睡前儀式，你做得啱唔啱？

如果你想要一個trick，令BB瞓得好，睡前儀式就係你嘅答案。

好多媽咪爹哋會忽略睡前儀式嘅重要性，連我幫佢哋執好咗個步驟，只需要跟住做，都唔係人人會有心去做好...

我成日都話，令BB／小朋友鍾意瞓覺係好重要嘅事！

鍾意瞓覺嘅小朋友，就算一時貪玩口講唔想瞓，但最後身體都會好誠實瞓低，因為小朋友本身對瞓覺呢件事冇抗拒感，自然就能夠喺感受到有睡意嘅時候，輕鬆入睡。

但如果由細開始已經冇做好睡前儀式，次次都要大喊，次次都有一番掙扎，BB慢慢會覺得瞓覺係一件唔開心嘅事，而且亦唔會聆聽到自己身體嘅需要，無法自然入睡，大個後抗拒感只會越嚟越高…

睡前儀式其實即係要做啲乜嘢？

睡前儀式係一系列幫你BB準備就寢嘅步驟，除咗沖涼、刷牙、睇書之外，其實仲包括其他微小部份，包括進入睡房、餵奶、換尿片、換睡衣、穿睡袋、放BB落床、開白噪音、熄燈、講早抖、閂門等等…

點解叫儀式呢？因為每個步驟都必須跟隨既定嘅次序進行，一步一步慢慢去做，至能夠令BB明白到做完A做B，做埋C跟住就會瞓覺，目的係以層層疊嘅形式發出睡眠訊號，畀BB知道係時間要瞓覺，所以每個步驟之間唔可以有空檔，而且應該喺某個特定地點完成。

當BB能夠預料到即將發生嘅事，會更有安全感，亦更易接受由清醒到入睡呢段過渡期，會較易入睡，而且瞓得更好。

對於1歲以下嘅BB，睡前儀式唔需要太複雜，唔一定要睇書或講故事。因為BB仲細，清醒時間仲好短，好易就攰，又容易受過度刺激，所以其實冇乜時間攪咁多嘢。寧願做少啲，但慢慢做會仲好。

睡前儀式更加係培養親子關係嘅好機會，所以同你BB保持住connection非常重要，如果你只係抱住「快手攪掂掉佢落床」嘅心態，其實可能會引致反效果...

點解每次做睡前儀式，BB都唔合作呢？

每次同BB準備瞓覺，你心情係點呢？

• 難得嘅親子時間，要玩到好興奮？
• 例行公事，快手攪掂，掉佢落床？
• 頭痛唔知又要攪幾耐至肯瞓？

以上幾個心態，其實都唔係咁理想呀...

睡前儀式嘅目的，係畀BB知道要準備瞓覺。既然係要瞓覺，就應該要平靜放鬆，至能夠令BB能夠安心入睡。

要營造一個平靜安穩嘅睡眠環境，令BB能感到有自信及安全，請記住以下3個P：

• Peaceful

營造一個平靜安穩嘅睡眠環境，冇過多外在刺激，例如玩具、電視／手機、燈光，和房外噪音等。我哋要以緩慢及輕鬆嘅態度，畀BB感覺到你係全心全意咁去關注住佢，一齊享受呢段親密嘅時光。同BB入房前，建議預先調暗房入面嘅燈光，令大腦可以適時分泌睡眠荷爾蒙褪黑激素（melatonin ），到夠鐘要瞓時，BB至會有足夠睡意，易啲瞓得著。你亦可以入房前開定冷氣，避免要分心去搵遙控，以及冷氣機突然發出嘅聲音及燈光，會刺激刑BB。

• Participation

RIE育兒法非常重視雙向親子溝通，你可以一邊進行儀式，一邊形容發生緊嘅事，話畀BB知儀式嘅每一步，甚至邀請BB參與，例如揸住塊尿片、遞起腳、揀睡衣、揀邊本書睇、熄燈等。喺開始下一步驟前，亦先知會BB。「Do things with your baby, don’t do things to your baby」，BB參與度高，自然更加合作。喺睡前儀式進行時，BB好可能會分心望住第二樣嘢，甚至想爬走玩（尤其換片嗰時 ）。BB專注力短，所以係好正常嘅事嚟呀！呢個時候，我地要保持耐性，先順住BB嘅目光，觀察同瞭解有乜嘢吸引住佢，然後再慢慢帶領返佢嘅注意力去睡前儀式度：即係點做？睇吓呢條片啦！

• Predictability

BB能夠預料到即將發生嘅事，會更有安全感，因此較易入睡，而且瞓得更好。睡前儀式唔應該太長，大約15-20分鐘最理想（沖涼另加10-15分鐘）。注意唔好錯過入睡嘅黃金時段，令BB攰過頭而無法安穩入睡。另外，千祈唔好因為急住放BB落床，而省略睡前儀式嘅任何一個步驟呀！睡前儀式開始之後，亦唔好再畀BB有自由活動時間，等佢明白到，儀式完結後就要瞓覺，呢個就係進行睡前儀式嘅最終目的。

睡眠前儀式係咪定咗之後就唔改得？

「睡前儀式，話明係儀式，所以應該每日都一模一樣，一定唔可以改？」

咁又唔係喎！

如果做開嗰套work嘅，能令BB愉快入睡，咁梗係唔駛改。

但如果BB每晚做睡前儀式時都會喊，尤其是啱啱開始做，而你發現晚晚都會有一個動作或說話會trigger到BB喊，咁你仲繼續執行同一套儀式，有乜嘢意義呢？例如，一放低BB喺床同佢著睡袋就會喊 ，可以試吓畀佢坐喺你大脾著，或者可以改早啲著；又例如放床後熄燈佢會喊，就試吓抱住佢熄咗燈至放床。

要順利執行睡前儀式，令囝囝囡囡愉快入睡，好多時其實需要一啲創意，要think out of the box，千祈唔好諗住定咗套睡前儀式就唔可以改。好多時只係調動吓啲步驟，或者改個地點做，已經可以避免trigger到BB，令佢唔會咁抗拒㗎嘞！

此外，當BB逐漸長大，睡眠儀式亦要按照需要去作出調整。

2歲前建議喺進行睡前儀式時要盡量平靜，避免BB受過度刺激而瞓唔著。但BB成長成為小朋友後，喺進行睡前儀式時一齊開懷大笑，更有助放鬆心情，小朋友都可以懷著快樂嘅心情入睡！

而且，對於2歲以上嘅小朋友，用遊戲嘅方式係最易令佢哋合作。例如用隻陪睡公仔引小朋友入房，再放响床上叫小朋友陪公仔瞓覺。睡前儀式亦可以唔駛再咁rigid，次序可以有啲唔同都得，保持愉快心情最重要，不過落床後最後一個步驟一定唔可以冇，例如唱隻歌，跟住講早抖。

以下嘅例子可以作為睡前儀式嘅一部份：

• 一齊做瑜珈拉筋動作
• 一齊做有助放鬆的呼吸動作，或簡單深呼吸十次
• 一齊唱歌
• 揀聽日要着嘅衫
• 講吓今日發生嘅事
• 傾吓聽日嘅計劃
• 同房入面嘅嘢講早抖

記住，想BB瞓得好，要佢鍾意瞓覺至得，睡前儀式嘅目的就係令佢能夠安心舒服呀！

日間小睡都需要做睡前儀式嗎？

進行睡前儀式嘅主要目的，係畀BB做好心理準備，知道幾時應該去瞓覺。所以，日頭都需要有睡前儀式，只不過簡單啲咁解，一般會係晚間睡前儀式嘅最後5分鐘（整套儀式大概在15-20分鐘以內）。

睇睇以下例子：

-晚間-          -日間-

刷牙

入房              入房

睇書

熄燈

換片／睡衣     換片／睡衣

放上床            放上床

唱歌               唱歌

拉上窗簾         拉上窗簾

熄燈　　　     熄燈

講早抖            講早抖

閂門               閂門

沖完涼係咪會好瞓啲？

有媽咪問：「沖完涼係咪會好瞓啲？係咪一定要夜晚瞓覺前沖個涼？」

沖涼對初生BB嚟講，特別有安眠作用，因為浸喺暖水中嘅感覺，同喺媽媽肚入面時相似，而且會令體溫下降幾度，令BB更安穩易入睡。

但咁並不代表，一定要瞓前沖個涼嘅，因為...

• 沖涼對初生BB有安撫作用，但對於月齡較大嘅BB嚟講，可能反而會令佢哋越沖越興奮！（尤其是如果你買咗好多沖涼玩具，又畀BB拍水踢水嘅話 ）

• 日日沖涼，對BB皮膚嚟講其實未必係好事，無論你用幾天然嘅沖涼液或人工皂，始終會洗走咗保護BB皮膚嘅天然油脂，令皮膚乾燥，甚至引起其他皮膚問題

• 要安撫BB嘅情緒，除咗沖涼外仲有好多其他嘢可以做。初生時可以用包巾（記得開始翻身時就唔可以用嘞），BB亦好鍾意聽爸爸媽媽唱歌㗎（但播音樂會對大腦造成刺激，就唔建議瞓覺播催眠曲嘞 ）

• 如果習慣將沖涼作為睡前儀式嘅一部份，咁當有需要提早就寢時間嘅話，就會好趕，甚至BB喺沖涼時已經攰到大喊唔合作...

瞓前睇本書，會瞓得好啲嗎？

好多人以為，睡前儀式即係要同小朋友睇書講故仔，其實唔一定㗎！

睡前儀式嘅意思，係要每晚都以同一個次序去做一系列準備入睡嘅活動，包括入房、閂門、換片、餵奶、熄燈、開白噪音等等。

係呀，細微到幾時閂門熄燈，都要定埋個次序㗎！

尤其係月齡細嘅BB，好容易受到刺激。所以，必須一步一步慢慢去做，至能夠令BB明白到做完A做B，做埋C跟住就會瞓覺，成為習慣就自然會安心，願意合作去準備入睡。

係呀！由BB出世返屋企開始，其實已經可以開始睡前儀式，但就千祈唔好同佢臨瞓之前睇書嘞...

因為，初生BB清醒時間好短，冇時間攪咁多嘢。而且，書其實對大腦會造成好大刺激，有啲小朋友仲會越睇越興奮，睇完一本又要第二本...

另外仲有一點好重要嘅係，睡前儀式係培養親子關係嘅好時機，所以同你囝囝囡囡保持住connection非常重要。如果你有你講故事，囝囝囡囡就自己行嚟行去玩，甚至可能一直大喊，咁都會失去咗睡前儀式嘅意義...

透過睡前儀式令小朋友鍾意瞓覺

最後，同大家分享一個例子：Ka Yan媽媽成功利用睡前儀式，令佢而家已經2歲嘅小朋友由4個月開始已經能夠順利入睡，到大個後仍然鍾意瞓覺，甚至會主動話要去瞓覺添！

當時Ka Yan媽媽寫咗篇分享文，之後亦間唔時會update佢囝囝嘅情況，以下係最新一篇update：

Ka Yan媽媽：

「話咁快我仔仔足咗兩歲喇！中間有段時間經歷過睡眠倒退期s、番工、湊仔….忙到冇update大家。我覺得睡眠儀式嘅建立真係好重要！！

我仔仔而家識得講少少短句子，佢仲會提我睡眠儀式要做咩。我哋更新版嘅睡眠儀式係：佢沖涼、爸爸同佢玩時我去沖涼、到我去佢房時爸爸就會走、我同佢睇書、落床、開白嘈音、熄燈、拖手、瞓覺。

而家當佢沖完涼，佢會自動去搵爸爸玩，跟住同我講「媽媽沖涼，拜拜媽媽」。到我沖完涼去佢房時，佢一見到我就會自動同爸爸講「拜拜爸爸」（頭也不回），跟住會自己揀書去床度同我一齊睇。到抱佢落床後，有時佢會提我「媽媽開音樂」，之後每次都會講「媽媽拖手手」。

雖然要拖手拖到佢瞓著，但一般佢10分鐘內會瞓著，所以都可以接受，而且我要珍惜佢主動拖我手嘅日子。

Catherine，要再一次多謝你分享嘅兒童睡眠同育兒資訊！」

如果你對於睡前儀式仲有乜嘢疑問，又或者睇完成篇文，但仍然唔知點解BB會咁抗拒做睡前儀式，歡迎你搵我傾傾，亦可以報讀網上課程，有更詳盡嘅講解！

Dolce Sleepers嘅獨門心法，融合咗健康睡眠及RIE育兒法［尊重孩子 相信孩子］嘅理念，教你點樣以 sensitive + responsive 的方式，靈活處理睡眠問題，唔單止令你同BB都能夠有覺好瞓，亦能夠令親子關係更融洽。

想BB瞓得好，絕對唔需要狠心由得BB喊㗎！

［甜睡寶寶網上課程］

0-5個月：甜睡寶寶計劃

6個月-2歲：睡眠調整全面睇

2歲以上：幼兒自行入睡課程

報讀課程，仲可以同我喺Zoom直接傾你BB嘅情況㗎 😉 想知道課程係咪適合你同你BB，歡迎搵我傾傾 😁

Email: catherine@dolcesleepers.com

FB Messenger: m.me/dolcesleepers

查詢電話諮詢計劃

Categories: : 甜睡寶寶