩次排一般私家醫院,情況完全被忽視(仲要一個人抱住佢輪咗2個鐘至見到醫生...)
嗰2日明顯係一放床佢就好似抖唔到氣咁,於是我一直抱睡咗2日。最後去咗間山卡啦嘅私家醫院(仲要係年初一晚要call個醫生返嚟睇症),食咗隻勁藥之後立即消腫,返屋企時喺的士就已經瞓到好冧。
之後,放返落床佢都冇事,一切回復正常。
要注意嘅係,我之所以抱睡,係因為孖仔F呼吸道受感染腫晒,令佢透唔到氣。
如果你BB病咗,但除咗發燒外冇乜其他徵狀嘅話,我會建議你保持返平時嘅入睡方式,同埋睡眠環境。
尤其是你BB本身係瞓BB床,能夠床上入睡的話,唔好轉為抱睡,更加唔好抱去大人床。
一來BB本身習慣自己瞓嘅話,同床未必幫到佢,甚至可能令佢瞓唔到。
二來會改變咗BB嘅習慣,易請難送,除咗同床會有安全風險外,大人唔習慣同BB同床,亦難瞓得好。
最重要嘅原因係,改變咗入睡方式/睡眠環境,好可能會影響到BB嘅睡眠質素,並且令夜醒次數更頻密,更嚴重。
病咗最需要嘅係睡眠,就算好返之後,體力都仍然需要時間恢復。但睡眠質素差咗嘅話,恢復力會更慢。
所以,希望BB快啲好返,保持一致其實更重要。
但如果你已經抱咗BB去大人床,希望BB可以去返佢自己張BB床瞓的話,咁就需要等BB病好,體力完全恢復後,再制定一套全面嘅睡眠計劃:
先由穩定返作息時間開始,以及令BB唔會抗拒自己張床仔,然後再決定到底做睡眠訓練,一或用循序漸進嘅方式,令BB習慣返喺床仔瞓覺。
中招BB嘅媽咪分享
Covid期間,差唔多每日都聽到有媽咪同我講,佢哋一家中咗招。
不過,又唔係個個嘅情況都咁差喎... 尤其是,喺多年前已經認識Dolce Sleepers嘅媽咪,佢哋都不約而同咁話:「小朋友知道自己有需要瞓覺,會好願意去休息 」
聽到啲媽媽同我講小朋友鍾意瞓覺,真係開心過佢哋話BB可以一覺瞓天光!
因為,我一直相信,令BB/小朋友鍾意瞓覺,至係解決睡眠問題嘅真正方法。單單諗點樣令佢自行入睡,點樣令佢一覺瞓到天光,其實完全唔足夠!
睡眠問題喺唔同階段都一定會出現。當小朋友鍾意瞓覺,所有問題都會容易處理好多。
Xenia媽媽嘅分享:
令小朋友察覺到自己身體嘅需要,知道點做會令自己覺得舒服安心,係 RIE育兒法嘅教導下所得到益處。
所以,要多謝嘅,係Magda Gerber!
想知道點樣能夠運用RIE育兒法,令BB鍾意瞓覺,參加[睡眠調整全面睇]啦!
全港唯一設有on demand支援嘅嬰幼兒睡眠網上課程,能配合不同家庭嘅情況、需要及目標,提供群組及一對一支援。
香港女歌手及演員[雨僑 Ava](分享節錄)
*以上並非醫療建議,請以專業醫療人員所提供嘅意見為準。
Categories: 甜睡寶寶
用正向教養的方式去處理睡眠問題;以健康睡眠為基礎去面對育兒挑戰!