BB食乜嘢會瞓得好啲？保嬰丹同七星茶有冇用？加固後係咪就可以瞓過夜？

Catherine Author

當BB瞓得唔好成日紮醒，令大人都冇覺好瞓，實在係好痛苦嘅事… 所以，好多媽咪爹哋都會嘗試搵一個最快嘅方法，希望令BB即刻唔再日喊夜喊瞓得好…

保嬰丹&七星茶係咪可以解決睡眠問題？

坊間有好多靈丹妙藥，聲稱能解決各種（甚至所有）常見嘅BB問題。最萬能嘅應該係「保嬰丹」。

保護嬰兒嘅靈丹，仲唔係好嘢？睇吓有乜嘢功用先（取自商品網站）

主治：用於小兒感冒，風寒襲表，食滯化熱所致發熱惡寒，噴嚏流涕，咳嗽有痰，腸胃不適及夜啼易驚等。

基本上，真係乜都醫到喎，梗要買盒看門口啦！

等等，你屋企畀大人食嘅看門口藥有幾多種？

傷風咳
喉嚨痛
止痛
胃藥
清熱氣
消化不良
安眠藥...

點解大人要分咁多種，BB就一隻攪掂晒呢？點解仲未有人研發一種好似保嬰丹咁，能醫百病嘅大人藥呢？Well...

睇埋另一種常見嘅BB聖品「七星茶」。

主要成分：薏米，稻芽，小麥，淡竹葉，山楂，鈎藤，蟬蛻，甘草，膳食纖維

雖然用法係茶包咁樣，但材料都係中草藥嚟... 藥喎！唔睇醫生就畀BB食藥？唔好啩...

然後，網站寫嘅商品特色係：消化功能更佳，睡得更安寧

即係話，如果BB係因為消化不良而瞓得唔好至有用... 睇開Dolce Sleepers嘅你，都知道BB瞓得唔好嘅原因，遠比消化不良同腸胃熱氣複雜呀！

美國兒科醫學會建議，BB出世後頭6個月只能畀母乳或配方奶，水都唔需要、亦唔應該畀。點解呢？因為BB個胃好細，如果飲咗水，自然就冇位裝奶，咁咪會食少咗奶囉！

除此之外，更嚴重嘅係，太早畀BB飲水，可能會導致水中毒（water intoxication）。成年人體內有大約55-60%係水份，而BB係差唔多75%。我哋嘅腎臟所能處理嘅水量係有限嘅，過剩嘅水份會進入血液循環系統，令血液中嘅鈉含量被稀釋，產生身體麻痺、癲癇、甚至於昏迷等嚴重症狀！

淨係水都可以咁嚴重，可況係藥呢？而且藥物仲會令肝腎負荷過大，造成長遠影響...

我對藥物冇研究，只能以logic去睇以上嘅產品，但其實如果你google呢啲 “BB靈藥“ 加 “中醫”，就會搵到幾篇專業中醫寫嘅文章，同樣係叫人唔好自己買畀BB食/飲。

而且，其實衛生署都係咁樣講㗎囉！

所以，希望BB瞓得好啲，唔係食藥就會解決得到，否則兒科醫生已經開咗畀你啦，仲點會有咁多家庭飽受睡眠不足之苦呢？

有助入睡的食物

食藥就唔好嘞，咁有冇天然嘅食物，能有助BB瞓得好啲呢？

真係有㗎！呢啲食物含有一種稱為色氨酸（tryptophan）嘅物質，能有助大腦製造褪黑激素（melatonin）呢種睡眠荷爾蒙。

含有色氨酸嘅食物包括：

奶類製品（尤其是車打芝士和瑞士芝士）
果仁
豆腐和黃豆製品
穀物類
香蕉
綠色多葉蔬菜
雞蛋
禽鳥類（尤其是火雞肉）

之不過，淨係食以上嘅食物並不足夠。

因為我哋嘅身體仲需要同時吸收複合式碳水化合物（complex carbohydrates），至能夠令色氨酸抵達大腦，產生睡意。

例如：

蕃薯
薯仔
全麥麵包
全麥意粉
各種豆類

當然，食物只能有助入睡，但無法解決睡眠問題。如果BB營養唔夠均衡，其實亦會導致睡眠問題！

鐵質攝取量不足，會對睡眠造成影響

你知道，好多BB/小朋友都有缺鐵性貧血嘅問題嗎？」

以下係幾個可能會出現嘅跡象：

易攰
瞓覺時經常燥動不安
睡眠質素差
臉色蒼白
胃口欠佳
情緒及行為問題
異食症（經常想食塵/紙/指甲等）

足月出生嘅BB，頭6個月體內已經有足夠嘅鐵質儲備*。但滿6個月之後，就需要額外嘅鐵質，至能夠健康成長。

雖然母乳嘅鐵質含量低，但對BB嚟講比較容易吸收。只要配合含有豐富維他命C嘅食物，母乳BB都能夠得到足夠嘅鐵質。

而配方奶嘅鐵質吸收率低，所以需要大量添加。一般冇厭奶問題嘅BB，應該都能夠吸取到足夠嘅鐵質。

1歲前應該以母乳／配方奶為主要營養來源，1歲後可以轉飲牛奶。但由於牛奶含鐵量少，如果飲太多牛奶，除咗會引致鐵質吸收不足之外，亦會影響正餐嘅胃口，令小朋友更加揀飲擇食。

有啲乜嘢食物含有豐富鐵質呢？

肉類
魚
果仁
豆類
深綠菜葉類
蛋黃

記得要配合埋維他命C豐富嘅蔬果類一齊進食，促進鐵質嘅吸收呀！

懷疑BB有缺鐵性貧血，就要立即去做檢查嘞！

之不過，如果你BB平日跳跳紮，淨係瞓得唔好嘅話，咁就可以先嘗試調整作息時間，配合返BB早睡早起嘅生理時鐘。

加固會對睡眠造成影響嗎？

加固後，BB食得飽啲，夜晚自然會瞓得好啲... 珍打媽（請讀出嚟）？

的確，肚餓係夜醒嘅其中一個主要原因。BB喺6個月大之前，生理上仍需要夜奶，多數要到9個月至會完全停止夜奶。

但咁並唔代表，食得飽就會瞓得好... 好可能只不過係時間上咁啱吻合而已。

美國兒科醫學會建議，在BB滿6個月大時開始加固，呢個正好係BB開始能夠夜晚連睡11-12小時嘅年紀。

此外，喺BB出生後頭一年，應該以奶為主要營養來源，未需要一開始加固就即刻代一餐奶。而且，食得太飽，其實對消化系統會造成過份負荷，反而令BB更難入睡。

最重要嘅一點係，夜醒嘅原因有好多，BB係咪能夠瞓得好，要視乎日間作息時間，以及入睡方式等因素而定。所以，就算BB食飽咗，都唔代表唔會半夜驚醒大哭㗎！

有時候，加固後由於BB嘅用餐及作息時間表出現改變，奶量下降令身體吸收嘅水份不足，引致腸胃不適，甚至可能會引發食物敏感，令BB瞓得更差！

所以，加固對睡眠係好有可能有影響嘅，但就並非一般人認知咁樣囉...

BONUS內容：BB奶同固都食得好少，全日不停喂，半夜又唔知佢係咪餓醒...

好多時同媽咪爹哋傾BB嘅睡眠問題，都會提及到餵奶及加固情況

一個經常遇到嘅難題係：加固唔理想唯有補奶，但都食得少，漸漸變成少食多餐嘅時間表，攪到全日都喺度餵奶餵食好忙...

以下呢個BB嘅case，可能有啲extreme，不過營養師媽咪 Stephanie嘅答覆，非常有參考價值，對好多行港式加固法嘅媽咪嚟講，甚至有茅塞頓開嘅感覺！

「BB12個月大，每餐奶都飲好少，90ml都唔夠，固又要追住來餵先食得一啲，好驚跌出本來生長線...」

現時飲食時間表

7am milk 1

9am 早餐(粥仔)

11:30am 午餐 (軟飯)

1:00pm milk 2

16:00 milk 3

18:00 晚餐 (軟飯)

19:30 milk 4

23:00 dream feed

調整貼士：

1. 有關奶

其實只要三餐固的的份量得宜，就可以逐步減奶。大部分BB在9-12個月之間，有能力食到三餐固，奶也可以先減至早、午、晚三次，然後近一歲左右只早晚兩次。一般9個月大以上的BB無需半夜起身食奶 (起身肯食不代表是餓醒)，亦無dream feed的需要。反過來說，9個月大以上如果奶俾得太密，都食飽咗一半，固又點會食得多呢？

2. 有關粥／飯

香港人相信飯氣。每天吃米飯也是絕對可以的。但是以營養的角度而言，不同食物有不同營養，所謂均衡飲食，亦包括進食不同類型的澱粉質。除了米飯，可以考慮其中一餐提供通粉、烏冬、藜麥、喬麥麵、南瓜、蕃薯、薯仔等等替代。不但營養價值更佳，對BB來說多樣性、有變化的食物亦更吸引（大人都唔想日日食一樣的食物吧？），亦能訓練咀嚼不同口感的食物，提高將來對不同食物的接受能力。

3. 粥到飯

媽媽們對BB食飯方面謹慎處理、怕BB哽親是能理解的事，但believe it or not，其實不少BB就算一歲以下，已經能咀嚼大人食嘅質感嘅飯; 更保守一點，一歲左右基本上大部分BB食飯都無問題。重點是大人要給予機會。當然，如果15個月BB本來依然每餐食粥，當然不要一下子變成大人飯。無論什麼年紀，循序漸進都是要訣。當媽媽覺得BB可以應付現時質感應付得很好，就可以升level俾BB試下少一點水的質感，慢慢由稀粥變粥、軟飯、濕少少的飯、飯。這對BB的咀嚼能力和觸感發展也很重要。同樣道理可應用在任何食物之上。

伸延閱讀：［BB加固食得少點算好？點令小朋友肯坐定定食嘢？］

如果你BB經常半夜驚醒，日間小睡又好快會醒，就需要搵出問題所在。充足嘅睡眠及休息，唔單止係小朋友腦部及身體良好發展嘅關鍵，更加同一家人嘅情緒，以及家庭氣氛息息相關。

希望BB能夠食得好又瞓得好，成為甜睡寶寶的話，Dolce Sleepers幫到你！

Dolce Sleepers 的獨門心法，已獲數百個家庭親身證實，能有效逐步改善孩子的睡眠問題，並令孩子在最小掙扎下，達到自行入睡的目標。