進行睡眠訓練，可以令孩子不會大哭嗎？

對於「睡眠訓練」呢四個字，你有乜嘢感覺呢？

好多人都認為，只要做睡眠訓練，「 狠心」 由得BB喊唔理佢（即所謂嘅「Cry It Out／CIO」），至能夠令BB學識自行入睡，至會能夠瞓得好，可以一覺瞓到天光。 

聽過唔少BB會喊到嘔... 更壞嘅情況係，BB喊咗成個月，就算識得自行入睡，但仍然會夜醒大喊… 

同時，好多人亦冇諗過，睡眠訓練有可能會「失敗」 。又或者話，因為BB一直大喊，媽咪爹哋唔「忍心」 ，於是頂唔住只好「放棄」... 

其實，睡眠訓練唔應該要「狠心」同「忍心」，更唔應該係一件咁痛苦同殘忍嘅事！ 而且，睡眠訓練並非萬能，唔係做完令BB識得自行入睡，就可以解決所有睡眠問題...

呢篇文章，會同大家破解有關「睡眠訓練」嘅迷思，並分析背後真正嘅用意，講解事前必須做好嘅準備，以及我哋應該抱持嘅心態。 希望呢份資料，能夠幫到你決定，你同你BB係咪適合做睡眠訓練。 甚至，其實有冇需要做睡眠訓練 😊

我相信，要令睡眠訓練得到成功，必須要「尊重BB」，並以配合父母想法及期望為前提。

自行入睡，唔係一定需要㗎！

做電話諮詢時，絕大部分媽咪爹哋都話希望囝囝囡囡能夠自行入睡。 不過傾傾吓就會發現，其實佢哋所指嘅只不過係戒奶睡或抱睡，希望BB能夠喺床上入睡而已。 

究竟自行入睡，同埋床上入睡有乜嘢分別呢？ 

自行入睡嘅定義，係你放咗BB落床後，就可以離開間房，佢會自己由清醒，慢慢感到有睡意，然後喺床上瞓著覺。 所以，如果你一直陪住佢，或者要拍住佢pat pat瞓，甚至係抱住搖到佢差唔多瞓著然後放床，呢啲情況仍未算係自行入睡㗎！ 

而床上入睡嘅意思，只係單單唔再奶睡抱睡搖睡孭睡咁解。 兩者嘅分別，在於自行入睡即係完全冇你嘅存在，都可以瞓得著。而床上入睡，其實只係自行入睡嘅第一步，當BB習慣喺床上入睡，你會需要慢慢抽身，減低你嘅存在感，令BB唔再需要依賴你至瞓得著。 

只要BB能夠喺床上入睡，唔駛抱住孭住，或啜住奶，夜醒情況已經能夠得到好大改善，甚至能夠「一覺瞓天光」。

所以，其實唔係一定要做到自行入睡，至能夠解決夜醒嘅問題。 而且，就算BB能自行入睡，亦不一定能解決夜醒嘅問題！

識得自行入睡，都一樣可能會夜醒大喊㗎！

冇BB能夠真正「一覺瞓到天光」。 

唔單止BB，就算係小朋友，或者成年人，technically都唔會一覺瞓到天光。

所有BB都會夜醒，分別只係在於醒咗佢識唔識得自己瞓返。 咁究竟點樣至能夠BB夜醒識得自己瞓返呢？ 

喺一項橫跨17個國家，一共涉及超過29,000個BB嘅研究*，以及好多其他研究都一致指出，當BB入睡時冇需要依賴大人嘅幫助，咁夜醒就能夠有更大機會能夠自己瞓得返。 而如果BB入睡時需要協助，例如抱睡、搖睡、奶睡、車睡、孭睡、拍睡、拖(手)睡等等... 當呢啲情況成為入睡條件，自然夜醒都好難會可以自己瞓得返（月齡越大依賴越大） 

所以，你見坊間好多資料，甚至有睡眠顧問會同你講 - 只要做睡眠訓練，令BB識得「自行入睡」，咁就自然唔會再夜醒大喊，可以一覺瞓到天光... 

唔係囉！ 我見過好多case，無論係能夠自然入睡，定係做咗睡眠訓練都好，就算BB識得自行入睡，夜醒都一樣會大喊，要人抱、拍，甚至餵奶至瞓得返。 

所以，唔好諗住咬牙忍住，只要由得BB爆喊一兩個鐘，佢自然就唔會再夜醒大喊！ 好有可能，你BB爆喊足一個月，都繼續會夜醒早醒自己瞓唔返㗎！ 我見過，真係見過。唔止一個兩個，係好多個都係咁... 就算係環境已經夠黑、BB已經食飽、日間小睡情況理想、就寢時間喺8點前，都一樣有可能會夜醒大喊。 

做睡眠訓練，因為BB能夠自行入睡，所以自然會將BB能夠自己瞓返嘅機會提高，但不等如就能夠解決夜醒問題。 所以，我真係好想好想同大家講，唔好將「自行入睡」呢回事睇得咁大，因為其實幅砌圖仲有其他部份，好多人都會忽略咗…

點解睡眠訓練會失敗呢?

1. 睡眠訓練時機錯誤

初生BB嘅睡眠周期發展仲未成熟，而且亦未完全掌握到自我安撫入睡嘅能力。所以，企圖喺BB未滿4個月前就進行訓練，希望BB能夠自行入睡或瞓過夜的話，只會吃力不討好。一般建議等BB滿6個月大至進行睡眠訓練，能有更大成效。此外，亦應避免喺小朋友啱啱開始學行，或喺戒片期間開始訓練，因為呢啲重要嘅發展里程碑，好多時都會對睡眠質素造成影響。

2. 未有合適睡前儀式

睡前儀式能幫助BB轉換狀態，令佢哋明白到，喺做完呢幾件事之後，就係時候瞓覺。所以，如果你喺囝囝囡囡玩到興奮嘅時候，突然熄燈要佢瞓覺，咁佢哋當然唔願意合作，抗議大喊唔肯瞓啦！

3. 未有穩定就寢時間

規律嘅作息時間，能穩定生理時鐘。為BB定一個穩定嘅就寢時間（相差盡量喺30分鐘內），BB到時到候自然有睡意想瞓覺。而當小朋友嘅就寢時間飄忽不定，佢哋就可能會大吵大鬧拖延住，唔願意去瞓覺嘞...

4. 錯過入睡關鍵時間

好多人以為，放晒BB啲電，就會更容易入睡，呢個誤解害咗好多家庭... 越細嘅BB，能支撐嘅清醒時間就越短。當佢哋攰要瞓時但又冇得瞓，清醒時間超過身體負荷， 就會令大腦分泌壓力荷爾蒙，令BB想瞓都瞓唔到，好辛苦於是爆喊。就算最終攰到斷電，睡眠品質亦唔會好，好易半夜驚醒。

5. 回應方式未能一致

呢個係睡眠訓練唔成功嘅最主要原因。三更半夜大家都攰，自然好想BB快啲瞓返，於是立即飛撲埋去抱睡奶睡，甚至抱上大人床。咁樣做，就等如話畀BB聽，只要佢半夜大叫，媽咪就會嚟抱佢或餵奶，慢慢就會失去意慾自己瞓返...

用邊種睡眠訓練方式好呢？

所謂嘅「睡眠訓練」，準確嚟講其實係睡眠「再」訓練，目的係令BB擺脫之前嘅哄睡習慣（亦即搖睡抱睡奶睡等），令佢重新擁有自行入睡嘅能力。所以，如果BB從小就已經習慣床上入睡（例如拍睡），咁可能無須經過訓練，都可以自行入睡㗎！要成功令你BB自行入睡，唔能夠盲目跟隨一兩種睡眠訓練方式。因為，有幾個因素需要考慮：

1. BB月齡

未滿6個月嘅BB，唔需要亦唔建議做正式嘅睡眠訓練，應以培養良好睡眠習慣為重點。另外，年紀大啲嘅小朋友，建議盡量揀一種刺激性比較低嘅方式，越hands off越好（但唔代表要扮瞓覺唔理佢喎！）

2. BB性格

未滿6個月嘅BB，唔需要亦唔建議做正式嘅睡眠訓練，應以培養良好睡眠習慣為重點。另外，年紀大啲嘅小朋友，建議盡量揀一種刺激性比較低嘅方式，越hands off越好（但唔代表要扮瞓覺唔理佢喎！）

3. 現時入睡方式及環境

進行睡眠訓練時，究竟應該一次去改晒所有做法， 定係先改變其中一個部份，要視乎BB而家係抱睡、奶睡、拍睡，定需要其他更複雜嘅條件至瞓到。如果BB而家係同大人一齊瞓，亦需要先畀時間BB對嬰兒床產生熟悉感至得。

4. 父母育兒觀

呢點其實係最重要、最具決定性嘅一點。揀邊種睡眠訓練方式，除了要因應BB嘅性格之外，媽咪爹哋嘅諗法及期望亦好重要。我唔會迫人做佢哋唔願意做嘅事，因為如果媽咪爹哋勉強自己去做，往往都會好難持續得到，好容易放棄。

受RIE育兒法影響，Dolce Sleepers嘅心法自成一格 ，好講求聆聽及瞭解BB，再喺恰當嘅時候作出恰當嘅回應。

要強調嘅係，做睡眠訓練唔代表要掉低BB一個喺房，由得佢喊唔理佢。你可以選擇留喺房陪住BB，提供支持及安撫。 

但係，就算你陪住佢，亦唔代表BB就唔會喊…



想做睡眠訓練令BB識得自行入睡，係咪一定要大喊呢？

首先要再澄清一次，我絕對唔會叫你放低BB喺床，然後就走咗去唔理佢，天光至抱返BB出嚟（即係稱為cry it out嘅做法）。但我都好明白你問呢個問題嘅原因。 

我哋會覺得，要不斷留喺BB身邊，喊就即刻安撫佢，停止佢嘅淚水，令BB笑返，至能夠令BB有足夠嘅「安全感」。我哋好驚，如果BB喊而我哋冇回應佢，會令佢好驚，甚至會嬲咗我哋… 

其實，唔係話一見BB喊，就即刻抱起安撫佢錫返，就能夠令BB得到「安全感」㗎！ 

有好幾個研究都指出，就算係自行入睡嘅BB（喺外國好多時等如BB自己一間房），佢哋同需要奶睡抱睡或陪睡嘅BB一樣，同媽咪都能夠建立緊密穩固嘅安全依附關係（secure attachment）。 

研究人員發現，能否建立安全依附關係，並非取決於媽咪對BB夜醒大喊，回應得有幾快同幾密。兩者嘅分別在於，能同BB建立安全依附關係嘅媽咪，當佢哋回應BB時，對BB嘅情緒同需要比較敏感，而且回應方式亦能夠保持一致。 呢類媽咪唔單止希望令BB知道，媽咪好錫佢會照顧佢。更重要嘅係，令BB明白到，媽咪會願意用心去聆聽BB想表達嘅意思，從而作出恰當嘅回應，滿足BB嘅真正需要（即係並非抱住唔喊咁表面嘅處理方式）。

同媽咪建立咗安全依附關係嘅BB，佢哋會更有自信，勇於離開媽咪去探索同學習新事物。因為佢哋明白到，當有需要時，佢哋可以隨時返去搵媽咪，媽咪係佢可信賴嘅後盾。 

所以，我成日都話，當你希望改變BB而家嘅入睡方式，用邊種方法唔係最重要嘅問題，重點係要瞭解BB當時嘅情況，而作出恰當回應，同埋保持一致。咁樣，你至能夠畀到清晰嘅訊息BB，令佢能夠同你建立到健康嘅依附關係。

咁係咪即係唔可能唔喊呢？

我會話，有可能唔喊。 但大多數時候都比較難去完全避免。 

當我哋要改變BB嘅入睡方式，因為係由大人主導嘅一個轉變，BB冇say，所以覺得唔慣，要表示及宣洩不滿，係健康而且正常嘅事。 BB因為未識講嘢，能表達自己嘅方式有限，所以只能夠通過喊聲去同我哋溝通，同我哋分享佢嘅感受。 

有人會覺得，特登整喊BB，係好唔自然嘅事，唔應該迫BB自己瞓覺呀！ 但其實，喺no cry以及cry it out之間，仲有其他做法。

當你抱持住尊重BB嘅心態，以細心敏感嘅方式去回應BB，睡眠訓練並非一件殘忍嘅事，反而係一件充滿 「愛」 嘅事。

Dolce Sleepers 獨門心法

RIE育兒法創辦人Magda Gerber認為，睡眠訓練其實應該稱為睡眠 「反」 訓練。 BB天生就擁有自行入睡嘅能力。 

睡眠訓練的目的，其實係解除我哋之前喺無意之中，訓練BB依賴咗嘅入睡條件（即係搖睡抱睡奶睡等），令BB重新習慣，點樣唔駛依靠外在幫助而自己都瞓得著。 

⚠️ 睡眠訓練 =/= 自行入睡 

⚠️ 睡眠訓練 =/= 留低BB自己一個喺房 

睡眠訓練亦係設限嘅一種，同你平時日頭同BB say no，原則上係一樣嘅。就好似你要阻止BB將污漕或危險嘅嘢放入口，或者唔准佢打人咬人一樣。你只係唔再用之嘅方式氹BB瞓覺而已。 

我哋自己嘅心態，應該係：我明白你唔願意咁樣，但我必須堅持，因為呢件係重要嘅事。 睡眠訓練，其實亦唔係訓練BB，而係訓練照顧BB嘅大人，訓練我哋必須改變一向以嚟嘅做法以及習慣（因為唔能夠再持續落去），同埋自己嘅心態。

唯有大人以正面嘅態度，以及輕鬆嘅心態處理，至能夠令BB安心入睡㗎！ 

睡眠訓練之所以比平時設限嘅難度更高，係因為你需要BB瞓覺，所以唔能夠做平時可以用到嘅方式，去處理BB嘅不滿（例如畀第二件玩具佢，甚至開手機播youtube 🙈） 我哋需要耐心聆聽同觀察你囝囝囡囡，嘗試解讀出佢想同我哋表達嘅訊息，成個過程係需要摸索嘅。

呢個亦係Dolce Sleepers獨門心法嘅一個特點 — 我唔會叫你睇住個鐘，等BB喊幾耐至作出回應。 我會同你一齊去練習，觀察及聆聽BB想同你表達嘅意思，再同你一齊諗吓點樣做，至係真係幫到BB嘅回應方式。

改變，可能會令人覺得不安。 BB覺得不安，就會喊。 但BB大喊，並不等如佢覺得好痛苦。 BB面對改變而產生不安，我哋要做嘅係提供情緒上嘅支持。 我哋冇需要，亦唔應該以 「幫BB解決問題」 嘅心態， 認為BB係需要得到拯救。 

請相信BB，佢哋嘅能力，遠比你想像中強大㗎！

提高睡眠訓練成功率嘅10 個事前準備

坊間相傳好多睡眠訓練「 方法」 ，上網亦好容易搵到。 

問題係，單單做睡眠訓練，唔單止唔能夠解決睡眠問題，甚至可能令成家人更迷茫，更痛苦... 因為，好多情況根本係未ready（包括大人同BB），勉強去做，只會吃力不討好。 

睡眠訓練，其實係改變入睡方式嘅方法。希望BB能夠順利入睡，唔係掉佢落床咁簡單㗎！ 有啲咩要預先做好？睇睇下面呢10點啦！

1. 準備一張嬰兒床

為避免BB碌落床，必須要有一張四邊圍住嘅BB床。BB已經識企嘅話亦要將床褥較到最低。記得床入面亦唔能夠有任軟身物品，或BB可能用嚟踩住擒出嚟嘅物品。

2. 安裝不透光窗簾

避免房外光線會抑制睡眠荷爾蒙嘅分泌，影響入睡。同時亦可以減低BB因為日出令睡房光線轉變而早醒。

3. 考慮使用白噪音

如果房外成日會有突如其來嘅聲音，影響BB入睡，用白噪音遮蓋住，能減少噪音對BB嘅影響。

4. 記低1-2個星期睡眠及餵奶加固情況

穩定作息時間，確保BB日間小睡穩定，冇瞓得太多或太少，夜間睡眠至唔會受到影響。

5. 掌握好理想嘅就寢時間

如果BB未夠攰會唔肯瞓/瞓唔著，太攰又會因為壓力荷爾蒙影響而想瞓都瞓唔著，兩個情況都會增加入睡時嘅掙扎。

6. 就寢時間最好安排喺6至8pm之間（夜間睡眠要有11-12小時）

BB嘅天然生理時鐘都係偏早嘅，太夜瞓未能夠配合生理時間，甚至BB已經攰得滯，都會導致入睡困難嘅問題。

7. 制定一個幫到BB放鬆嘅睡前儀式 

幫BB做好瞓覺嘅心理準備，令佢心情保持愉快輕鬆，甚至令佢鍾意瞓覺，咁佢就自然合好多啦！

8. 如果BB有用奶咀，要決定點處理

要決定戒，定係教BB自己執（一般喺7-8個月大時已經可以做到）。因為如果BB夜醒仍然要你幫佢塞奶咀，咁識得自行入睡都冇用。

9. 確保所有屋企人都同意，並且做好心理準備（包括你自己）

呢點非常重要，BB未習慣新嘅入睡方式好可能會大喊，如果屋企人唔贊成做法，就算冇出手干預，淨係發表意見都會令執行睡眠訓練嘅媽咪爹哋感受到更大壓力。

10. 揀定合適嘅日子開始

保持一致係睡眠訓練要得到成功嘅重點，如果大人太攰，或第二日要返工，都會增加放棄嘅可能性。

後話

最後，不厭其煩再提多一次。想囝囝囡囡瞓得好，唔係單單做睡眠訓練，令佢能夠自行入睡就得。自行入睡甚至唔係首要條件。而且，唔係每個家庭都適合做睡眠訓練。但，我希望你能相信...

一定要狠心畀BB大喊，至能夠令佢瞓得好呢個諗法，已經過時㗎嘞！

以全新角度看待睡眠

擺脫諮詢期限制，隨時得到支援 !

「睡眠調整全面睇」建基於科學及嬰幼兒心理學，是一套有系統、真正可靠的方式。配合RIE育兒法「尊重與信任」的理念，以正向教養處理睡眠問題 令孩子得到滿滿安全感（securely attached）。

課程特別為忙碌的香港父母而設，可隨時隨地收看 5-10 分鐘教學短片，並設有action points助你立即開始著手作出調整，２個星期就能完成課程（可縮短為１星期），令孩子的睡眠問題得到明顯改善。 Dolce Sleepers 的獨門心法，已獲數百個家庭親身證實，能有效逐步改善孩子的睡眠問題，並令孩子在最小掙扎下，達到自行入睡的目標。

「睡眠調整全面睇」 設有長期支援的網上課程

睡眠科學＋嬰幼兒心理學＋RIE育兒法

每日10-20分鐘，兩星期內學會如何 :

✔️ 恰當處理夜醒

視乎孩子的情況，選擇合適的回應方式，令孩子盡快重新入睡。.

✔️ 制定作息時間表

根據孩子的睡眠需要，.以及家庭的活動模式，作出個人化安排。

✔️ 減少孩子哭泣

瞭解孩子的心理需要，令孩子能愉快地安心入睡，並增進親子關係。

✔️ 停止抱睡奶睡

以顧及孩子安全感的方式，逐步改變入睡方式，令孩子能夠自行入睡。

12條教學影片，可隨時無限次重溫！

課程亦設有學員專屬群組，解答你嘅問題。

我會親自為你分析BB嘅睡眠問題

參加每月Zoom新學員歡迎會，可享直接諮詢機會，我會同你一齊制定調整目標及計劃，助你自信踏出第一步，令BB嘅睡眠問題能夠得到即時改善。

（BB未滿6個月，可參加甜睡寶寶計劃，除群組諮詢外，亦能免費獲贈0-5月健康睡眠工作坊）

CLICK呢度瀏覽課程詳情及報名

Categories: 甜睡寶寶