６種令BB瞓得舒服又安心嘅安睡產品

Catherine Author

希望BB瞓得好，需要硬件及軟件嘅配合至得。

今日我會同大家分享６種令BB瞓得安心又舒服嘅安睡產品 😉

我仲揀選咗一啲免運費嘅產品，方便大家網上即時選購添！除咗睡眠相關產品外，仲有其他育兒好物推介㗎！

立即去 ➡️ ［孖仔媽媽Catherine網店 (link)］

１) 不透光窗簾

好多媽咪爹哋都會話，無論幾點畀BB瞓，都總係會６點幾就醒。究竟點解呢？

必須先注意嘅一點係，一般我哋所講嘅「早醒」問題，係４-５am呢個時段內醒嘅情況。有啲BB天生係早鳥，需要早睡早起，所以６點其實已經係佢哋嘅起身時間！（從健康睡眠嘅角度，BB最好係由６-８pm瞓到６-８am，夜間睡眠時數有１０-１２小時至足夠）

之不過，你BB之所以會６點幾醒，又未必一定會受生理時鐘所影響，冇得解救嘅！其實，有一個經常被忽視原因。只要做好咗呢點，問題就能夠即刻得到解決…

嘗試留意一下，BB瞓覺嘅地方，係咪會喺日出嘅時候，出現明顯嘅光暗度轉變呢？

BB仲細，作息仍然會遵照身體嘅自然規律去運行（晝夜節律），日出而作，日入而息。當睡房光咗，大腦會接收到訊號，認為係時候起身，開始一日嘅活動作息。

有媽咪曾經喺群組分享，囝囝之前６點幾就會醒，夜晚亦要８點太陽落山至瞓得著。但當換咗全遮光窗簾後，囝囝可以瞓到７點都未醒，夜晚亦７點幾就瞓咗，成家人嘅睡眠質素從而提升咗好多！

當然，換窗簾係最徹底嘅做法。不過亦可以有其他替代，或者臨時嘅方法：

用黑色不透光隔熱貼貼喺玻璃上，如果睡房只係用嚟瞓覺，一了百了封咗佢唔駛煩
買塊吸盤形旅行遮光窗簾，呢種窗簾其實係一塊黑色不透光嘅布，可以自己裁剪大細，唔用時除落嚟就得。
去IKEA宜家家居買SCHOTTIS遮光風琴簾，呢隻款可以自己裁切成需要嘅尺寸，而且唔駛鑽窿，極為容易安裝
未得閒買，或買咗要等送貨，可以用錫紙封住先都得㗎

當然，環境因素只係其中一點。如果你囝囝囡囡太夜瞓攰得滯，好多時亦會只瞓到９個鐘就瞓唔返，未能進入最後一段深層睡眠，於是睡眠恢復力不足，瞓醒都仍然好攰咁，全日不斷打喊靈同扭計，日夜都瞓得差…（唔好以為攰就會瞓得好同遲啲醒，實際情況係完全相反㗎囉...）

２) 白噪音

白噪音（white noise）係一種有規律性嘅聲音，例如吸塵機同風筒嘅聲音等。但有好多人都唔知，其實冷氣機、風扇同抽濕機嘅聲一樣都係白噪音嚟㗎！呢啲聲音大人一般都已經好習慣，唔會覺得太嘈。

白噪音有助改善BB嘅睡眠品質，係因為：

1. 營造胎內環境

當BB仍然喺媽咪肚入面嘅時候，其實個環境好多聲音，有心跳聲有血液流動嘅聲音。所以，一個完全安靜嘅環境，有啲BB可能會唔適應。白噪音可以營造胎兒响子宮內所聽到嘅聲音，呢種熟悉嘅聲音，可以增加BB嘅安全感。

2. 減低外間刺激

白噪音能夠掩蓋環境中大部分嘅聲音，例如人聲車聲，或大人喺睡房以外空間活動嘅聲音，減但BB受到突如期來嘅聲音所干擾嘅機會

3. 成為睡眠關聯

當BB一聽到白噪音，就知道係時候瞓覺（注意：同睡前儀式其他步驟一樣，需要時間㗎！同埋記得要臨瞓至開，唔好一入房就開呀！）

的確，對於初生BB嚟講，白噪音能營造返喺媽咪子宮內嘅聲音，增加熟悉感。不過講到播啲聲就能夠令BB入睡，未免太誇張 😅

白噪音唔會有催眠作用，希望BB容易啲瞓得著，重點係注意清醒時間（立即登記參加免費課程 (link)，我會講解Dolce Sleepers嘅入門心法，教你用5招解決BB入睡困難嘅問題 😉）

想知道點樣正確使用白噪音，令BB安心入睡同瞓得好，睇睇呢篇文章啦！

CLICK -->［點用白噪音至能有助入睡？(link)］

３) 睡袋

香港嘅冬天雖然唔係好凍，但當BB瞓覺時，體溫會因活動度大減而下降。好多家長都會因為BB經常踢被而苦惱，無法安心瞓覺。其實呢個問題好容易就解決得到，就係幫BB著個睡袋。而且，仲有其他你意想不到嘅好處添！

睡袋就等如一張可著上身嘅棉被，無論BB翻幾多次身、坐起或站起，都無須再次整理。
睡袋能夠成為一種睡眠關聯，當你為BB著上睡袋，佢就會知道係時候瞓覺嘞。
睡袋能防止BB隻腳被卡喺嬰兒床欄之間（床圍並非安全嘅產品，切勿使用）。
睡袋唔會蓋住BB頭部，或纏住條頸，減低發生嬰兒猝死症嘅風險。
睡袋能減低BB嘅靈活度，延遲BB爬出嬰兒床嘅時間（記得床內應該清空所有物品，以免發生危險）。

幾時可以開始使用睡袋呢？

當BB出現開始翻身嘅跡象，就應該停止用包巾（swaddle）而轉用睡袋，最安全嘅建議為出生後8星期。

點樣選購合適嘅睡袋呢？

尺寸適中：BB頭部唔會退入睡袋內，長度則不成問題
厚薄適中：市面上有唔同物料製造嘅睡袋，厚薄度以tog為量度單位，由0.5tog-3.5tog都有，適合一年四季唔同氣候所需
配合年齡需要：有些初生BB因為喺媽媽肚內時，習慣將雙手舉高放在頭部兩邊，所以用包巾將雙手壓下反而會瞓得唔好，市面上有特別設計嘅睡袋，能夠畀BB保持雙手向上嘅睡姿；而當BB年紀漸大，對於無法睇到自己雙腳可能會出現抗拒嘅情況，呢個時候你就可以轉用開褲腳睡袋。

４) 安撫公仔（最好1.5歲以上至用）

好多小朋友都成日要痴住大人至肯瞓。於是，好多媽咪爹哋就會諗，畀隻公仔小朋友，佢係咪就會嗌少啲「媽~咪~~」呢？

的確，安撫公仔有情感轉移嘅作用（transitional object），可以令小朋友安心啲，亦會開心啲，甚至更合作！

但係，如果你希望BB／小朋友喊時塞個公仔畀佢，佢就唔會搵你，對唔住，咁樣係唔work嘅，因為冇任何嘢可以完全取代到媽咪喺囝囝囡囡心目中嘅地位。

安撫公仔其實只係喺小朋友心情好時發揮到作用，如果佢攰得滯已經情緒失控，安撫公仔唔會令佢冷靜到落嚟。呢個時候你塞隻公仔畀佢，更可能會有反效果...

另外非常重要嘅一點係，基於安全問題，１歲前唔應該有任何軟身物品喺BB嘅睡眠環境內（無論係嬰兒床或與大人同床），所以應該等BB１歲後至畀隻公仔佢，甚至再大個少少去到一歲半，安撫公仔至有最明顯嘅效果。

如何挑選安撫公仔？

尺寸不宜太大，避免小朋友會踩住用嚟借力擒出床，大概30cm左右就好。另外就係一定要可以機洗，而且一買要買起碼3隻，洗咗或唔見咗都有隻後備。我通常建議去ikea買，品質好價錢靚，仲可以帶埋小朋友去畀佢自己揀（畀佢拎一隻好嘞，跟住記得放多兩隻一樣嘅入購物袋）。

如果屋企已經有好多公仔唔想買，亦都冇問題，你可以喺睡前儀式加一個步驟，問囝囝囡囡想要邊隻公仔陪佢瞓覺。

之不過，唔係話你畀隻公仔佢，小朋友就會開心攬住瞓，除非小朋友對隻公仔「一見鍾情」，否則一般都需要畀啲時間佢哋建立關係㗎！喺［睡眠調整全面睇 (link)］嘅bonus，我會逐步講解點樣將你嘅愛轉移到公仔身上 😉

５) 發光鬧鐘（適合2歲以上）

每朝早，你係自然醒，定畀囝囝囡囡「叫醒」？

如果小朋友比預定時間早醒，嘈住要出房玩，可以嘗試畀個會發光嘅鬧鐘佢，畀佢知道幾時可以離開。

小朋友幾點醒，我哋當然冇辦法控制得到，不過一般嚟講，如果係喺預定起身時間前30分鐘以內，其實都已經好理想。但如果你囝囝囡囡經常比預定起身時間早成個鐘醒，咁就係時候睇吓，係咪你所預定嘅起身時間唔太realistic嘞！

早醒嘅成因比較複雜，但其中好重要嘅一點，係我哋嘅處理方式（年紀越大影響越大）。就算係已經能自行入嘅小朋友，如果你見佢早醒就會餵奶、抱去大人床，或者同佢玩，咁佢又點會想瞓返，或喺床自己玩呢？對於接近2歲或以上嘅小朋友，一般早醒都未必會大喊，但好可能會大叫，甚至走去你度整醒你...

想瞓多陣？咁可以試吓用一個發光鬧鐘！

首先，當然係要引起佢哋嘅興趣，同佢哋一齊開箱，然後示範畀佢哋睇，話佢知燈光嘅意思。

如果你個鐘只係會發光，咁就簡單啲，同佢講發光至可以離開張床就得。

如果係幼兒專用嘅鬧鐘，好多時會有唔同顏色，例如紅色係要瞓覺，綠色係要起身。記得預先示範同講解，令小朋友明白唔同顏色嘅意思。另外，好重要嘅係，必須要預先講定，如果佢哋醒咗，而盞燈未發光/轉綠色，佢哋應該要點做。

例如：

攬住熊熊，同佢一齊瞓返
拎水樽飲啖水，然後瞓返
眨幾下眼，然後合埋眼

記得要畀正面指示，即係同佢講要點做，而避免用叫佢「唔好xxx」。當然就算你囝囝囡囡聽得明你講嘅嘢，都唔代表就會即刻做到，佢哋會需要你用行動去幫佢逐漸適應。所以，唔好見似乎唔work就放棄呀！

每一朝，都必須要等鬧鐘發光，至畀囝囝囡囡出房。如果佢哋自己離開咗張床，你只需要好簡單咁帶佢返上床就得，最多講多句「鬧鐘未發光/轉綠色」就足夠，唔應該亦唔需要解釋太多，或諗住同佢講道理。其實小朋友去到呢個年紀明㗎嘞！不過做唔做到係另一回事嗟！只要你用行動去reinforce就已經足夠。記得保持貫徹始終，至能夠令訊息足夠清晰。只需要幾日，就會成功㗎嘞！

P.S. 揀鬧鐘嘅第一個重點係睇吓有冇位可以插電，否則就要買可以叉電嘅版本。其次係可唔可以熄晒啲光，否則鐘面要向下避免太光影響入睡（小朋友見到有影可能會驚），或者可以用一條毛巾冚坐個鐘都得。發光鬧鐘喺香港冇乜選擇，我幫你挑選咗幾款可以免運費嘅鬧鐘，歡迎選購 ➡️ ［孖仔媽媽Catherine網店 (link)］］

再P.S. 幼兒睡眠問題，除咗一般常見嘅生理同環境因素外，心理因素嘅影響亦非常大！如果習慣夜瞓，甚至對瞓覺有抗拒感，睡眠問題會好難得到解決… 點樣可以令小朋友早啲瞓（尤其要準備返學），同埋唔再討厭瞓覺呢？你仲希望小朋友可以自己瞓唔駛晚晚陪成個鐘？

［幼兒自行入睡課程 (link)］幫到你！

適合２歲以上幼兒，以建立安全感為重點，令孩子愉快入睡，睡得健康！

而家參加課程，仲會獲邀出席Zoom新學員歡迎會，同孖他媽媽Catherine直接傾你小朋友嘅情況㗎！

CLICK ➡️ 課程詳情及報名 (link)

５) 嬰兒監視器

就算BB同你同房，其實都好建議裝部監視器。除咗日頭小睡時可以知道BB瞓成點，半夜如果BB發出聲音，都可以先睇cam，確保BB真係醒咗至作出回應，避免騷擾到BB。

有video比淨係得聲音好，因為你可以從囝囝囡囡嘅身體語言知道應該點樣做，例如究竟BB係嘗試自己瞓緊，定係需要你去睇吓佢呢？

監視器分2種 - 可用任何手機連接嘅wifi機，或有專用monitor嘅closed-circuit機。揀邊種要視乎需要同埋要求，wifi機方便雙職父母瞭解囝囝囡囡喺屋企嘅情況，價錢亦平好多，但可能會有被hack嘅危險。有parent unit嘅機因為訊號傳送嘅距離短，適合全職媽媽喺屋企用，不過價錢就貴啲，而且影像冇咁清晰。

無論選擇邊款都好，建議要試清楚部機：

a) 開著時唔好有太多燈，尤其會閃嘅燈

因為有夜視功能，所以至少都會有一盞紅燈。有啲機有好多盞燈圍住個鏡頭，甚至會有盞不斷閃嘅燈，可以睇吓有冇得熄咗佢，避免騷擾到BB。

b) 開機時唔會bip一聲

萬一半夜停電之後再開返機，都唔會bip一聲嘈醒同嚇親BB。

提提你，音樂有可能對BB大腦造成過度刺激，所以就算部機有內置安眠曲，都不建議使用。另外，為免電磁波影響睡眠，部機要放距離嬰兒床2米外嘅距離呀！

以下係參加咗「健康睡眠工作坊」一位媽咪喺買咗監視器後嘅分享：

「聽Catherine 的建議買了個baby monitor。尋晚哄睡前同我4個多月大的BB講: 今日媽媽試下俾你床上入睡。跟住我氹左BB一陣, 佢不停講野好似仲未想訓，於是我放佢在床上同佢講：一陣你想訓媽媽再來幫你。接著出左房睇住baby monitor(第一日用)，見佢典來典去，點知一路食手一路典左10分鐘左右後竟然自己訓著左。

半夜餵奶，諗住再接再厲試下BB是否可以床上入睡。餵完後趁佢仲清醒將佢放在床上，拖住佢隻手。起初佢又係典來典去，仲喊左幾聲，但典左一段時間就訓左。唔洗好似平時抱睡、奶睡到訓著！

雖然應該都有其他因素配合（剛好夠攰又唔係過度疲勞），唔期望佢成日都做到，但知道BB真係有能力床上入睡甚至成功自行入睡都好開心！可能佢平時都做到但無monitor時我會時不時入去check下，打擾左佢練習的機會。感謝Catherine 俾好多有用的意見。希望不同媽咪的bb都可以一路進步。」

如果你BB仲未出世，正物色緊嬰兒床同床上用品嘅話，睇埋以下４種安睡產品嘅注意事項啦！

７) 睡床

喺頭兩年，BB有一半時間都係瞓緊覺，所以一張好嘅BB床非常重要。有啲聲稱有好多功能嘅BB床其實未必符合安全規定，二手床嘅品質亦難以保證。

基本上，最重要係嘅床欄嘅間隙，必須少於6厘米（2⅜吋），避免BB個頭會卡住，發生危險，或者拎罐汽水出嚟，睇吓可唔可以穿得過啦！

另外，BB好鍾意喺床上面彈下彈下，甚至猛力搖，所以床架必須穩固，切勿做任何形式嘅改裝（例如見BB可以擒出床，就將床板下降至地面，咁做會影響睡床結構，非常危險！）。

仲有一點係，當BB出牙，會好鍾意咬床架，所以一定要揀無毒材質。最好買大牌子出嘅BB床，唔好淘張不知名嘅床嘞... 人地送嘅二手床，亦必須要check清楚先呀！

好多香港家庭面對土地問題，而唔能夠畀到BB瞓一張床，於是諗住用床中床去保護BB。但其實，分隔床並不能減低風險，甚至可能因為誤以為BB瞓喺分隔床內會較安全，更易疏忽而發生意外。已經有研究證實，分隔床/床中床係令BB出事嘅高危產品，外國亦曾回收出事嘅產品。

下面呢篇有關睡眠安全嘅資訊，新手父母一定一定一定要睇！

CLICK ➡️［安全睡眠ABC (link)］

Infant Furniture: Cribs" (AAP)

８) 床褥

你知道，揀BB床褥最重要嘅一個條件係乜嘢嗎？一張好嘅嬰兒床褥，同大人床褥嘅要求好唔同㗎！

BB床褥，最緊要夠硬！因為床褥太軟，BB個頭壓落去會下陷，有可能影響呼吸。好多BB喺識得翻身後，亦會鍾意趴喺度瞓。當床褥太軟令BB塊面同床褥未有足夠空間，咁BB就會不斷吸入自己所呼出嘅二氧化碳，吸入過多二氧化碳或氧氣不足，會導致二氧化碳中毒或死亡！

另外，好多人以為，如果BB成日嘔奶嘅話，可以抬高床頭30度🙈

美國兒科醫學會（AAP）有明確指引，話畀BB傾斜咁瞓，唔單止無助舒緩嘔奶（reflux）嘅問題，而且更有可能會令BB向下跌，屈住條頸透唔到氣...

另外順便講埋：係咪唔可以畀BB趴睡呢？

我嘅答案係：

喺BB出生後頭一年，當你放BB落床，必須要係面向上背向下仰睡嘅姿勢。但如果BB能夠自己翻身轉為趴睡，咁就唔需要將佢再翻過嚟嘞。之 · 不 · 過，BB床上唔可以有任何物品，包括枕頭、棉被、公仔、攬枕等軟身物品，而且亦唔能夠用床圍。

其實，BB自己翻身搵個舒服嘅姿勢瞓覺，你不斷將佢反返轉，跟住佢又翻返過去... 結果大人成晚提心吊膽唔敢瞓得耐，BB不斷被騷擾亦無法瞓得好。你都唔想瞓覺時不斷有人攪你啦，係咪先？所以，想能夠安心瞓個好覺，記得一定要揀張夠硬嘅床褥畀BB，同埋循守［安全睡眠ABC (link)］，咁就可以放心啦！

９) 床單

通常揀床單，第一樣諗嘅係圖案款式，跟住可能會睇吓質素地係咪全棉，甚至係咪有機棉，仲有夠唔夠柔軟順滑...

但係，你有冇留意條橡筋嘅設計，仲有床單尺寸係咪完全fit到張床褥呢？洗多幾次會唔會縮水呢？如果你嗰張係細張啲專畀初生BB用嗰種床，張床單有冇買返啱size，定係買咗標準嗰隻60x120先？

美國兒科醫學會建議，床單必須要完全貼服地包實張床褥至得，太大或細都會有鬆脫嘅危險。所以，條橡筋係四邊圍住晒嘅就最穩陣嘞！

１０) 包巾（只適用於未有翻身跡象嘅BB）

初生BB會因驚嚇反射 (Startle Reflex) ，突然手腳不自由主咁郁動而整醒自己。用包巾包住BB上半身，或者能夠令BB瞓得安穩啲，甚至有傳統智慧話擺個米袋喺BB心口，用嚟定驚安睡。

咁樣做，或者真係可以令BB瞓得安穩啲嘅，一啲外國醫院嘅新生嬰兒加護病房（NICU），甚至會將塞咗嘢嘅手套放喺BB身上，模仿媽媽嘅懷抱。

但要注意嘅係，喺醫院入面，所有BB都係24小時有人睇住嘅，而且亦有儀器監察住心跳及呼吸，所以發生意外嘅機會率好低。喺屋企就唔同嘞，幾年前就曾經發生過一宗意外，父母未能及時發現米袋向上移，結果BB面部被遮蓋窒息而出事！所以為安全起見，唔建議用米袋壓喺BB身上，其實BB身上亦唔應該放任何物品，避免釀成悲劇。

但BB成日整醒自己，點算好呢？

你可以使用包巾，將BB雙手跟身體包緊 (Swaddle) 。建議用拉鏈或魔術貼嘅設計，避免包巾鬆開，成晚要不斷整理，甚至造成危險。

有啲BB喺媽咪肚入面習慣舉起雙手，如果包到實反而會覺得唔舒服。市面上有一啲特別設計嘅睡袋，可以畀BB雙手放喺個頭旁邊，同時有包巾嘅效果，能有助減低驚嚇反射嘅影響。

Love to Dream Swaddle

記得當BB滿8個星期大，或者開始練習翻身嘅時候，為安全起見，必須停止使用包巾嘞！但BB仲係成日會整醒自己，點算好？Love to Dream亦有專為過渡期而設計嘅款式，可以拆走手臂部分。以下呢種特別為過渡期而設計嘅睡衣同睡袋亦幫到你。

Zipadee Swaddle Transition Sleep Sack

呢種星星形狀嘅睡袋，會產生輕微阻力，令BB可以自由郁動之餘，同時仍能提供包圍及舒適的感覺。

注意：Merlin's Magic Sleepsuit 雖然係同樣為過渡期而設，但因為呢隻厚身睡衣有重量感，所並非100%安全。

再提多一次，當BB出現開始想翻身嘅跡象，就要停止包住BB雙手，避免佢翻轉身趴咗喺度，但雙手撐唔起個身體，提高窒息風險。越早停用包巾，BB越容易適應，等到BB大個啲時至改，掙扎反而會更大。

另外，當BB去到6-8周大，因為母體褪黑激素已經所餘無幾，所以再冇初生時咁易入睡同瞓得長。

希望BB可以由出世開始就瞓得好，甚至令佢鍾意瞓覺，［甜睡寶寶計劃］就啱晒你！