點令BB肯瞓覺？其實你問錯咗問題！

孖仔媽媽 Catherine Author

「點解BB唔肯瞓？」

你係咪成日都問呢個問題呢？You are not alone.

好多家庭受睡眠問題一直纏繞幾個月、甚至幾年… BB細個時就成日爆喊，幾經辛苦氹完一大輪，結果瞓咗冇幾耐又醒過，不斷循環落去... 到小朋友大個啲，就成日掛住玩唔願瞓，軟硬兼施都冇用，總係要拖到好夜至斷電瞓得著...

究竟點樣做，至可以令囝囝囡囡肯乖乖哋去瞓覺呢？

可以話，其實好大機會喺你問錯咗問題！

因為你係問「點樣令到BB／小朋友肯去瞓覺」。但係，其實未必係你囝囝囡囡唔肯瞓，而只係佢 瞓唔到！

我成日都講 —— 瞓覺冇得迫。

先畀番少少有關嬰幼兒睡眠嘅基本資訊，當BB／小朋友攰得滯， 佢嘅大腦會分泌一種壓力荷爾蒙，叫做cortisol，令佢保持清醒。

所以，就算BB小朋友攰想瞓，但有呢個荷爾蒙影響，佢想瞓都瞓唔到，好辛苦於是就會大喊。但到大嗰啲，1歲2歲幾，呢啲年紀就唔會再喊；攰嘅時候，壓力荷爾蒙嘅會令小朋友好精神。可能喺食晚飯嘅時候佢哋會烏眉瞌睡，但到夠鐘瞓覺，一放落床就好興奮，大叫大笑，彈嚟彈去，行嚟行去，進入咗精神亢奮嘅狀態。呢個情況其實代表小朋友已經疲勞過度，攰得滯，瞓唔到，而唔係佢唔夠攰或者唔想瞓、唔肯瞓。

心態轉變

要改變呢個情況，牽涉著一個心態嘅轉變。

除咗我成日講嘅環境要做好，生理要做好，心理要做好，我哋自己大人嘅心態係非常重要。

如果你淨係去諗點解BB／小朋友唔肯瞓覺，點解喺度搞搞震，咁曳，點解佢唔合作，咁多要求等等。當你咁樣去諗，就會覺得係BB／小朋友有問題，你需要去要做啲嘢去改變佢，令佢聽你話，令佢受控...

呢個「控制心態」，其實只會令情況更難得到改善。

＂Kids do well when they can.＂ ~Dr. Ross Greene

睡眠都一樣，嘗試唔好去諗點解BB／小朋友咁曳唔合作，而係諗有啲乜嘢障礙，令到佢瞓唔到。當你自己心態上轉變咗，你睇成件事嘅態度都會唔同咗。你會有多啲耐性，起碼冇咁容易爆炸先，你嘅回應方式亦會唔同咗，可能反而冇咁易刺激到BB，減低掙扎。跟住你就會諗有啲咩可以去調整，有啲咩改變可以去做。

所以，必須先係你自己作出改變，先至會見到BB／小朋友出現轉變！

強調多一次：

瞓覺冇得迫！

瞓覺冇得迫！

瞓覺冇得迫！

——好重要所以要講三次。

生理時鐘

咁實際上有啲咩調整可以去做呢？

無論係晏覺，以及夜晚覺，掌握好理想入睡時間非常重要！除咗成日都聽到我講，以及好多其他睡眠資料都會提到嘅清醒時間之外，有更加重要嘅一樣嘢，叫做生理時鐘 。

初生BB未有日夜之分，所以我哋首先要做嘅，係幫BB建立晝夜節律，幫佢大腦分辨日夜。喺初生時期，作息時間仍然可以好飄忽，所以唔需要同BB定時間表住，睇住清醒時間畀BB瞓覺，瞓得足就好。

當BB去到6個月大左右，就開始建議有穩定嘅起身同埋就寢時間，每日都係咁上下時間瞓，咁上下時間醒。當然，我哋冇辦法可以控制邊一分一秒瞓着，呢個冇得迫，但你可以做嘅係，喺每日差唔多時間帶佢入房，放落床，熄燈畀佢瞓。

好多時候（包括我自己在內），因為星期一至五要返工返學，所以早啲瞓早啲起身；星期六日唔使返工返學，就晏啲瞓，遲啲先起身。係正常嘅，我都會好想瞓耐啲，唔緊要。但係對於細個啲BB嚟講，15分鐘已經有好大嘅影響。遲咗15分鐘，已經足以令BB嗰晚瞓唔著，同埋瞓得差。

所以，希望BB夜晚可以順利瞓得著，唔會碌嚟碌去，爆喊瞓唔到，又或者小朋友進入頭先所講嘅精神亢奮狀態，你必須要借助睡眠荷爾蒙——褪黑激素嘅幫助。睡眠荷爾蒙會令我哋產生睡意，令我哋想去瞓覺。

穩定咗起身同埋就寢時間，可以令你比較容易掌握到咩時候BB開始有睡意。當大腦分秘咗睡眠荷爾蒙，嗰個時間去畀佢瞓覺就會順利得多。呢個亦係穩定起身同埋就寢時間嘅原因 – 把握睡眠荷爾蒙嘅黃金的入睡時間。

活動轉換

好多時候，媽咪爹哋要返工，放工返嚟親子時間好開心，要玩，玩騎膊馬等等，好興奮，好刺激。不過如果係2歲前，我會建議盡量平靜啲，唔好玩到咁癲，因為2歲前好容易受過度刺激。

2歲後，2.5歲至3歲，可能可以玩多啲開心啲，一啲嘻嘻哈哈嘅嘢。但通常我會建議喺廳做呢一件事，千祈唔好突然夠鐘啦喎，要瞓覺喇喎，就即刻捉個小朋友入房，要佢喺張床度，唔准郁要瞓覺，咁係唔得嘅。

因為小朋友需要時間做活動轉換。

小朋友喺度玩緊，集中精神去做一樣嘢嘅時候，佢啲頭髮好似幅相入邊嘅小朋友咁豎起晒。當你想佢瞓覺，係需要時間冷靜落嚟至得。所以，唔可以喺佢啲頭髮彈起晒嘅時候就掉佢落床，要佢去瞓覺，咁樣小朋友係瞓唔到㗎！所以你必須要預留足夠時間，等佢平靜咗先至可以瞓到覺。

活動轉換，即係應該係點樣呢？通常我會建議，喺廳做一啲比較活躍嘅活動，跟住入到房先做相對靜態嘅活動，如睇書、講故事、傾偈等，可以畀小朋友坐低嘅活動。

我都知道，好多媽咪爹哋撠住嗰個位係：點樣由喺廳好興奮，到入房可以順利令小朋友肯慢慢靜落嚟呢？

簡單嚟講，又係我哋嘅心態需要調整。2歲幾呢個年紀，最鍾意就係玩，諗吓點樣用遊戲融入你想佢入房呢件事呢？譬如你同佢講，我哋一齊扮動物行入去，或者跳入去，或者你拖住佢入去、抱入去等等，有好多方式。

你亦都可以喺房入面有啲小遊戲，當然唔好太大同多嘅身體活動，要係小遊戲，結束儀式等等，咁就可以吸引到佢去個房度。每一個小朋友，每一個家庭嘅dynamic都唔同，所以，好視乎你嘅情況，可以creative啲諗。喺《幼兒睡眠問題雞精班》，我分享咗更多貼士！

營造（沉悶）安睡環境

營造安睡環境呢一點，睇開資料嘅話，你都知道小朋友瞓覺環境要黑、要靜等等。但其實到底係要營造一個點樣嘅環境呢？

就係營造一個沉悶嘅環境，試諗吓，如果你嘅BB瞓覺張床，而上面好似呢幅圖咁，有好多玩具係喺晒嗰度，有好多書、紙巾盒、鐘或者有個燈掣，咁就大件事喇，BB／小朋友好自然就會想走去嗰度玩。

當有呢啲嘢影響，有得玩就梗係唔瞓啦。所以，移走晒床上或者周邊物品，BB可以掂到、拎到嚟玩嘅，都盡量拎走佢。如果係有個燈掣，可以試吓搵啲嘢遮住佢，令BB唔會見到有嘢想彈起身去玩。有陣時，真係咁簡單，好重要但好容易可以做到嘅一點，但我哋就忽略咗。

日頭都需要盡量暗嘅環境，就係為咗減低BB嘅能見度，將環境刺激減到最低。BB睇唔到咁多嘢，就冇咁易吸引住，瞓唔到覺。

但究竟要有幾黑呢？

其實都係要睇番你嘅BB對光線嘅敏感度，因為有啲BB可能有少少光佢都瞓唔到，需要完全黑晒先瞓到，要知道番小朋友嘅需要係點。所以，一般嘅睡眠資訊，都會建議最盡嘅情況，要黑到伸手不見五指。

伸延閱讀：［BB一熄燈就大喊，咁點算好呢？］

而到咗2.5歲後呢個年紀，大腦發展令到佢開始想像力豐富，開始會出現怕黑嘅情況 。呢個年紀係可以留一個夜燈，但真係要睇番小朋友係咪有需要先。

注意，小朋友怕黑未必係我哋想像中好驚、會喊或大嗌。我記得孖仔A曾經有一次同我講，佢瞓覺嘅時候，佢見到蜘蛛俠喺度望住佢。佢好冷靜㗎，甚至我覺得佢只係覺得阻住佢，而唔係真係好驚，只係有唔舒服、不安嘅感覺 。

所以，如果留意到你嘅小朋友開始出現一啲最常見嘅跡象，例如唔畀你熄燈、唔畀你閂門、要開埋出面燈等等嘅情況，可以留一盞夜燈畀佢。通常我會建議偏黃或者偏橙色啲嘅夜燈。

有媽咪同我講，小朋友會望住盞燈，刺激到佢瞓唔到；所以，我嘅做法係盞燈擺喺衣櫃頂，小朋友瞓低嘅時候，佢會見到天花板有光，但見唔到盞燈，個激就會細啲。如果你覺得盞燈太光，有啲燈係可以調整光度；如果你都係覺得太光，可以搵紗布蓋住。

令BB安心入睡

最後，有一點好多媽咪爹哋都未必諗到…

好多時，我哋都會將氹BB瞓覺視為一件工作。見夠鐘嘞，就抱BB入房氹佢瞓覺，又或者命令小朋友行入房，瞓喺床靜靜哋等瞓著。

入睡，係一個分離時刻（就算係同床一齊瞓），當BB擁有足夠安全感，瞓覺時自然亦更易放手，合埋眼安心入睡 😴

但如果我哋只求盡快令BB入睡，機械式咁去做睡前儀式，但求快手掉咗BB落床，咁就有可能令BB覺得被忽略，甚至被擺佈，於是就會大喊投訴！

好多媽咪爹哋亦會認為，要瞓著覺就必須靜落嚟唔應該仲郁嚟郁去，於是唔准小朋友講嘢同郁… 但其實咁樣反而會令小朋友更加難瞓得著，因為佢要用力控制自己，同時又好驚會被人鬧，咁仲點能夠放鬆安心入睡呢？

你或者知道大腦分為左右兩邊，但你又知唔知道，其實大腦亦可以分為上下兩層呢？

喺The Whole-Brain Child一書內，美國知名育兒專家Daniel J. Siegel以及Tina Payne Bryson解釋，我哋大腦上層係負責控制思考、邏輯同自控能力等行為；而大腦下層就主宰住情緒反應，包括flight/fight/flee呢幾種反應行為。

當BB對瞓覺呢件事態度負面，大腦就會被下層操控，進入reactive mode，被情緒主導。呢個時候，你同佢講乜嘢其實佢都聽唔到，因為佢淨係諗住「我唔鍾意瞓覺」「我唔想瞓覺」「我瞓唔到覺」…

所以，你越想佢瞓著，佢就越瞓唔著… 然後大人越嚟越炆憎，小朋友就越嚟越抗拒瞓覺，變成惡性循環…

咁點樣至能夠走出惡性循環呢？由得佢唔瞓？咁又唔得喎！

你需要一套全面嘅方法，先解決生理上令小朋友瞓唔著嘅原因 （可能需要調整生活習慣），然後再從connection 著手，令小朋友唔再覺得瞓覺係一件令佢唔開心嘅事…

［甜睡寶寶網上課程］

以正向教養的方式，處理睡眠問題，令孩子睡得好，吃得好，心情更愉快，親子關係更緊密！

0-5個月：甜睡寶寶計劃

6個月-2歲：睡眠調整全面睇

2歲以上：幼兒自行入睡課程

報讀課程，仲可以同我喺Zoom直接傾你BB嘅情況㗎 😉

想知道課程係咪適合你同你BB，歡迎隨時搵我傾傾 😁

Email：catherine@dolcesleepers.com

FB：m.me/dolcesleepers