抱睡一定唔得？做睡眠訓練就一定好？自行入睡就可以解決夜醒問題？

有媽咪問：「有父母訓練BB自己入睡，亦有父母抱住BB直至佢瞓著，想問邊個方法較正確？」

其實，「睡眠問題」係好主觀㗎！

係咪一定要做睡眠訓練，令BB自行入睡呢？

有啲父母鍾意抱住BB氹佢瞓，咁如果BB瞓得好，唔會一晚醒幾次大喊；又或者父母唔介意BB會醒，抱佢／奶睡瞓返就ok，唔覺得辛苦，唔覺得係一個問題嘅話，係咁其實係冇需要去做任何改變。

但如果你覺得BB而家瞓得唔好，例如次次都要氹好耐至瞓到，瞓著後好快又醒，令你覺得好攰，唔想再咁樣落去嘅話，咁就需要搵出睡眠問題嘅成因，再制定一套全面嘅睡眠計劃去解決嘞！

而睡眠訓練，其實只係睡眠計劃嘅其中一個部份。

因為，想BB瞓得好，其實有好多因素需要考慮，例如睡眠環境、作息時間、日間活動、仲有心理因素等。

所以，唔係話做完睡眠訓練就一定會瞓得好，我曾經有接過幾個case，媽咪搵其他顧問幫手做睡眠訓練，雖然事後BB能夠自行入睡，但仍然會每晚夜醒大喊瞓唔返，日間小睡亦瞓得好短，就係因為忽略咗安睡嘅其他條件。

個案分享：

《識得自行入睡唔代表會瞓得好 - Ruka》

《BB唔係機械人 - Mia》

相反地，亦唔係只有做咗睡眠訓練先至可以瞓得好。我冇同自己孖仔進行過睡眠訓練，但由於我哋自少就培養咗良好嘅睡眠習慣，所以孖仔6個月大就已經可以連續瞓到11小時唔駛食夜奶。

相關資訊：［甜睡寶寶計劃］，助你同BB培養良好睡眠習慣！

所以，入睡方式同其他育兒問題一樣，冇話正唔正確，而係講合唔合適（或頂唔頂得順 ），係一件好主觀嘅事嚟...

BB半夜大喊，係因為嚇親呀！

「如果齋抱睡我地都覺得還好，未係好大影響生活，我地都應付到... 但當BB夜晚醒得多，就會對我哋嘅睡眠質素有影響...」

我知有好多媽咪爹哋都會咁樣諗，當抱住BB氹瞓覺，睇住BB瞓到好冧嘅樣，幾辛苦都值得…

但當BB去到大約4個月大嘅時候，突然開始頻頻夜醒大喊，每次都要抱住佢搖呀搖，甚至喺房內行嚟行去，BB至肯瞓返...

點解抱住BB氹佢瞓覺，係導致BB半夜大喊嘅直接原因呢？

當入睡時被抱住，BB會以為有人一直抱住佢...　點知夜晚半夢半醒之間發現冇咗人，喺一個陌生嘅地方，於是就會嚇親大喊，仲點會自己瞓得返呢？

所以，成日半夜驚醒大喊，其實BB都唔想㗎！

BB要人抱至肯瞓，係咪寵壞咗？

而且，亦唔係BB天生鍾意畀人搖嚟搖去，更加唔係寵壞咗，佢哋只是習慣咗要畀人搖住，至瞓得著咋！

初生嬰兒未習慣子宮外嘅環境，又容易受到過度刺激，所以成日都會大喊。作為父母，我哋當然希望能夠幫到BB，並且以安撫BB入睡作為自己嘅責任。

呢種協助BB入睡嘅方式，稱為［睡眠關聯］（sleep association），BB自小習慣咗呢種入睡方式，就會將搖晃嘅感覺，同睡眠連埋一齊，形式關聯。於是，每次醒咗都必須再次借助搖晃嘅感覺，至可以再瞓得返。

需要依賴睡眠關聯入睡，並唔一定係壞事，好多成年人習慣開住電視瞓覺，都係睡眠關聯嘅一種。但當所使用嘅協助入睡方式，唔能夠長遠繼續用得到（每日抱住10kg重嘅BB幾個鐘，手都斷），並且會令BB嘅睡眠質素受到影響的話，咁呢個睡眠關聯就會成為一個困擾嘅睡眠問題嘞！

唔想BB慣咗成日要抱要奶睡，但佢成日喊根本都放唔低...

好多新手媽媽嘅困擾，係BB成日喊，要抱住或啜住至瞓到，於是怕BB依賴咗會瞓得唔好，於是message我，想知點樣可以唔駛抱，或者問要等到BB幾大，至可以做睡眠訓練。

BB喊有好多原因，但最常見嘅原因，係睡眠不足導致疲勞過度，即係BB攰得滯。

唔知你有冇試過，個人攰到唔單止冇晒力手軟腳軟，甚至攰到覺得個人好痛嘅感覺...

BB嘅體力好低，攰得滯覺得唔舒服，就會一直爆喊，要抱或啜奶，放低一分鐘都唔得（好多時會被誤解為BB缺乏安全感，其實唔係囉！）

所以，如果你好擔心BB慣咗要人抱至瞓到，令佢夜晚會不斷夜醒爆喊瞓得唔健康，影響BB嘅大腦及身體發育，你要做嘅並非同BB做training，放佢落床唔抱，而係必須先掌握好理想嘅放床時間，同埋抱持住正面及正確嘅心態。

有一點經常被誤解嘅係，其實未滿6個月嘅BB，對入睡方式未有好重依賴，未至於一定要抱睡或奶睡至瞓得到。

甚至好多大個啲嘅BB，其實都能夠接受唔同人用唔同嘅哄睡方式，例如媽媽要奶睡，工人姐姐要抱，爸爸就陪住已經得。

所以，對於初生BB嚟講，只要營造好安睡環境，加上掌握好放床時間，就已經能夠提高BB喺床仔自然入睡嘅機會，即係佢自己喺床仔食吓手仔踢吓腳仔然後瞓咗！

（點樣做得到？喺［從遊戲培養良好睡眠習慣］有講解做法）

當然，未必每覺／每日都咁順利，只得0-5個月嘅BB，重點在於嘗試，瞓唔到大喊就抱返啦！下一覺至再試過，唔好勉強！

再提多次：只得3個月嘅BB，唔需要亦唔應該做任何睡眠訓練！（之前分享過一個令人好心up嘅case）

我相信，BB天生就擁有自行入睡嘅能力，但佢哋會從我哋嘅回應同安撫方式中，養成奶睡搖睡抱睡嘅習慣，所以冇咗我哋就瞓唔到。

所以，其實唔係BB鍾意人抱住嚟瞓，只係佢唔知道原來仲有其他入睡方式。

自行入睡VS床上入睡

做電話諮詢時，絕大部分媽咪爹哋都話希望BB能夠自行入睡。

不過傾傾吓就會發現，其實佢哋所指嘅只不過係戒奶睡或抱睡，希望BB能夠喺床上入睡而已。

究竟自行入睡，同埋床上入睡有乜嘢分別呢？

自行入睡嘅定義，係你放咗BB落床後，就可以離開間房，佢會自己由清醒，慢慢感到有睡意，然後喺床上瞓著覺。所以，如果你一直陪住佢，或者要拍住佢pat pat瞓，甚至係抱住搖到佢差唔多瞓著然後放床，呢啲情況仍未算係自行入睡㗎！

而床上入睡嘅意思，只係單單唔再奶睡抱睡搖睡孭睡咁解。

兩者嘅分別，在於自行入睡即係完全冇你嘅存在，都可以瞓得著。而床上入睡，其實只係自行入睡嘅第一步，當BB習慣喺床上入睡，你會需要慢慢抽身，減低你嘅存在感，令BB唔再需要依賴你至瞓得著。

咁係咪一定要做到自行入睡，至能夠解決夜醒嘅問題？

其實唔一定㗎！

得幾個月大嘅BB，唔一定要自行入睡，大人絕對可以喺房陪住佢。但要喺BB清醒時放床，畀佢喺床上經歷由清醒到有睡意再入睡成個過程，咁佢半夜醒咗至唔會嚇親，能夠自己瞓得返。

之不過，想做到床上入睡，並非就咁放低BB就得。事前必須要先做好各項準備，移除令BB無法喺床上安心入睡，以及夜醒自己瞓唔返嘅障礙。

有一點要講清楚嘅係，喺睡眠週期之間醒一醒係好自然同常見嘅事，就算係成年人亦都經常發生，只係我哋好快又再瞓返，所以冇察到咁解。

當BB能夠自己瞓唔駛人抱住氹至瞓得著，半夜BB醒嘅時候，就有更大機會能夠再次自己瞓得返，唔駛大喊求救。既然你冇聽到BB喊，咁就等如係BB瞓過夜啦！至於點樣協助BB學識自行入睡呢個問題，就要視乎BB嘅年齡、性格、睡眠環境，以及家長嘅教養方式而定。

希望戒抱睡奶睡, 點樣可以減少掙扎呢?

改善夜醒嘅其中一個重點，係畀BB喺床上入睡。對好多媽咪而言，呢個亦係最難嘅部份。

就咁放佢落床，會大喊喎！咁點做好呢？抱定唔抱抱要等幾耐至抱抱起後係咪要放返低又喊點算？？？？？？？？

我明，問題一定有好多。 但坦白講，我唔會能夠簡單答到你。

因為我相信，每個BB都係獨一無二嘅，加上每位媽咪嘅性格同對BB嘅回應方式都有唔同，所以冇一套方法可以套用喺所有BB身上。而就算係用同一個方法，細節上都會有所不同。

之所以，同一般嘅網上睡眠課程唔同，「睡眠調整全面睇」嘅重點，並非教點樣做正式嘅睡眠訓練*，但會講解兩個漸退式戒抱睡奶睡嘅方法，相對容易執行。

（*課程bonus webinar［睡眠訓練初探］會講解傳統睡眠訓練方式做法，同你分析埋利與弊）

雖然唔能夠詳細講到做法，但我可以同大家分享根據 RIE育兒法 「尊重與信任」 嘅理念，所引伸出嚟嘅大方向 -- 同BB建立一個尊重互信嘅親子關係：

發展雙向溝通

我哋越早開始同真正去溝通，就越早能夠發現，BB原來真係能夠理解我哋嘅意思。例如，抱起孩子前先問一聲：「你準備好畀我抱起你未呀？」然後耐心等候BB回應。當你感到BB願意畀你抱，再張開雙手講：「好，我而家要抱起你嘞！」，慢慢你就會察覺到BB想向你舉起雙手。

簡單及真誠地同BB預告我哋要進行嘅改變

例如：「沖完涼、我會餵你食奶，然後幫你著睡袋。我放你落床休息時，會唱歌畀你聽。通常我抱住你搖到你瞓著覺，但今晚，我只會抱一抱你，然後就會坐在床邊，陪住你瞓覺。」

支持、接受、並且認同BB嘅感受

例如：「我聽到你唔係好開心。我知道，你習慣我抱住你瞓，瞓在床上你覺得好難放鬆休息。我喺度，我會一直陪住你。」

建議來源：JANET LANSBURY elevating child care

要成功令BB習慣喺床上入睡，需要接受訓練嘅，其實係大人。

學識點樣觀察BB，明白佢想表達嘅意思，瞭解佢嘅需要，再作出恰當及一致嘅回應，呢個至係真正令BB得到安全感嘅方法！

當BB能夠喺床上入睡，就算仍然需要你陪住，但已經踏出咗成功嘅第一步嘞！

DolceSleepers獨門心法

每講到育兒問題，總會有人話：一本通書唔能夠睇到老 📚

嬰幼兒睡眠亦一樣，有好多唔同嘅方法。只不過，坊間好多所謂絕招，都冇任何科學根據，甚至去到迷信嘅地步 🙈

睡眠其實係科學嚟，想BB瞓得好，就必須對人體晝夜節律生物學，以及嬰幼兒睡眠科學有基本認識。

尤其是，如果你打算同BB戒奶睡抱睡，我非常建議要睇多啲唔同嘅資料，瞭解各種方法嘅利與弊。

因為，沒有最好，只有最適合。

DolceSleepers獨門心法建基於［RIE育兒法］，講求以sensitive及responsive嘅心態去回應BB。

因為，我相信視乎BB嘅需要，以及當時實際嘅情況去作出回應，至係「尊重BB」嘅做法。所以，你需要用心去觀察BB，有耐性去慢慢瞭解BB想向你表達嘅訊息，從而摸索出點樣至係最恰當嘅處理方式。

呢套方式唔容易去做，但只要你掌握到重點，之後好多問題都會能夠識得靈活處理，唔會因為冇人話你知要點做要手忙腳亂，不知所措。

只有你，至能夠成為你BB嘅睡眠專家！

如果你有願意去花心機花時間，去瞭解你嘅BB，搵出對你同BB最適合嘅睡眠調整方式，我好樂意助你一臂之力！

［睡眠調整全面睇］ 網上課程會用一套全面及有系統嘅方式，話你知點樣制定出一套能配合你BB，以及大人活動時間嘅 作息時間表，以及點樣為BB做好瞓覺嘅心理準備，目標係令你BB 鍾意瞓覺！

課程設有［學員專屬群組］，可以隨時出post發問，我亦會喺群組每星期開Q&A（一定會覆）

另外仲設有 Zoom歡迎會，邀請每個月新加入嘅學員參加，我會親自幫你分析睡眠問題成因，同埋講解調整心態及重點，助你踏出成功第一步。課程仲有其他bonus及特別優惠，希望幫到你哋解決睡眠及其他育兒問題，湊得輕鬆啲，親子關係亦緊密啲！

如果BB未滿6個月，可以參加［甜睡寶寶計劃］，免費有埋0-5個月［健康睡眠工作坊］。

［睡眠調整全面睇］學員仲可以隨時以優惠價預約電話諮詢 ，我會一直為你提供支援，直到你囝囝囡囡3歲㗎！

對課程有任何疑問，歡迎電郵至catherine@dolcesleepers.com，或PM Dolce Sleepers正向睡眠及教養學堂搵我傾傾！

Categories: 甜睡寶寶