點用白噪音至能有助入睡？

Catherine Author

好多BB都會有成日大喊唔停，難以入睡嘅問題。全日抱住氹BB瞓覺，更加係好多媽咪爹哋嘅惡夢 😨

好多人會話播白噪音，甚至聲稱白噪音機係安睡神器，一開就能夠令BB瞓著覺！

白噪音係咪真係咁神奇，有安眠甚至催眠作用呢？係咪買部機，就可以令BB容易啲入睡同瞓得好呢？

答案：唔係你想像咁囉 🙅🏻‍♀️

先講講白噪音究竟係啲乜嘢嚟先…

白噪音對睡眠有乜嘢幫助？

白噪音（white noise）係一種有規律性嘅聲音，例如吸塵機同風筒嘅聲音等。但有好多人都唔知，其實冷氣機、風扇同抽濕機嘅聲一樣都係白噪音嚟㗎！呢啲聲音大人一般都已經好習慣，唔會覺得太嘈。

白噪音有助改善BB嘅睡眠品質，係因為：

1. 營造胎內環境

當BB仍然喺媽咪肚入面嘅時候，其實個環境好多聲音，有心跳聲有血液流動嘅聲音。所以，一個完全安靜嘅環境，有啲BB可能會唔適應。白噪音可以營造胎兒响子宮內所聽到嘅聲音，呢種熟悉嘅聲音，可以增加BB嘅安全感。

2. 減低外間刺激

白噪音能夠掩蓋環境中大部分嘅聲音，例如人聲車聲，或大人喺睡房以外空間活動嘅聲音，減但BB受到突如期來嘅聲音所干擾嘅機會

3. 成為睡眠關聯

當BB一聽到白噪音，就知道係時候瞓覺（注意：同睡前儀式其他步驟一樣，需要時間㗎！同埋記得要臨瞓至開，唔好一入房就開呀！）

的確，對於初生BB嚟講，白噪音能營造返喺媽咪子宮內嘅聲音，增加熟悉感。不過講到播啲聲就能夠令BB入睡，未免太誇張 😅 

白噪音唔會有催眠作用，希望BB容易啲瞓得著，重點係注意清醒時間（立即登記參加免費課程 (link)，我會講解Dolce Sleepers嘅入門心法，教你用5招解決BB入睡困難嘅問題 😉）

只不過，係咪一定要用白噪音呢？

唔係囉！孖仔由細到大都冇用過（我住山上小鎮好靜 😅）當然，香港環境好多時都真係需要冚一冚街外聲音，或者哥哥姐姐喺廳玩到好興奮嘅聲音 😆

只不過，好多時亦有媽咪爹哋擔心，長期開住白噪音，會影響到BB嘅聽覺，甚至語言發展。

白噪音會對發展造成影響嗎?

白噪音主要用途，能遮蓋突如其來嘅環境噪音，避免BB無法入睡或者瞓瞓吓被嘈醒。但係，有啲媽咪爹哋同我講，有研究指出白噪音會影響聽覺，甚至可能會延誤言語發展。

係真唔係呢？

睇返個研究，原來係拎咗市面上14部白噪音播放器，放喺距離BB床30、100、200厘米嘅地方，再測量音量，估計對6個月大BB嘅影響。研究指出，當部機放喺距離30厘米嘅地方，較到最大音量時，所有播放器都超過50分貝，其中3部仲去到85分貝添！

等等先，50分貝（dB）即係幾大聲呢？

• 風筒係90dB
• 吸塵機係70dB
• 正常講嘢音量係60dB
• 圖書館係40dB

其實，用白噪音嘅目的，只係營造一個相對平靜嘅環境，而唔係想播到勁大聲令BB乜都聽唔到囉！而且，使用白噪音時，其實需要跟住指引，知道清楚應該點樣用至得。所以，呢個研究嘅情景，實際上應該唔會發生...

咁白噪音對言語發展又有冇影響呢？

呢個疑慮嘅背後原理係，當BB長期聽住一種聲音，大腦會自動tune out。而對言語發展有最大負面影響嘅聲音，係背景人聲，例如電視聲！

所以，唔好諗住想BB快啲學識講嘢，就全日不停咁開住電視或播音樂，因為咁做隨時會造成反效果，而且亦會對BB大腦造成過度刺激，影響入睡及睡眠質素！

有關白噪音及背景聲音嘅研究：

"Infant Sleep Machines and Hazardous Sound Pressure Levels" (link)
"Influences of background noise on infants and children" (link)

所以，只要用得正確，畀BB聽住白噪音瞓覺，係唔會有問題嘅！

播放白噪音要注意嘅事項

1. 音量不能超過50分貝，大約係沖涼時水聲嘅音量

2. 如果用白噪音機，要視乎噪音來源，部機可以放門邊或窗邊，要盡量遠離BB，最少留2米比較理想。

3. 白噪音喺BB瞓覺時應該連續播放，係因為如果你喺BB瞓著後熄機嘅話，當BB去到淺層睡眠發現冇咗聲，出現睡眠環境改變（夜醒主要成因之一，想知多啲可以登記參加［免費睡眠工作坊］ ），就好易會醒。呢個時候至再開返部機（自動開都一樣），已經遲咗㗎嘞 🤦🏻‍♀️

4. 當小朋友滿2歲後，白噪音嘅作用已大大減低。你可以每隔幾日減低音量，畀小朋友漸漸習慣冇白噪音都可以入睡。

提一提大家，另一類聲稱能有助入睡嘅聲音，例如浪聲，雀仔叫聲等，對大人嚟講有放鬆嘅作用，但由於聲音有高低起伏，對BB極度活躍嘅大腦嚟講，已經係好大嘅刺激，所唔建議畀BB瞓覺時聽。

咁係咪完全唔可以用音樂呢？

咁音樂呢？催眠曲可以嗎？其實，同上面提到嗰種大自然嘅聲音一樣，音樂對BB嚟講同樣會造成一定程度嘅刺激，而且音樂會有完結嘅時候，同樣亦可能會整醒BB。

希望BB能夠順利入睡，我哋要盡量避免BB受過度刺激嘅情況。如果你BB而家聽住音樂，都一樣可以順利入睡，而且又瞓得好唔會半夜紮醒，咁繼續用呢首音樂都冇問題。

不過如果你BB而家入睡時已經唔係好順利，成日大喊，就唔好諗住播音樂可以令佢瞓得著嘞！

如果你希望可以用音樂幫助BB入睡嘅話，其實有一種音樂對BB有放鬆嘅效果，就係你親口唱嘅歌嘞！你可以喺放BB落床前後，唱一陣歌畀佢聽，作為睡前儀式嘅一個部份㗎！ 😊

免費使用白噪音嘅方法

成日有媽咪問：Catherine，可以推介買邊部白噪音機嗎？🤔

我會話：你有冇部舊嘅手機？Download個免費app就得啦，唔駛嘥錢特登買部機囉 😜 要注意嘅係，記得揀個可以offline用，而且冇限時間嘅app（或可以set到12個鐘），仲要冇廣告彈出嚟令白噪音停止至得喎！

如果你去app store search "white noise"，會彈個超長嘅list ，花多眼亂唔知點揀 🙈 我可以推薦2個app畀大家 😉

第一個介紹嘅係 "White Noise For Baby"（Android），呢個app最好嘅係有fade in fade out，唔怕突然開聲會嚇親BB。而且介面超簡潔，又冇廣告，一開就用得 😁

另一個介紹嘅係 "White Noise Lite"（iphone），第一次用時揀定咗個聲音及音量，個app就會記住，一開就播到唔駛再篤嚟篤去。

提多句，開手機始終有光，所以最好喺熄最後一盞燈之前至開，部機畫面亦要較暗啲，背住BB開會比較理想。

希望BB能夠順利入睡同瞓得好，唔會單靠一件產品就得（否則就唔會咁多家庭都冇覺好瞓啦！）你要做嘅，係先瞭解BB喺唔同月齡嘅睡眠需要，同埋阻除令BB無法順利入睡嘅因素。

我哋希望做到嘅，唔係單單令BB自行入睡，而係令佢半夜醒咗，都能夠自己瞓得返。所以，唯有令BB能夠安心入睡，甚至鍾意瞓覺，至係解決睡眠問題嘅終極方法！

Dolce Sleepers嘅獨門心法，融合咗健康睡眠及RIE育兒法［尊重孩子 相信孩子］嘅理念，教你點樣以 sensitive + responsive 的方式，靈活處理睡眠問題，唔單止令你同BB都能夠有覺好瞓，亦能夠令親子關係更融洽。

想BB瞓得好，絕對唔需要狠心由得BB喊㗎！

［甜睡寶寶網上課程］

0-5個月：甜睡寶寶計劃

6個月-2歲：睡眠調整全面睇

2歲以上：幼兒自行入睡課程

報讀課程，仲可以同我喺Zoom直接傾你BB嘅情況㗎 😉 想知道課程係咪適合你同你BB，歡迎搵我傾傾 😁

Email: catherine@dolcesleepers.com

FB Messenger: m.me/dolcesleepers

查詢電話諮詢計劃

Categories: : 甜睡寶寶