幼兒睡眠心理知多啲

你知道，嬰兒睡眠同幼兒睡眠，有一個根本上嘅分別嗎？

當 BB 仲係幾個月大嘅時候，重點係：

1. 制定一個能夠配合 BB 需要嘅時間表（就算同月齡都可以有好大分別）
2. 營造好安睡環境（黑、平靜、溫度適中）
3. 令 BB 喺床上入睡（唔一定要自行入睡都可以瞓得好）

只要做好以上 3 點，一般嚟講 BB 已經能夠瞓得好唔錯。但當 BB 變成小朋友，成件事就唔再係咁簡單嘞！因為，心理因素影響之大，足以蓋過以上 3點。

成日收到媽咪爹哋嘅 SOS 求救，小朋友突然拒絕瞓覺 — 一係爆喊， 一係玩到好興奮… 而且，明明一直可以一覺瞓天光，點知突然出現夜醒大叫嘅情況， 「似乎 」之前所下嘅苦功，通通白廢…

其實，呢啲情況，最終都可以歸因於小朋友嘅心理發展所致。呢一點，好多人都未必會諗到。

RIE 育兒法好注重瞭解 BB / 小朋友各方面嘅發展，尤其是佢哋嘅情緒及心理層面。

點樣做，能夠令小朋友願意合作呢？
點樣做，能夠令小朋友安心瞓覺呢？
點樣做，能夠令小朋友瞓得開心呢？

瞓覺，係要放鬆嘅事。

日日都展開一場拉鋸戰，最終以怒吼 對爆喊 ，只會令小朋友對瞓覺呢件事越嚟越抗拒...

可以點解救？將遊戲融入睡眠之中，令睡前儀式成為一個甜蜜嘅親子時間，令小朋友能夠愉快入睡，鍾意瞓覺！咁至係上策！

瞓覺嘞，好唔好?

「我哋而家入房瞓覺嘞，好唔好?」「唔好!」

以上呢個情境，係咪每日都喺你屋企發生呢？

無論你問佢刷牙好唔好、換睡衣好唔好、著睡袋好唔好，都會同你講 —「唔好!!! 」小朋友事事答唔好，係正常嘅，因為佢哋察覺到自己開始有自立能力，會有自己嘅諗法，會想話事，去確立自己嘅 identity。小朋友會同你 say no，係因為佢同你相處時，有足夠嘅安全感，所以至會夠膽同你唱反調。

有啲情況，我哋係要放手嘅... 例如小朋友幾時瞓著，呢點我哋控制唔到。只不過，佢哋幾點要上床準備休息，呢點係我哋大人嘅責任，唔可以由得佢玩，玩到攰至斷電，攪到睡眠不足。

問題係，同佢講要上床瞓覺佢實話唔好，咁應該點做好呢？

唔好問佢好唔好囉！

你可以同你囝囝囡囡講：「我哋而家要入房（唔駛提瞓覺），你想我哋拖住手入去，定係我抱你入去？」

同樣道理，唔好問佢刷牙好唔好... 問佢：「你想用呢枝紅色牙刷，定係藍色牙刷？」「你想用呢枝味牙膏，定係味牙膏？」

換睡衣亦一樣... 問佢：「你想著有貓仔呢件睡衣，定係有兔仔呢件？」

畀小朋友兩個選擇，畀佢揀 A 定 B，咁樣可以滿足到佢想話事嘅心態，但同時結果又能夠掌握喺我哋手上。咁咪皆大歡喜囉！

記住：唔係真正有得揀，就唔好問小朋友「好唔好」嘞！

囝囝成日玩到好興奮，唔願意停低瞓覺?

你囝囝囡囡臨瞓前成日玩到好興奮，唔願意停低準備入睡嗎？

除咗睡前儀式之外，你可以加多個「結束儀式」㗎！

結束儀式，係一個令小朋友平靜落嚟，準備入睡嘅簡短步驟，只有大概 1-2 分鐘。

例如：

• 唱一首歌
• 跟玩具或公仔道晚安
• 數手指／A-Z／1-10
• 10 個飛吻…

結束儀式嘅重點，係要有一個明顯嘅結束，畀小朋友知道做完就係時間瞓覺。久而久之就會習慣，仲好 enjoy 添！

P.S. 睡前儀式，雖然叫做係「儀式」，應該每日都一模一樣，但都唔代表唔可以改㗎！

當然，如果做開嗰套 work 嘅，能令小朋友愉快入睡，咁梗係唔駛改。但如果每晚做睡前儀式時，小朋友都會扭計，咁你仲繼續執行同一套儀式，明知會 trigger 到佢喊，都仲繼續去做，咁有乜嘢意義呢？而且，當 BB 逐漸長大，睡眠儀式要按照需要去作出調整，都好正常呀！

所以，千祈唔好諗住定咗套睡前儀式就唔可以改。尤其是啱啱開始做，但有啲位唔順嘅話，就改啦！如果明知你一放低 BB 喺床同佢著睡袋就會喊 ，咁就試吓畀佢坐喺你大脾著，或者可以改早啲至著呀！如果明知放床後熄燈佢會喊，就試吓抱住佢熄咗燈至放床啦！

要順利執行睡前儀式，令囝囝囡囡愉快入睡，好多時其實需要一啲創意，要 think out of the box。好多時只係調動吓啲步驟，或者改個地點做，已經可以避免 trigger 到 BB，令佢唔會咁抗拒㗎嘞！想囝囝囡囡瞓得好，要佢鍾意瞓覺至得，睡前儀式嘅目的就係令佢能夠安心舒服呀！

記住：保持一致 ≠ 一成不變

伸延閱讀：［睡前儀式，你做得啱唔啱？］

一放上床就企起爆喊，又要抱又要開燈，點做好？

Margaret 媽媽問：「依排囝囝（21m）下午同晚上拒絕 nap & sleep... 一放上床就企起身大喊... 我要抱佢起身，開返燈，再叫佢同佢再燈/毛公仔講 byebye，之後放佢落床 (有時要重覆多 2 次)，佢先肯伏低... 請問此問題可以如何改善？我見你話 BB 應該 2.5 歲才會怕黑... 謝謝你...」

Catherine：未必關怕黑事，純粹係拖延法，諗方法拖得一分鐘得一分鐘... 因為佢唔捨得媽咪你呀！之不過，繼續難捨難離咁樣，最終往往會令你開始覺得炆... 當講道理唔 work，就開始鬧...結果，本來應該係好 sweet 嘅就寢時間，本來囝囝因為好愛你而做出嘅行為，最後變成大喊收場...

唔想咁樣，可以點樣？對付拖延法，你要睇穿佢嘅招數，首先出招，令佢之後冇得再出招！例如請佢負責熄燈，畀定水佢飲，做晒所有佢有可能用嚟拖延嘅事，落床前同佢講定唔會再滿足佢任何要求，然後堅守，咁就 ok。小朋友越嚟越大，會有測試行為，呢個係必經嘅階段。

你必須要保持冷靜，堅守住規則，咁佢至可以安心。

過咗幾日，收到 Margaret 媽媽嘅 update：Hi Catherine, 多謝你!! 依 4 晚我都用同樣方法，俾佢自己熄左個夜燈 (表示熄左燈就要合埋眼睛上床訓覺)。如果佢久久唔肯按制熄燈（拖延!），我就幫佢熄，之後同佢講夠鐘訓覺了，燈燈都要訓覺。依 4 晚佢都有企起身抗議，但抗議時間比之前少左，大約 5-10 分鐘，也沒有再大喊到淚流滿面流晒鼻涕，佢只係喊幾聲，叫下口號"燈燈/bear bear...."，之後就會靜下來伏低入睡。多謝你，真係每個 stage 都會有唔同既挑戰，以為佢終於自己識伏低訓，但愈大佢又愈有想法同要求，要用唔同方法對付/處理。

Catherine：咁就好嘞! 係㗎，每個階段都有唔同嘅挑戰，年紀越大越需要清晰設限，同時又要顧及到佢哋嘅情緒（因為小朋友越大，反抗力越高），所以必須要從瞭解小朋友嘅心理出發至得㗎！其實，小朋友唔肯瞓覺，係好正常嘅事嚟，就算已經識得自行入睡嘅小朋友，都總會有唔肯瞓覺嘅時候。你需要做嘅，只係調整你嘅心態，以及同囝囝囡囡嘅溝通方式。

記住：入睡前花啲時間同小朋友相處係好重要，不過都要清晰畀小朋友知道夠鐘瞓覺。猶豫不決，反而會令小朋友未能安心㗎！

想囝囝囡囡聽你講嘢，唔係大聲就得

我以前係學唱歌劇嘅，要大聲我可以好大聲 （唔駛用咪 ），不過孖仔都一樣唔會畀反應...

所以，希望小朋友聽你講嘢，重點係：

• 幾時講
• 點樣講

尤其是叫小朋友去準備瞓覺。

當佢哋玩到興高采烈，你講乜都只會當耳邊風... 如果你出手停止佢，跟住嘅只會係尖叫同淚水... 咁可以點做呢？

有媽咪同我分享過，佢哋會請小朋友同玩具講拜拜，成為睡前儀式嘅第一步。

要成功用到呢招，你嘅做法同語氣好重要。如果你以命令嘅語氣去講，一樣唔會 work 囉！你必須要行埋去你囝囝囡囡身邊，踎低或坐低喺隔離 join 佢。

你可以表示見佢玩得好開心，然後畀啲時間佢回應你，同你分享佢嘅喜悅。咁樣做，至能夠同囝囝囡囡 connect 到，佢至會聽到你講嘢。

然後，再請佢同玩具講拜拜，畀佢慢慢去抽離玩嘅狀態。重點係畀佢覺得，你唔係命令緊佢，而係希望佢同你合作，甚至畀佢有 in charge 嘅感覺（例如先同邊件玩具講拜拜，點樣處理件玩具等）。

咁樣，自然能夠避開場角力賽啦！

記住：Kids will do well if they can. ~Dr. Ross Greene

後話

好多人諗住，等 BB 大個啲就自然會瞓得好...


一般嚟講，去到 2 歲左右，日間小睡會自然延長，就算過咗清醒時間，都一樣可以瞓到 2 個鐘或更長。不過，夜晚就仍然會因為攰得滯，或者午睡時間太接近就寢時間而出現夜醒早醒（係呀，清醒時間太短都一樣有問題㗎！）

去到 3 歲，有啲小朋友已經唔再需要瞓晏覺，清醒時間對睡眠嘅影響就會相應下降。注意我講嘅只係對睡眠嘅影響，3 歲嘅小朋友仍然要瞓 11-12 小時至足夠。如果長期睡眠不足，對小朋友嘅情緒、抵抗力、甚至學習能力、專注力同記憶力都會有負面影響。

德國腦神經科學家 Manuela Friedrich 曾進行一項研究，邀請咗 90 位月齡介乎於 9 至 16 個月大嘅 BB，畀一啲陌生物件嘅圖片佢哋睇，再作一個名畀呢啲物件（確保 BB 對聽到嘅聲音完全陌生）。佢哋同呢啲 BB 戴上腦神經探測儀器，去檢視 BB 大腦對呢啲物件及聲音嘅反應。

結果發現，瞓醒晏覺嘅 BB，能夠記得呢啲物件嘅名稱，但冇瞓晏覺嘅 BB 就唔會記得。除此之外，研究仲發現，有瞓晏覺嘅 BB，見到類似嘅物件仲識得分類添！

另一個由美國認知腦神經科學家 Rebecca Spencer 以及佢嘅學生 Sanna Lokhandwala 所進行嘅研究，係同一批 3 至 6 歲嘅小朋友睇書講故事，然後試吓佢哋記唔記得故事嘅次序。同樣地，有瞓晏覺嘅小朋友，答案準確好多，而且到第二日問返佢哋個故事都仲記得。

所以，無論係 BB 定小朋友，其實都好需要瞓晏覺，仲需要瞓得充足。

咁即係要等到幾時，至唔駛再煩小朋友唔肯瞓覺，同埋半夜醒咗大喊呢啲問題？

德國一項研究顯示，好多家庭要去到小朋友 6 歲*，至能夠再次有覺好瞓！係呀，好可能仲有排捱㗎… 唔想咁樣嘅話，係時候作出改變嘞！

幫 BB 培養健康嘅睡眠習慣、定立規律嘅作息活動時間，係第一步。仲有就係，令 BB 覺得瞓覺係一件開心舒服嘅事！

希望得到專業的正向睡眠建議，令你囝囝囡囡鍾意瞓覺？

［幼兒自行入睡課程］

四場講座合輯，適合育有２歲以上幼兒的家庭

以建立安全感為重點，令孩子愉快入睡，睡得健康

同坊間好多睡眠顧問或睡眠課程嘅諗法唔同，Dolce Sleepers嘅宗旨，唔單止希望小朋友能夠一覺瞓天光，而係令小朋友鍾意瞓覺！🧡 

所以，你唔需要留低小朋友喺房喊，同佢做睡眠訓練 🙅‍♀️ 只要移除導致入睡困難，以及夜醒瞓唔返嘅障礙，並且令小朋友得到滿滿安全感，自然就可以瞓得好，瞓得開心！ 

修讀課程後，你將會能夠： 

• 學識點樣安排及調整作息時間 
• 增加小朋友喺進行睡前儀式時嘅配合度 
• 減低入睡前嘅掙扎及哭泣 
• 以逐步減低大人存在感嘅方式，令小朋友能夠安心自行入睡 

適合：育有２歲以上幼兒的家庭

🎁 BONUS 🎁 
即時報讀課程，可免費參加 Zoom 歡迎會，跟正向睡眠顧問Catherine進行直接諮詢

課程詳情

Categories: : 甜睡寶寶