一知要瞓覺就喊，可以點做？

Catherine Author

好多媽咪爹哋都為BB嘅睡眠問題而傷腦筋…

但其實，真正令佢哋覺得最痛苦嘅，並非BB瞓成點，而係氹瞓覺時BB大喊嘅問題（包括半夜醒咗大喊要再氹返佢瞓嘅情況）

BB喊，有好多原因。

第一個最常見嘅原因，係BB因為疲勞過度攰得滯，所以瞓唔著好辛苦而喊（係㗎！唔好諗住令BB攰啲就會瞓到呀，詳細解釋可以睇睇［Dolce Sleepers 免費睡眠工作坊］）

但亦有媽咪爹哋會話，明明已經睇住清醒時間安排幾時帶BB入房瞓覺，但仍然都係會喊，應該點做呢？

今日呢篇文章，我同大家講解幾個好常見嘅情況。

一熄燈BB就喊，點解呢？

我想先講講，點解瞓覺要熄燈！

初生嬰兒出生後，仍然帶有媽咪傳畀佢嘅睡眠荷爾蒙「褪黑激素」，所以未會受到光線影響，喺邊度都瞓得著。雖然係咁，都建議日間小睡要喺黑暗嘅環境畀BB瞓，因為太光會令BB好易受到環境刺激，無法安心入睡。唔需要怕BB分辨唔好日夜，因為除咗光線外，你點樣安排BB嘅作息，至係幫BB建立晝夜節律嘅重點。想知道更多，可以收睇［初生嬰兒睡眠貼士 (link)］，仲有免費小冊子可以下載㗎！

當BB去到6-8周大，母體褪黑激素逐漸消退，大腦會開始需要自己分泌睡眠荷爾蒙，令BB產生睡意，慢慢進入夢鄉。光線會抑制大腦分泌褪黑激素，令到BB就算好攰都無辦法輕易瞓得著。所以，想BB瞓得好，第一點就係無論日頭定夜晚，都要閂門拉窗簾，最好令到間房黑到伸手不見五指。

但有媽咪話佢哋囝囝囡囡一熄燈就大喊，咁點算好呢？

首先，BB有呢個反應，係佢嘅認知能力健康發展嘅證明，因為佢明白咗熄燈就等如係時候瞓覺，呢點其實對於培養良好睡眠習慣好重要㗎！

「BB會唔會係怕黑呢？」

唔係，一般小朋友要到2.5歲至會因為想像力豐富咗而開始怕黑。

「咁BB係咪怕咗瞓覺呢？」

都唔係，但佢好可能係喺心理上未準備好要瞓覺，所以會大喊嚟表示不滿或不安。

無論係幾個月大嘅BB，或者3歲大嘅小朋友都好，佢哋其實都需要時間去適應轉變。

當BB喺日光日白嘅環境下玩緊，突然畀人抱起帶走，入到房之後又突然黑晒睇唔到嘢，自然會覺得唔高興，甚至嚇親。

咁可以點做呢？

當差唔多時間要瞓時，你可以走去你囝囝囡囡前面踎低望住佢。當你得到佢嘅注意後，再同佢講：「係時候入房，休息一陣間嘞，我可以抱起你嘛？」跟住向佢張開雙手，等佢向你表示ok，喺抱起佢之前再講一句：「我而家抱起你嘞！」

抱起你囝囝囡囡一齊行入房時，你可以同佢預告接住落嚟嘅睡前儀式，例如：「而家我哋入房，我會放低你同你換片，跟住幫你著睡袋。我會抱住你，然後開白噪音同閂門，我會唱隻歌畀你聽，然後放你落床，再坐喺側邊陪住你。」

以上呢個做法，能夠畀BB一個過渡期，做好心理準備。

之不過，想減少BB瞓覺前喊嘅情況，最重要嘅都係要喺BB疲勞過度之前就畀佢瞓，唔好等到佢勁打喊露同捽眼至入房啦！

幫BB做好要瞓覺嘅心理準備

另一點要留意嘅係睡前儀式。

相關文章：［睡眠儀式，你做得啱唔啱？(link)］

如果做開嗰套work嘅，能令BB愉快入睡，咁梗係唔駛改。但如果BB每晚做睡前儀式時都會喊，咁你仲繼續執行同一套儀式，明知會trigger到BB喊，都仲繼續去做，咁有乜嘢意義呢？

睡前儀式，並非一成不變，而且，當BB逐漸長大，睡眠儀式要按照需要去作出調整，都好正常呀！

🧏🏻‍♀️ 所以，千祈唔好諗住定咗套睡前儀式就唔可以改。尤其是啱啱開始做，但有啲位唔順嘅話，就改啦！如果明知你一放低BB喺床同佢著睡袋就會喊，咁就試吓畀佢坐喺你大脾著，或者可以改早啲至著呀！如果明知放床後熄燈佢會喊，就試吓抱住佢熄咗燈至放床啦！

💁🏻‍♀️ 要順利執行睡前儀式，令囝囝囡囡愉快入睡，好多時其實需要一啲創意，要think out of the box。

好多時只係調動吓啲步驟，或者改個地點做，已經可以避免trigger到BB，令佢唔會咁抗拒㗎嘞！

記住，想BB瞓得好，要佢鍾意瞓覺至得，睡前儀式嘅目的就係令佢能夠安心舒服呀 😉，而最重要嘅係，我地要設限嘅同時，亦要保持從容，囝囝囡囡先感受到瞓覺並唔係一件有壓力嘅事，咁佢地就會樂意同我地合作啦！😄

增加對睡房嘅熟悉感

另外，你可以畀BB喺朝早醒咗之後，或者夜晚就寢前，陪佢喺睡房入面玩。

準備一啲特別嘅玩具，只能喺房入面至能夠拎出來玩，令佢知道睡房都係一個好好玩嘅地方，就自然唔會咁抗拒留喺睡房啦！

仲有，就寢前30分鐘將燈光調暗，令大腦能適時分泌睡眠荷爾蒙褪黑激素（melatonin ），到夠鐘要瞓時，BB至會有足夠睡意。

當BB喺房入面玩時，你可以單單調暗睡房內嘅燈光，咁樣就唔怕影響到其他未夠鐘瞓覺嘅家人啦！喺睡房內玩，亦能避免BB嘅大腦受到電視或手機等電子屏幕所刺激，影響睡眠質素。

對於忙碌嘅家長而言，呢個亦係一段寶貴嘅親子時光 😊

避免哄睡方式對BB造成太大刺激

成日有媽咪問我，明明已經掌握好就寢時間、又做咗睡前儀式，但BB仲係唔肯瞓覺，點解呢？

入睡嘅英文係 FALL asleep。要 fall 到，就必須要放手，要 let go。

瞓覺，冇得迫㗎！

所以，我哋必須要令BB願意收拾心情，忘記呢個花花世界至得。BB嘅大腦非常活躍，好容易受到刺激。包括我哋大人嘅存在。

好多時，我哋好想BB快啲瞓著，會做好多嘢，例如一直拍佢，或者同佢傾計... 但其實，好多時我哋做咁多嘢，反而會令BB冇辦法平靜落嚟，準備入睡。而且，BB喺日常活動中，亦會積聚刺激、壓力、興奮感、以及其他情緒，同樣會令佢無法順利入睡。

所以，我哋能夠做嘅，係用冷靜去感染BB。

當你將哄睡視為一場角力賽，甚至有意無意哋向BB展露出我哋自己嘅憂愁、挫折及憤怒，只會令BB更加唔能夠安心入睡。

所以，要令BB能夠放手，我哋自己就必須先放手。

記住，瞓覺，係冇得迫㗎！

如果你BB未滿６個月嘅話，因為對入睡方式未有好大依賴，所以其實係可以喺床仔安心入睡㗎！

重點係盡量嘗試唔好越做越多，一來令你覺得有壓力越嚟越炆，二來BB失去練習嘅機會，形成依賴，會令BB失去自行入睡呢種天生嘅能力！

相關課程：［0-5個月健康睡眠工作坊／甜睡寶寶計劃 (link)］

教你點樣保住BB嘅自行入睡能力，唔駛做睡眠訓練都瞓得好！

BB大喊，點處理好？

當BB大喊，我哋總係好想「幫」佢。之不過，當你將目的定喺停止佢嘅淚水，往往會吃力不討好...

嘗試細心觀察BB嘅真正需要，瞭解吓佢嘅感受先 -- 佢試緊打側但做唔到，同大人一樣會失望會炆憎，所以會喊。即刻去拍佢係咪最好嘅回應方式呢？咁做會唔會忽視咗佢嘅感受呢？一或可能先睇吓佢，保持冷靜，唔好即刻諗住要制止佢喊。你可以放隻手喺佢身上，嘗試代佢講出佢嘅感受，用你嘅平靜去感染佢，令佢能夠慢慢冷靜返落嚟。

未當你見到有需要，就抱起佢啦！未滿６個月嘅BB，唔需要勉強做床上入睡。只要你係靜靜坐喺度抱住佢就得，唔需要做太多嘢又行又拍，避免造成更大刺激。等佢放鬆返，你自己亦都可以輕鬆啲呀！

好多時都聽到有媽咪爹哋話，BB好易醒成日要拍佢至瞓得返。但更多時候係氹極都氹唔到，大人炆憎BB又不安，身心俱疲...

瞓覺，係要放鬆至做到嘅事呀！

你諗吓你自己瞓覺，如果好緊張好不安咁，或者環境有好多刺激，例如有人不斷同你講嘢，你仲瞓唔瞓得著呢？

一晚醒幾次，係好辛苦嘅事，長期唔夠瞓情緒就更差，要保持冷靜絕對唔容易。但其實喺呢個時候，係更需要保持冷靜呀！

點樣可以保持冷靜？首先你要預先諗定個計劃，決定應該點樣做，喺腦入面run幾次。

當BB夜醒大喊，先深吸一口氣，然後一邊數1-10一邊慢慢呼出嚟，然後先至開始執行計劃。如果BB一直大喊唔停，你感覺到自己開始情緒受到影響，咁就先停止所有動作，再深呼吸，令自己冷靜返落嚟先。

記住，BB係會受到你嘅情緒所感染，如果你又急又炆又嬲，咁BB都會感到不安，冇辦法瞓得著㗎！

P.S. 注意我唔係話唔好同BB傾計，但應該只係睡前儀式嘅一部份。夠鐘熄燈瞓覺，就應該停止唔好再講咁多嘢。

尤其是當BB大喊時，請你嘗試控制住自己唔好不斷講嘢，而去聆聽BB想向你表達嘅意思啦！