BB鍾意趴睡，點算好?（安全睡眠ABC）

我所提倡嘅安全睡眠建議，由美國兒科醫學會（AAP）及英國Lullaby Trust所發出*，係一套通用嘅標準，適用於1歲前嘅嬰兒。

睡眠姿勢

第一點係，無論日夜，都必須將BB背脊向下面向上，以仰睡嘅姿勢放落床。

圖：Safe Sleep Missouri

但如果BB已經可以輕易咁翻身，就唔需要將佢翻返過嚟仰睡，而可以「由得佢」趴睡。

「由得佢」嘅意思，即係唔鼓勵，但亦唔需要反對。因為趴睡絕對唔係乜嘢「技能」，需要「解鎖」。就算BB趴睡，亦唔代表佢會瞓得好，可以一覺瞓到天光。所以，如果BB翻身後大喊，你係必須幫佢，唔可以由得佢大喊唔理！

但如果BB鍾意趴喺度瞓，瞓得好冇投訴，咁就唔好走去攪佢啦！BB自己翻身搵個舒服嘅姿勢瞓覺，你不斷將佢反返轉，跟住佢又翻返過去... 結果大人成晚提心吊膽唔敢瞓得耐，BB不斷被騷擾亦無法瞓得好你都唔想瞓覺時不斷有人攪你啦，係咪先？所以，亦唔需要嘥錢買嗰啲「防翻身枕」啦！

而如果BB半夜醒咗趴喺度喊，你應該做嘅亦唔係立即９秒９將佢翻返轉！因為咁做，會令BB以為自己冇能力翻身，晚晚直接大叫求救，將翻身對睡眠嘅影響時間拖長好多！你可以畀少少時間BB試吓先，然後抱起佢安撫後，至再放返佢落床。日頭亦需要多啲畀BB喺地下活動，等佢有多啲機會去練習翻身（可放軟墊，但唔建議放大人床或梳化，因為太軟好難著力）。唯有BB學習點樣令自己瞓得舒服，至可以瞓得好啦！

另外，亦好建議每晚將BB頭部向住唔同嘅方向放落床，避免因為BB覺得某一邊比較吸引，於是長期只望住一邊，增加出現扁頭症嘅機會。

圖：pathways.org

床上用品

好多人唔知道嘅一點，就係BB必須要瞓喺一張堅硬嘅床褥上。要有幾硬？BB瞓落去唔會下陷就可以嘞，否則趴睡時面向下嘅話，BB就會無辦法呼吸，或者因吸入自己呼出嘅二氧化碳而中毒！

而且，張床單亦必須要緊緊包住張床褥至得，唔可以太大張突晒出嚟或皺起。

如果BB成日嘔奶，千祈唔好聽人講，用毛巾或買個三角枕將床頭抬高30度呀 😨 美國兒科醫學會（AAP）有明確指引*，話畀BB傾斜咁瞓，唔單止無助舒緩嘔奶（reflux）嘅問題，而且更有可能會令BB向下跌，屈住條頸透唔到氣...

上面提到可以由得BB趴睡，但前題係：BB嘅睡眠範圍，必須要清空， 一定唔可以有任何軟身物品，例如枕頭、棉被、公仔、攬枕、哺乳枕、以及縛喺床邊，聲稱能夠「保護」BB嘅床圍。因為，軟身物品除咗可能會遮到口鼻影響呼吸外，亦可能會引致二氧化碳中毒！床圍條繩有機會會纏住BB條頸，而就算係聲稱能透氣嘅網狀床圍，一樣危險。

BB床上唯一可以保留嘅物品，係奶咀。奶咀有助減低發生嬰兒猝死症嘅風險，但亦無須強迫BB使用。有關奶咀可睇埋呢篇文章：［奶咀，到底係育兒好物，定係睡眠問題嘅幫兇？(link)］

「老一輩經常話要整米袋壓心口，係咪真係有用？」

初生BB會因驚嚇反射 (Startle Reflex) ，突然手腳不自由主咁郁動而整醒自己。於是有傳統智慧話擺個米袋喺BB心口，用嚟定驚安睡。咁樣做，或者真係可以令BB瞓得安穩啲嘅，一啲外國醫院嘅新生嬰兒加護病房（NICU），甚至會將塞咗嘢嘅手套放喺BB身上，模仿媽媽嘅懷抱。

但要注意嘅係，喺醫院入面，所有BB都係24小時有人睇住嘅，而且亦有儀器監察住心跳及呼吸，所以發生意外嘅機會率好低。喺屋企就唔同嘞，幾年前就曾經發生過一宗意外，父母未能及時發現米袋向上移，結果BB面部被遮蓋窒息而出事！所以為安全起見，唔建議用米袋壓喺BB身上，其實BB身上亦唔應該放任何物品，避免釀成悲劇。

但BB成日整醒自己，點算好呢？

你可以使用包巾，將BB雙手跟身體包緊 (Swaddle) 。建議用拉鏈或魔術貼嘅設計，避免包巾鬆開，成晚要不斷整理，甚至造成危險。

有啲BB喺媽咪肚入面習慣舉起雙手，如果包到實反而會覺得唔舒服。市面上有一啲特別設計嘅睡袋，可以畀BB雙手放喺個頭旁邊，同時有包巾嘅效果，能有助減低驚嚇反射嘅影響。

Love to Dream Swaddle

記得當BB滿8個星期大，或者開始練習翻身嘅時候，為安全起見，必須停止使用包巾嘞！

但BB仲係成日會整醒自己，點算好？Love to Dream亦有專為過渡期而設計嘅款式，可以拆走手臂部分。以下呢種特別為過渡期而設計嘅睡衣同睡袋亦幫到你。

Zipadee Swaddle Transition Sleep Sack

呢種星星形狀嘅睡袋，會產生輕微阻力，令BB可以自由郁動之餘，同時仍能提供包圍及舒適的感覺。

注意：Merlin's Magic Sleepsuit 雖然係同樣為過渡期而設，但因為呢隻厚身睡衣有重量感，所並非100%安全。

網上買：［孖仔媽媽Catherine網店 (link)］

請注意，當BB出現開始想翻身嘅跡象，就要停止包住BB雙手，避免佢翻轉身趴咗喺度，但雙手撐唔起個身體，提高窒息風險。停用包巾，你可以轉同BB著睡袋，畀BB雙手能夠自由活動。用咗睡袋，亦唔再需要驚BB夜晚凍親，或者手腳被床欄kick住，而且仲有其他好處添：

1. 睡袋就等如一張可著上身嘅棉被，無論BB翻幾多次身、坐起或站起，都無須再次整理。
2. 睡袋能夠成為一種睡眠關聯，當你為BB著上睡袋，佢就會知道係時候瞓覺嘞。
3. 睡袋能防止BB隻腳被卡喺嬰兒床欄之間（床圍並非安全嘅產品，切勿使用）。
4. 睡袋唔會蓋住BB頭部，或纏住條頸，減低發生嬰兒猝死症嘅風險。
5. 睡袋能減低BB嘅靈活度，延遲BB爬出嬰兒床嘅時間（記得床內應該清空所有物品，以免發生危險）。

如果你選擇畀BB用被（注意：AAP不建議用被），請將BB雙腳貼住床欄，張被只能冚到心口（露出膊頭），壓喺雙手之下。將被其餘三邊亦必須zip入床褥下面。咁做係為咗固定將被嘅位置，以及盡量限制BB嘅活動空間（唔同張制BB嘅睡眠能力），避免BB頭部會被冚住。

覺得好煩？張被會移位？攪多咁多嘢會整醒BB？咁都係用返睡袋啦！

圖：The Lullaby Trust

「應該幾時畀BB用枕頭呢？BB枕頭係咪可以預防扁頭症？」

BB並唔需要用枕頭，因為...

1. BB出世時脊椎係直嘅，未有弧度，所以攤平瞓喺度並唔會覺得唔舒服
2. BB出世時頭型本身已經係圓嘅，所以仰睡時個頭會自然向左右兩邊，唔會令後腦變扁
3. BB瞓覺時唔會持續喺同一個位置，一定會郁甚至碌嚟碌去，所以頭部唔會固定喺枕頭上
4. 就算係嗰啲有個凹位嘅枕頭，都唔能夠確保BB個頭唔會移位，萬一BB個頭轉向一邊，口鼻就會貼住枕頭，增加窒息風險
5. 枕頭移位，有可能會遮蓋住BB口鼻，增加窒息風險
6. 如果BB識翻身，面向下時，甚至可能因為枕頭凹陷嘅設計令BB郁唔到，增加窒息風險
7. 當BB大個啲，可能會將枕頭丟出床外，然後大喊要你拎返畀佢，然後佢又再丟過，以拖延就寢時間

咁幾時至需要用呢？

喺2歲前都唔需要，而如果BB係瞓緊嬰兒床嘅話，亦唔應該用（一般建議3歲後至轉小童床，我囝囝都係3歲幾至開始用枕頭）其實，瞓得舒唔舒服，小朋友係知嘅，所以我唔會話幾多歲就需要用枕頭。從RIE育兒法嘅角度，我會睇返小朋友嘅情況去決定：小朋友有冇要求用呢？或者見佢會用手或公仔墊喺頭下面呢？

另外，2歲後用枕頭必須係幼兒枕頭，好薄身嗰種。之後大個啲都係睇小朋友需要，孖仔兩個身型唔同，所以枕頭一個厚啲一個薄啲。

有媽咪問：「唔用枕頭，好驚會有扁頭症喎？」

其實，畀BB仰睡並唔會導致扁頭症。頭先都講過，BB瞓覺會會郁嚟郁去，唔係咁多個鐘都維持住同一個姿勢（除非係有斜頸症，但呢個情況更加唔應該用枕頭）。所以，瞓覺時唔需要用枕頭，更加唔應該用任何產品去試圖固定住BB嘅睡姿（用手都唔好，否則BB習慣咗，夜醒自己郁唔返去個睡姿，自然又會大喊求救 ）

要避免扁頭症，你只需要喺BB清醒嘅時候，多啲畀佢喺地下自由活動，或者放返喺BB床都可以。頭部活動冇受阻，自然就可以自己擰嚟擰去，個頭至會又圓又靚啦！

睡眠地點

好多媽咪習慣日頭畀BB喺廳瞓覺，方便照顧。但BB床喺房，於是就會將BB放喺可傾斜嘅嬰兒餐椅畀佢瞓覺。

呢個做法，好可能會導致扁頭症㗎！因為BB唔能夠自由活動，個頭會限制咗側向一邊，久而久之影響到頭型... 其實呢類會限制BB活動能力嘅產品，一日唔可以用多過30分鐘（真係用嚟食飯唔計），尤其是瞓覺更加唔用得。除咗影響頭型之外，仲會令BB習慣咗個睡姿，放返落床反而唔習慣瞓唔到...

而且，你唔知BB幾時會夠力翻身，成個跌落地就大件事嘞！就算扣住安全帶唔怕佢會跌，但諗吓吖，喺飛機上面你瞓得舒服嗎？將BB放喺餐椅上扣上安全帶，郁都郁唔到，冇得自己揀個舒服嘅姿勢瞓覺，就算細個時冇嘢瞓到，終有一日會抗議唔肯再被縛住呀！

其實，市面上所有傾斜睡眠產品都不適合畀BB瞓覺用，只有表面平坦及堅硬嘅產品，至能夠確保安全性。啱啱出世幾個月嘅BB，條頸未夠硬，唔係攤平瞓喺度，個頭就可能會側埋一邊或「中」 向前，令呼吸道受阻塞，抖唔到氣。亦有可能會喺你唔知道嘅時候，翻身面向下，同樣會有窒息嘅危險。美國市面上已有幾款傾斜式嬰兒床被召回，例如Fisher-Price嘅Rock’n Play Sleeper，就喺2019年4月就被全面回收，因為呢件產品同32名嬰幼兒死亡有關。

好多時，我哋購買嬰兒睡眠用品，都會想令BB瞓得舒服啲，但「舒服不等於安全」呀！購買BB產品時請注意，必須要寫明係crib, bassinet, portable crib, or play yard至能夠畀BB喺入面瞓㗎！（所以high chair同swing都唔得）市面上好多聲稱安全嘅產品，其實都並未得到正式嘅確認，真係100%安全。例如，「透氣」 床圍、防側睡枕等，其實全部都唔應該用㗎！

另外，千祈唔好將BB放喺梳化上瞓覺，如果BB喺躺椅、搖搖椅、可傾斜式餐椅、汽車座椅、BB車（有可平躺嘅嬰兒籃除外），或孭帶上瞓著咗，應該儘快將BB轉移返去平坦嘅地方繼續瞓覺。好難？BB會即刻醒？咁就應該直接畀BB喺床上入睡嘞，除咗安全外，BB亦能瞓得好啲，唔會一開眼唔知自己喺邊而嚇醒！

最安全嘅做法，係最少頭6個月，大人同BB同房不同床，甚至去到1歲。AAP唔建議母子同床，因為無論你幾小心，都仍然存在一定風險。

喺以下幾個情況下，會更加危險：

• 4個月以下初生嬰兒
• 早產嬰或出生即體重過輕嘅BB
• 父母或其他同床者係吸煙人士（就算唔會在床上煲煙）
• 媽媽喺懷孕時有食煙嘅習慣（就算之後戒咗）
• 就寢前服食過會令人昏昏欲睡嘅藥物（攰得滯可能會瞓到不醒人事嘅話，其實一樣危險）
• 飲咗酒
• 同BB一齊瞓嗰個唔係BB嘅父母，例如係工人姐姐
• 瞓覺張床太軟，例如舊床褥，或梳化等- 床上有軟身物品

好多時，大人同小朋友分房各自瞓，雙方嘅睡眠質素都更有機會得到改善，呢點喺好多case都曾經見到。有媽咪話，同小朋友同房瞓連咳都唔敢，怕整醒囡囡，結果成晚瞓唔著但連郁都唔敢郁... 最後決定兩公婆搬出廳瞓，全家人連埋7個月大嘅囡囡都自此一齊一覺瞓到天光！

當然，每個家庭有唔同嘅情況，家長嘅育兒觀亦可以有好大分別。分享少少我喺進行睡眠諮詢時嘅一般建議。只要符合以下3個條件，與孩子同床而睡可以係一件美好嘅事：

• 必須注意安全

尤其是如果你希望BB能夠自行入睡，除非你囝囝囡囡已年滿3歲，否則不建議畀小朋友瞓大人床

• 屋企所有人都同意呢個安排

唔會感到沮喪或不滿。如果係因為BB有睡眠問題，至迫不得已同床，咁會對家庭氣氛帶嚟隱憂

• 所有人都能夠得到充足睡眠

如果BB半夜經常醒咗喊，需要你安撫至能夠再次入睡，咁並非能持續落去嘅事

但如果真係冇空間，需要同BB一齊瞓的話，就必須注意以下幾點：

• BB睡眠空間唔可以有任何枕頭或棉被等物品，以免無意間令BB頭部被冚住，造成危險
• 唔好將BB放喺睡在父母之間，床上亦唔可以有其他BB／小朋友，或寵物
• 確保BB唔會被卡住喺床與牆壁之間，亦唔應該使用防護欄
• 如果同床嘅成人頭髮較長，亦應該縛起
• 不應使用會限制BB活動能力嘅包巾或包被，但可以使用睡袋

有啲媽咪爹哋為咗保護BB，會用床中床／分隔床，其實分隔床同樣有一定風險，甚至可能因為家長誤以為BB瞓喺分隔床內會較安全，更易疏忽而做成危險！當BB與父母同床而睡，最危險嘅係BB好可能會被床上被鋪冚住，又或者被大人壓住無法呼吸。呢種分隔床睇起上嚟似乎將BB與父母嘅睡眠空間分隔開，但其實完全無助減低以上情況發生嘅風險。

畀BB瞓喺獨立嘅空間，係最安全的做法。必須同床而睡的話，父母就必須注意自己入睡時嘅姿勢，確保BB能得到最佳保護。如下圖所示，媽咪需要側睡，一隻手臂向前伸，另一隻手臂則應向下，畀BB瞓喺雙臂之間所形成一個C字嘅位置之內。

圖：The Lullaby Trust

切勿將枕頭放喺床邊當護欄，一來會增加BB嘅窒息風險，二來當BB郁動或喺床上爬行時，單單幾個枕頭並不足以阻擋BB跌落地！就算係市面上出售的防護欄，同樣並唔係100%安全，因為BB有可能會被卡住喺防護欄與床褥之間，無法呼吸而發生意外。當BB識企，床欄亦好可能會因BB猛力搖晃嘅動作導致鬆脫。

P.S. 注意圖入面寫“safer" bedsharing，而非"safe" bedsharing，因為同床而睡有一定風險，並非完全安全嘅睡眠安排。只要你有足夠嘅空間，請畀BB自己瞓嬰兒床

如果你因為BB半夜成日醒瞓得唔好，令你要成日起身抱返佢瞓，所以太攰之下「被迫同床」，其實唔需要死撐㗎！睡眠係科學＋心理學，只要移除令BB夜醒大喊嘅成因，令BB半夜醒咗都可以自己安然瞓得返，唔駛次次大喊求救，咁就等如「一覺瞓天光」！

係㗎！想BB瞓得好，重點唔係「自行入睡」，而係BB半夜醒咗可以都可以瞓得返！而要幫BB做到呢一點，絕對唔需要留低個BB喺房由佢喊到瞓著！你絕對可以留喺BB身邊安撫佢，Cry it out (CIO) 已經過時㗎嘞！

［Dolce Sleepers 甜睡寶寶網上課程］

報讀課程，仲可以同我喺Zoom直接傾你BB嘅情況㗎 😉

0-5個月：甜睡寶寶計劃
6個月-2歲：睡眠調整全面睇
2歲以上：幼兒自行入睡課程

想知道課程係咪適合你同你BB，歡迎隨時搵我傾傾 😁

Email: catherine@dolcesleepers.com

FB: m.me/dolcesleepers

資料來源：

1. How to Keep Your Sleeping Baby Safe: AAP Policy Explained
2. What is the safest sleep solution for my baby with reflux?
3. Patient Education Handouts"Safe Sleep and Your Baby: How Parents Can Reduce the Risk of SIDS and Suffocation
   

Categories: 甜睡寶寶